സൈബർ ആക്രമണത്തിൽ കേസ് എടുക്കരുതെന്ന് കെ.സി വേണുഗോപാൽ; പ്രതികൾ കോൺഗ്രസ് അനുഭാവികൾ

എഐസിസി ജനറൽ സെക്രട്ടറി കെ.സി വേണുഗോപാലിനെതിരെ സാമൂഹിക മാധ്യമങ്ങളിലൂടെയുണ്ടായ അധിക്ഷേപങ്ങളിൽ പ്രതികരിച്ച് അദ്ദേഹം തന്നെ രംഗത്ത് എത്തി. തനിക്കെതിരെ സൈബർ ആക്രമണം നടത്തിയ ആർക്കെതിരെയും കേസ് എടുക്കരുതെന്നാണ് തന്റെ നിലപാടെന്ന് കെ.സി വേണുഗോപാൽ വ്യക്തമാക്കി.

എങ്കിലും, സൈബറിടത്തിൽ സ്വന്തം നേതാവിനെ അപമാനിക്കുന്നവർ ഗൗരവകരമായ ആത്മപരിശോധന നടത്തണമെന്ന് അദ്ദേഹം ഓർമ്മിപ്പിച്ചു. രാഷ്ട്രീയ ജീവിതത്തിനിടയിൽ സൈബറിടത്തിലും അല്ലാതെയുമൊക്കെ നിരവധി ആക്രമണങ്ങൾ താൻ നേരിട്ടു കഴിഞ്ഞിട്ടുണ്ടെന്നും, ഇതൊന്നും തന്നെ ബാധിക്കില്ലെന്നും അദ്ദേഹം കൂട്ടിച്ചേർത്തു.

പാർട്ടിയുമായി ബന്ധപ്പെട്ട ഒരു കോൺഗ്രസുകാരനും നടപടികൾക്ക് ഇരയായി ശിക്ഷിക്കപ്പെടരുതെന്നാണ് തന്റെ ആഗ്രഹമെന്നും അദ്ദേഹം വ്യക്തമാക്കി.

ഇതിനിടെ, ഏഷ്യൻ ​ഗെയിംസിൽ അഭിമാനാർഹമായ നേട്ടം കൈവരിച്ച വിദർഷ വിനോദിന്റെ വസതിയിലെത്തി കെ.സി വേണുഗോപാൽ അവരെ നേരിൽ സന്ദർശിക്കുകയും അഭിനന്ദനങ്ങൾ അറിയിക്കുകയും ചെയ്തു. അതേസമയം, കെ.സി വേണുഗോപാൽ നൽകിയ പരാതിയുടെ അടിസ്ഥാനത്തിൽ സൈബർ ആക്രമണവുമായി ബന്ധപ്പെട്ട് പൊലീസ് കേസെടുത്ത അഞ്ചു പേരും കോൺഗ്രസ് അനുഭാവികളാണെന്നാണ് പുറത്തുവരുന്ന വിവരങ്ങൾ.

പ്രതികളിൽ രണ്ടു പേരുടെ സാമൂഹിക മാധ്യമ പ്രൊഫൈൽ ഫോട്ടോകളിൽ കേരള മുഖ്യമന്ത്രിയോടൊപ്പമുള്ള ചിത്രങ്ങളാണുണ്ടായിരുന്നത്. സിജു സാമുവൽ, ഹംസ കെ.പി, ജാഫർ കെ.

അലിയാർ തട്ടികുന്നത്ത്, അബ്ദുൾ ഖാദർ റെഷി, പി.സി. പുലാമന്തോൾ എന്നിവരുടെ പേരിലുള്ള പ്രൊഫൈലുകളുടെ ഉടമകൾക്കെതിരെയാണ് അന്വേഷണ സംഘം കേസെടുത്തിട്ടുള്ളത്.

തെരഞ്ഞെടുപ്പ് വിജയത്തിന് ശേഷം സംസ്ഥാനത്ത് മുഖ്യമന്ത്രിയെ ചൊല്ലിയുള്ള ചർച്ചകളും തർക്കങ്ങളും ഉയർന്നുവന്ന നിർണായക ഘട്ടത്തിലാണ് കെ.സി. വേണു​ഗോപാലിനെ ലക്ഷ്യമിട്ട് ഇത്തരത്തിലുള്ള രൂക്ഷമായ സൈബർ ആക്രമണങ്ങൾ അരങ്ങേറിയത്.