കേന്ദ്ര ആഭ്യന്തര മന്ത്രി അമിത് ഷായ്ക്കെതിരായ കരിങ്കൊടി പ്രതിഷേധം സംഘടനാ തലത്തില് എടുത്ത ഔദ്യോഗിക തീരുമാനത്തിന്റെ ഭാഗമായാണെന്ന് മന്ത്രി ഒ.ജെ. ജനീഷ് വ്യക്തമാക്കി.
ഇതിന് മറുപടിയായി സംസ്ഥാനത്തെ മന്ത്രിമാര്ക്ക് നേരെ കരിങ്കൊടി കാണിക്കുമെന്ന് വെല്ലുവിളിക്കുന്നത് രാഷ്ട്രീയ പാപ്പരത്തമാണെന്നും അദ്ദേഹം കോഴിക്കോട് കുറ്റപ്പെടുത്തി. രാജ്യത്ത് തിരഞ്ഞെടുപ്പ് അട്ടിമറിക്കപ്പെട്ടുവെന്ന ഗുരുതരമായ ആരോപണങ്ങളാണ് നിലവിലുള്ളത്.
മുഖ്യതിരഞ്ഞെടുപ്പ് കമ്മീഷണര് ഗ്യാനേഷ് കുമാര് പ്രതിസ്ഥാനത്തുള്ളവരെ സംരക്ഷിക്കുന്ന നിലപാടാണ് സ്വീകരിക്കുന്നത്. ഈ സാഹചര്യത്തില് അധികാരത്തിലിരിക്കുന്നവര്ക്കും ജനാധിപത്യ അട്ടിമറികൾക്ക് നേതൃത്വം നല്കുന്നവര്ക്കുമെതിരെ ജനാധിപത്യപരമായ പ്രതിഷേധങ്ങള് ഉയര്ന്നുവരുന്നത് തീര്ത്തും സ്വാഭാവികമാണ്.
സംഘടനാപരമായ ആലോചനയിലൂടെ എടുത്ത തീരുമാനപ്രകാരമാണ് കരിങ്കൊടി പ്രതിഷേധം സംഘടിപ്പിച്ചത്. അതിൽ യാതൊരുവിധ വീഴ്ചയും സംഭവിച്ചതായി കരുതുന്നില്ലെന്നും അദ്ദേഹം കൂട്ടിച്ചേര്ത്തു.
നിലവിലുള്ള രാഷ്ട്രീയ സാഹചര്യങ്ങളുടെ പശ്ചാത്തലത്തിലാണ് കരിങ്കൊടി പ്രതിഷേധം സംഘടിപ്പിച്ചത്. എന്നാല് ഇതിന്റെ പേരില് സംസ്ഥാനത്തെ എല്ലാ മന്ത്രിമാര്ക്കും നേരെ കരിങ്കൊടി കാണിക്കുമെന്ന് പറയുന്നത് യുക്തിസഹമല്ല.
കേന്ദ്ര സര്ക്കാരിന്റെ ജനവിരുദ്ധ നയങ്ങള്ക്കെതിരെ രാജ്യവ്യാപകമായി യൂത്ത് കോണ്ഗ്രസിന്റെ നേതൃത്വത്തില് ശക്തമായ പ്രതിഷേധ പരിപാടികളാണ് നടന്നുവരുന്നത്. ഇതിന്റെ തുടര്ച്ചയായി താന് നയിക്കുന്ന പദയാത്ര ഒക്ടോബര് രണ്ടിന് ആരംഭിക്കുമെന്നും മന്ത്രി അറിയിച്ചു.
കേന്ദ്ര സര്ക്കാരിന്റെ നടപടികള്ക്കെതിരെ വിവിധങ്ങളായ പ്രതിഷേധ സമരങ്ങള് രാജ്യത്ത് ഉയര്ന്നുവരണമെന്ന് ജനാധിപത്യ സമൂഹം ആഗ്രഹിക്കുന്നുണ്ട്. ആ താത്പര്യങ്ങള് ഉള്ക്കൊണ്ട് മുന്നോട്ടുപോകാനും സമരങ്ങള് സംഘടിപ്പിക്കാനുമുള്ള ഉത്തരവാദിത്തം തങ്ങള്ക്കുണ്ട്.
ആ ചുമതല കൃത്യമായി നിറവേറ്റുമെന്നും അദ്ദേഹം വ്യക്തമാക്കി. അതേസമയം, കണ്ണൂര് മട്ടന്നൂരില് മുഖ്യമന്ത്രിക്ക് നേരെയും ബി.ജെ.പിയുടെ കരിങ്കൊടി പ്രതിഷേധം അരങ്ങേറി.
മട്ടന്നൂര് എളമ്പാറയില് വെച്ചാണ് ബി.ജെ.പി പ്രവര്ത്തകര് കരിങ്കൊടി കാണിച്ചത്. ബി.ജെ.പി കണ്ണൂര് സൗത്ത് ജില്ലാ പ്രസിഡണ്ട് ബിജു ഏളക്കുഴിയുടെ നേതൃത്വത്തിലായിരുന്നു ഈ പ്രതിഷേധം സംഘടിപ്പിച്ചത്.
തുടര്ന്ന് പ്രതിഷേധക്കാരായ പ്രവര്ത്തകരെ പൊലീസ് അറസ്റ്റ് ചെയ്ത് നീക്കി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
