മഹാരാഷ്ട്രയിലെ മുംബൈയിൽ ഭർത്താവുമായി ഉണ്ടായ വാക്കുതർക്കത്തെ തുടർന്ന് പത്താം നിലയിൽ നിന്ന് ചാടി ജീവനൊടുക്കാൻ ശ്രമിച്ച നവവധു അത്ഭുതകരമായി രക്ഷപ്പെട്ടു. ഭാണ്ടൂപ് ലേക്ക് റോഡിലെ സൺഷൈൻ ബിൽഡിംഗിൽ നിന്നുമാണ് യുവതി താഴേക്ക് ചാടിയത്.
എന്നാൽ കെട്ടിട സമുച്ചയത്തിന്റെ പരിസരത്തുണ്ടായിരുന്ന മരത്തിന്റെ കൊമ്പുകളിൽ കുടുങ്ങി നിൽക്കുകയായിരുന്നു.
പ്രതീക്ഷ ഹിരാവാലേ എന്ന 26കാരിയാണ് ആത്മഹത്യാ ശ്രമത്തിനിടെ അത്ഭുതകരമായി രക്ഷപ്പെട്ടത്. തറയിൽ നിന്ന് 25 അടിയോളം ഉയരത്തിൽ മരത്തിന്റെ ചില്ലയിൽ തങ്ങിനിൽക്കുകയായിരുന്നു യുവതി.
സംഭവത്തിൽ യുവതിയുടെ വലത് കാലിന് പരിക്കേറ്റിട്ടുണ്ട്. തുടർന്ന് നാട്ടുകാരും അഗ്നിരക്ഷാ സേനയും ചേർന്ന് നടത്തിയ പരിശ്രമങ്ങൾക്കൊടുവിലാണ് പരിക്കുകളോടെ ഇവരെ താഴെയിറക്കി ഭാണ്ടൂപിലെ സ്വകാര്യ ആശുപത്രിയിൽ പ്രവേശിപ്പിച്ചത്.
നാല് മാസം മുൻപായിരുന്നു യുവതിയുടെ വിവാഹം. വിവാഹം കഴിഞ്ഞ് ഏതാനും ദിവസങ്ങൾക്കുള്ളിൽ തന്നെ കുടുംബത്തിനുള്ളിൽ വാക്കുതർക്കങ്ങളും അസ്വാരസ്യങ്ങളും ആരംഭിച്ചിരുന്നതായി പൊലീസ് റിപ്പോർട്ടുകൾ വ്യക്തമാക്കുന്നു.
കഴിഞ്ഞ ദിവസം സമാനമായ രീതിയിൽ ഭർത്താവുമായി തർക്കമുണ്ടായതോടെയാണ് യുവതി ജീവനൊടുക്കാൻ ശ്രമം നടത്തിയത്. വലിയ ശബ്ദം കേട്ട് ഓടിയെത്തിയ പ്രദേശവാസികൾ യുവതി മരത്തിൽ കുടുങ്ങിക്കിടക്കുന്നത് കണ്ട് ഉടൻ തന്നെ പൊലീസിനെയും അഗ്നിരക്ഷാ സേനയെയും വിവരമറിയിക്കുകയായിരുന്നു.
സംഭവത്തിൽ വിശദമായ അന്വേഷണം ആരംഭിച്ച ഭാണ്ടൂപ് പൊലീസ്, ഗാർഹിക പീഡനമോ മറ്റ് എന്തെങ്കിലും സമ്മർദ്ദങ്ങളോ സംഭവത്തിന് പിന്നിലുണ്ടോ എന്ന് കണ്ടെത്തുന്നതിനായി കുടുംബാംഗങ്ങളിൽ നിന്നും ഭർത്താവിൽ നിന്നും മൊഴിയെടുത്തിട്ടുണ്ട്. (ആത്മഹത്യ ഒരു പ്രശ്നത്തിനും പരിഹാരമല്ല.
പ്രതിസന്ധികൾ അത്തരം തോന്നൽ ഉണ്ടാക്കിയാൽ കൗൺസലിംഗ് പിന്തുണക്കായി ഈ നമ്പറുകളിൽ വിളിക്കാം 1056, 0471- 2552056)
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
