ചൈനയിൽ ഓഫിസ് ശുചിമുറിയിൽ ടെക്കി മരിച്ച സംഭവം: നിയമപരമായ ആനുകൂല്യങ്ങൾ നിഷേധിച്ച് കമ്പനി

ബെയ്ജിങ്: ഷെൻഷെൻ ആസ്ഥാനമായി പ്രവർത്തിക്കുന്ന പ്രമുഖ ഐടി കമ്പനിയിൽ സോഫ്റ്റ്‌വെയർ എൻജിനീയർ ഓഫിസ് ശുചിമുറിയിൽ കുഴഞ്ഞുവീണ് മരിച്ച സംഭവത്തിൽ വിചിത്ര ന്യായവാദവുമായി മാനേജ്‌മെന്റ്. മരണപ്പെട്ട

ഉദ്യോഗസ്ഥന്റെ കുടുംബത്തിന് ലഭിക്കേണ്ട നിയമപരമായ അർഹമായ ആനുകൂല്യങ്ങളും നഷ്ടപരിഹാരവും നിഷേധിക്കാനുള്ള തന്ത്രങ്ങളുടെ ഭാഗമായാണ് കമ്പനിയുടെ ഈ നടപടി.

ഉദ്യോഗസ്ഥന്റെ മരണം ഔദ്യോഗിക ജോലിയുടെ ഭാഗമായി സംഭവിച്ചതല്ലെന്നാണ് അധികൃതരുടെ വാദം. ഡ്യൂട്ടിക്കായി ഓഫിസ് കെട്ടിടത്തിൽ എത്തിയ ജീവനക്കാരൻ തന്റെ കമ്പ്യൂട്ടർ സിസ്റ്റം ഓൺ ചെയ്യാതെ നേരിട്ട് ശുചിമുറിയിലേക്ക് പോവുകയായിരുന്നു എന്നും, അതിനാൽ അദ്ദേഹം ജോലി സമയത്ത് ഹാജരായിരുന്നില്ലെന്നുമാണ് കുടുംബത്തിന്റെ അപേക്ഷ തള്ളിക്കളയാൻ കമ്പനി ഉയർത്തുന്ന വിചിത്രമായ കാരണം.

കഴിഞ്ഞ ഏപ്രിൽ മാസത്തിലാണ് രണ്ട് കുട്ടികളുടെ പിതാവായ സിങ് ഷി ഐടി കമ്പനിയുടെ ഓഫിസ് കെട്ടിടത്തിന്റെ രണ്ടാം നിലയിലെ ശുചിമുറിയിൽ കുഴഞ്ഞുവീണ് മരണമടഞ്ഞത്. നാല് വർഷത്തോളമായി ഇദ്ദേഹം ഈ സ്ഥാപനത്തിൽ സേവനം അനുഷ്ഠിച്ചു വരികയായിരുന്നു.

ഓഫീസ് സമയത്ത് എത്തിയ ഉടൻ ഡെസ്കിലിരിക്കാതെ ശുചിമുറിയിലേക്ക് പോയതുകൊണ്ട് മരണത്തെ ഔദ്യോഗിക ജോലിയുമായി ബന്ധപ്പെടുത്താൻ കഴിയില്ലെന്നാണ് കമ്പനി വൃത്തങ്ങൾ ആവർത്തിക്കുന്നത്. അതേസമയം, ഉദ്യോഗസ്ഥന്റെ കുടുംബത്തിന് മാനുഷിക പരിഗണന നൽകി ഭാഗികമായ ചില സഹായങ്ങൾ മാത്രമാണ് തൊഴിലുടമ നൽകിയിട്ടുള്ളത്.

എന്നാൽ മരണം ജോലിസ്ഥലത്തുവെച്ചും ഡ്യൂട്ടി സമയത്തുമാണ് സംഭവിച്ചതെന്ന് അംഗീകരിക്കാൻ കമ്പനി തയ്യാറാകാത്തത് വലിയ പ്രതിഷേധങ്ങൾക്ക് ഇടയാക്കിയിട്ടുണ്ട്. ഈ അപൂർവ്വവും വിവാദപരവുമായ വിഷയം നിലവിൽ സമൂഹമാധ്യമങ്ങളിലും വ്യാപകമായ ചർച്ചകൾക്കാണ് വഴിതെളിച്ചിരിക്കുന്നത്.