ഗ്യാലക്സി S27 അൾട്രായിൽ വലിയ ബാറ്ററിയുമായി സാംസങ്; നീണ്ട വർഷത്തെ കാത്തിരിപ്പിന് വിരാമം

ബാറ്ററി സാങ്കേതികവിദ്യയിൽ വലിയ പുരോഗതി കൈവരിച്ചിട്ടും, 2020 ലെ ഗ്യാലക്സി S20 അൾട്രാ മുതൽ ഫ്ലാഗ്ഷിപ്പ് ഫോണുകളിൽ ഒരേ 5,000mAh ബാറ്ററി ശേഷി മാത്രമാണ് സാംസങ് നിലനിർത്തിയിരുന്നത്. എന്നാൽ ആറ് വർഷത്തെ നീണ്ട

ഇടവേളയ്ക്ക് ശേഷം, 2027-ൽ പുറത്തിറങ്ങുന്ന ഫ്ലാഗ്ഷിപ്പ് ഫോണായ ഗ്യാലക്സി S27 അൾട്രായിൽ വലിയ ബാറ്ററി ഉൾപ്പെടുത്താൻ കമ്പനി തയ്യാറെടുക്കുന്നതായി റിപ്പോർട്ടുകൾ വ്യക്തമാക്കുന്നു. ഗ്യാലക്സി S27 അൾട്രാ മോഡലിൽ 5,534mAh റേറ്റഡ് ശേഷിയുള്ള ബാറ്ററി ഉണ്ടായിരിക്കുമെന്നാണ് വിവരം.

സാംസങ് ഇത് 5,700mAh അല്ലെങ്കിൽ 5,800mAh ശേഷിയുള്ളതായി വിപണിയിൽ അവതരിപ്പിച്ചേക്കാം. എന്തായാലും ഈ വർധിച്ച ബാറ്ററി ശേഷി ഫോണിന്റെ പ്രവർത്തന സമയം ഗണ്യമായി വർധിപ്പിക്കും.

സാംസങ് നിരയിലേക്ക് പുതുതായി എത്തുമെന്ന് കരുതുന്ന ഗ്യാലക്സി S27 പ്രോ മോഡലിലും S26 അൾട്രായെ അപേക്ഷിച്ച് വലിയ ബാറ്ററി ഉണ്ടായിരിക്കുമെന്നാണ് സൂചന. പ്രോ മോഡലിന് വലിപ്പം കുറവാണെങ്കിലും 5,087mAh ശേഷിയുള്ള ബാറ്ററിയാകും ഇതിൽ ഉൾപ്പെടുത്തുക.

ഇത് 5,200mAh ബാറ്ററിയായി കമ്പനി വിപണിയിലെത്തിച്ചേക്കാം. സിലിക്കൺ-കാർബൺ ആനോഡ് സെല്ലുകളിലേക്ക് മാറിയതിലൂടെ ഈ വർഷത്തെ ഫോൾഡബിൾ ഫോണുകളായ ഗ്യാലക്സി Z ഫോൾഡ് 8 അൾട്രാ, Z ഫോൾഡ് 8 എന്നിവയുടെ ബാറ്ററി ശേഷി സാംസങ് വർധിപ്പിച്ചിരുന്നു.

Z ഫോൾഡ് 7-ൽ ഉണ്ടായിരുന്ന 4,400mAh ബാറ്ററിയുമായി താരതമ്യം ചെയ്യുമ്പോൾ Z ഫോൾഡ് 8 അൾട്രായിൽ 5,000mAh ബാറ്ററിയാണ് നൽകിയിരിക്കുന്നത്. ഫോണിന്റെ കനമോ ഭാരമോ വർധിപ്പിക്കാതെയാണ് വലിയ ബാറ്ററി ഇതിൽ ഉൾപ്പെടുത്തിയത്.

ഗ്യാലക്സി S27 അൾട്രാ, S27 പ്രോ എന്നീ ഫോണുകളുടെ ബാറ്ററി ശേഷി വർധിപ്പിക്കുന്നതിനായി സാംസങ് സിലിക്കൺ-കാർബൺ ആനോഡ് സെല്ലുകൾ തന്നെയായിരിക്കും വീണ്ടും ഉപയോഗിക്കുക. ഫ്ലാഗ്ഷിപ്പ് ഫോണുകളിൽ ഒരേ 5,000mAh ബാറ്ററി കപ്പാസിറ്റി വർഷങ്ങളായി തുടർന്നുപോന്ന കമ്പനിയുടെ ഈ പുതിയ മാറ്റം ഉപയോക്താക്കൾക്ക് ഏറെ ആശ്വാസകരമാകും.

മറ്റ് പ്രമുഖ ആൻഡ്രോയിഡ് ഫ്ലാഗ്ഷിപ്പ് ഫോണുകൾ ഇപ്പോൾ 6,000mAh അല്ലെങ്കിൽ അതിൽ കൂടുതലുള്ള ബാറ്ററികളോടെയാണ് വിപണിയിലെത്തുന്നത്. അതിനാൽ S27 അൾട്രായുടെ 5,534mAh ബാറ്ററി മറ്റ് ഫോണുകളുമായി പൂർണ്ണമായും ഒത്തുപോയില്ലെങ്കിലും, ഫോണിന്റെ ബാറ്ററി ലൈഫിൽ ഇത് വലിയ മുന്നേറ്റം ഉണ്ടാക്കും.

ചെറിയ ശരീരത്തിൽ മികച്ച ബാറ്ററി ബാക്ക്അപ്പ് നൽകാൻ കഴിയുമെങ്കിൽ ഗ്യാലക്സി S27 പ്രോ മോഡലിനും ഈ മാറ്റം ഏറെ ഗുണം ചെയ്യും. അടിസ്ഥാന മോഡലുകളായ ഗ്യാലക്സി S27, S27+ എന്നിവയിൽ വലിയ ബാറ്ററികൾ ഉൾപ്പെടുത്തുമോ എന്ന കാര്യത്തിൽ ഇതുവരെ ഔദ്യോഗിക വ്യക്തത വന്നിട്ടില്ല.