ക്വീൻസിൽ അഞ്ചു വയസ്സുകാരിയായ മകൾ കൊല്ലപ്പെട്ടു; ദുരന്തത്തിൽ തകർന്ന് ഇന്ത്യൻ വംശജനായ ഊബർ ഡ്രൈവർ

ന്യൂയോർക്കിലെ ക്വീൻസിൽ അഞ്ചു വയസ്സുകാരിയായ മകൾ കൊലചെയ്യപ്പെട്ട സംഭവത്തിൽ കടുത്ത മനോവിഷമത്തിൽ ഇന്ത്യൻ വംശജനായ ഊബർ ഡ്രൈവർ.

ഒക്ടോബർ 14 -നാണ് ന്യൂയോർക്കിലെ സൗത്ത് റിച്ച്‌മണ്ട് ഹില്ലിൽ കുൽദീപ് സിംഗ് എന്നയാളുടെ മകൾ ഫാബിയാന കബെല്ലോയെ ദാരുണമായ സാഹചര്യത്തിൽ മരിച്ച നിലയിൽ കണ്ടെത്തിയത്. ഈ ക്രൂരകൃത്യത്തിൽ കുട്ടിയുടെ അമ്മയും കുൽദീപ് സിംഗിന്റെ ഭാര്യയുമായ ഫ്രാൻസിസ് കബെല്ലോയെ പൊലീസ് ഇതിനോടകം അറസ്റ്റ് ചെയ്തിട്ടുണ്ട്.

പ്രതിക്കെതിരെ രണ്ടാം ഡിഗ്രി കൊലക്കുറ്റമാണ് ചുമത്തിയിരിക്കുന്നത്. ഒക്ടോബർ 14 -ന് വൈകുന്നേരം 6.55 -ഓടെ സൗത്ത് റിച്ച്‌മണ്ട് ഹില്ലിലെ വസതിയിൽ നിന്നും അടിയന്തര സഹായം തേടി പൊലീസിന് സന്ദേശം ലഭിക്കുകയായിരുന്നു.

ഉടൻ തന്നെ സ്ഥലത്തെത്തിയ ഉദ്യോഗസ്ഥർ ഗുരുതരാവസ്ഥയിൽ ബോധരഹിതയായി കിടന്ന കുട്ടിയെ ജമൈക ഹോസ്പിറ്റൽ മെഡിക്കൽ സെന്ററിൽ എത്തിച്ചെങ്കിലും ജീവൻ രക്ഷിക്കാനായില്ല. താൻ തന്നെയാണ് മകളെ കൊലപ്പെടുത്തിയതെന്ന് വ്യക്തമാക്കി കുഞ്ഞിന്റെ അമ്മ നേരിട്ട് 911-ൽ വിളിച്ച് വിവരം അറിയിക്കുകയായിരുന്നു.

തുടർന്ന് ഒക്ടോബർ 15 -നാണ് ഫ്രാൻസിസ് കബെല്ലോയെ പൊലീസ് പിടികൂടിയത്. ഒക്ടോബർ 14 -ന് വൈകുന്നേരം 5.30 -നും 6.55 -നും ഇടയിലുള്ള സമയത്താണ് ഈ ദാരുണ സംഭവം അരങ്ങേറിയതെന്നാണ് പ്രാഥമിക അന്വേഷണത്തിൽ വ്യക്തമാകുന്നത്.

കുട്ടിയുടെ മരണത്തിന്റെ കൃത്യമായ കാരണം എന്താണെന്ന് പോസ്റ്റ്‌മോർട്ടം നടത്തുന്ന മെഡിക്കൽ എക്സാമിനർ ഓഫീസിന്റെ ഔദ്യോഗിക റിപ്പോർട്ട് പുറത്തുവന്നതിനു ശേഷമേ പറയാനാകൂ. കൊലപാതകത്തിലേക്ക് നയിച്ച യഥാർത്ഥ കാരണം ഇതുവരെയും പുറത്തുവിട്ടിട്ടില്ല.

പ്രിയപ്പെട്ട മകളുടെ അന്ത്യകർമ്മങ്ങൾക്കും സംസ്കാരച്ചടങ്ങുകൾക്കുമായി ഊബർ ഡ്രൈവറായ കുൽദീപ് സിംഗ് ‘ഗോഫണ്ട്മീ’ പ്ലാറ്റ്‌ഫോം വഴി പൊതുജനങ്ങളുടെ ധനസഹായം അഭ്യർത്ഥിച്ചിട്ടുണ്ട്.

വാടക കാർ ഓടിച്ചു ലഭിക്കുന്ന പരിമിതമായ വരുമാനം കൊണ്ട് മാത്രം ജീവിക്കുന്ന തനിക്ക് ഉയർന്ന തോതിലുള്ള സംസ്കാരച്ചടങ്ങുകളുടെ ചെലവുകൾ ഒറ്റയ്ക്ക് താങ്ങാൻ സാധിക്കില്ലെന്നും, ഈ ദുഘടഘട്ടത്തിൽ എല്ലാവരുടെയും കനിവറഞ്ഞുള്ള സഹായം വേണമെന്നും അദ്ദേഹം അഭ്യർത്ഥിച്ചു. “അവളെ ഞാനൊരുപാട് സ്നേഹിക്കുന്നു, അവളെ നഷ്ടപ്പെട്ടതോടെ ഈ ലോകമാകെ നഷ്ടപ്പെട്ടതുപോലെയാണ് എനിക്ക് തോന്നുന്നത്” എന്ന് അദ്ദേഹം വേദനയോടെ മാധ്യമങ്ങളോട് പറഞ്ഞു.

ഈ ദുരന്തം നേരിടാൻ 22,000 ഡോളർ ലക്ഷ്യമിട്ട് ആരംഭിച്ച ധനസഹായ ക്യാമ്പെയ്നിലൂടെ ഇതിനോടകം തന്നെ 18,540 ഡോളറിലധികം സമാഹരിക്കാൻ സാധിച്ചിട്ടുണ്ട്.