ഇന്റർനെറ്റിൽ ലഭ്യമായ വിവരങ്ങൾ പിന്നീട് കാണാനായി സേവ് ചെയ്തു വെക്കുന്ന ശീലം ഉപയോക്താക്കൾക്കിടയിൽ വ്യാപകമാണ്. എന്നാൽ, കഴിഞ്ഞ ആഴ്ചകളിൽ യൂട്യൂബിലെ ‘വാച്ച് ലേറ്റർ’ (Watch Later) പ്ലേലിസ്റ്റുകൾ അപ്രത്യക്ഷമായത് വലിയ ആശങ്കയ്ക്ക് വഴിവെച്ചിരുന്നു.
ഈ സാങ്കേതിക തകരാറാണ് ഇപ്പോൾ പൂർണ്ണമായി പരിഹരിച്ചിരിക്കുന്നത്. കഴിഞ്ഞ മാസം പകുതിയോടെയാണ് ഉപയോക്താക്കളിൽ ആശങ്ക പരത്തിക്കൊണ്ട് പ്രശ്നങ്ങളുടെ തുടക്കം.
യൂട്യൂബ് ഫോറത്തിൽ പ്രത്യക്ഷപ്പെട്ട ഒരു പോസ്റ്റിൽ, “എന്റെ വാച്ച് ലേറ്റർ പ്ലേലിസ്റ്റിലെ എല്ലാ വീഡിയോകളും അപ്രത്യക്ഷമായിരിക്കുന്നു” എന്ന് ഒരു ഉപയോക്താവ് പരാതിപ്പെട്ടിരുന്നു.
സമാനമായ പ്രശ്നം മറ്റു പലരെയും ബാധിച്ചതോടെ, തങ്ങൾ ഒറ്റയ്ക്കല്ലെന്ന് തിരിച്ചറിഞ്ഞ് ഉപയോക്താക്കൾ റെഡ്ഡിറ്റ് (Reddit) അടക്കമുള്ള മറ്റ് ഓൺലൈൻ ഫോറങ്ങളിലേക്ക് ആശങ്കകളുമായി എത്തി. പ്ലേലിസ്റ്റിലെ വീഡിയോകൾ പൂർണ്ണമായി നഷ്ടപ്പെടുന്നത് മുതൽ, ഒരു ഭാഗം മാത്രം കാണാൻ സാധിക്കുന്നത് വരെയുള്ള വിവിധ തരത്തിലുള്ള തകരാറുകളാണ് ഉപയോക്താക്കൾക്ക് നേരിടേണ്ടി വന്നത്.
ഒടുവിൽ പ്രശ്നത്തിന് പരിഹാരമായിരിക്കുകയാണ്. തകരാർ പരിഹരിച്ച വിവരം യൂട്യൂബ് ഔദ്യോഗിക ഫോറത്തിലൂടെ അറിയിച്ചു.
“ഈ പ്രശ്നം ഇപ്പോൾ പരിഹരിച്ചുവെന്ന വിവരം സന്തോഷത്തോടെ അറിയിക്കുന്നു! യൂട്യൂബ് ആപ്പിലെ വാച്ച് ലേറ്റർ ഉൾപ്പെടെയുള്ള നിങ്ങളുടെ എല്ലാ പ്ലേലിസ്റ്റുകളിലെയും വീഡിയോകൾ ഇനി മുതൽ വീണ്ടും ശരിയായി ദൃശ്യമാകും,” എന്ന് കമ്പനി വ്യക്തമാക്കി.
എന്നാൽ, സാങ്കേതിക തകരാറിന് കാരണമെന്താണെന്നതു സംബന്ധിച്ച് ഔദ്യോഗിക വിശദീകരണം നൽകാൻ യൂട്യൂബ് തയ്യാറായിട്ടില്ല.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
