വിവിധ റവന്യു ഓഫിസുകൾ ഒരുകുടക്കീഴിൽ കൊണ്ടുവരുന്നതിന്റെ ഭാഗമായി ചെങ്ങന്നൂരിൽ 22.12 കോടി രൂപ ചെലവിൽ പുതിയ റവന്യു ടവറിന്റെ നിർമ്മാണ പ്രവർത്തനങ്ങൾ പുരോഗമിക്കുന്നു. 1956 മുതൽ പഴയ താലൂക്ക് ഓഫിസ് പ്രവർത്തിച്ചിരുന്ന 40 സെന്റ് സ്ഥലത്താണ് ഈ ആധുനിക മന്ദിരം ഉയരുന്നത്.
കഴിഞ്ഞ ഓഗസ്റ്റിൽ നിർമാണോദ്ഘാടനം നിർവഹിച്ചെങ്കിലും, മണ്ണുപരിശോധനയ്ക്കു ശേഷമുള്ള പ്രധാന നിർമ്മാണ ജോലികൾ അടുത്തിടെയാണ് ആരംഭിച്ചത്. ആകെ 5261.95 ചതുരശ്ര മീറ്റർ വിസ്തീർണത്തിൽ അഞ്ച് നിലകളിലായാണ് പദ്ധതി വിഭാവനം ചെയ്തിരിക്കുന്നത്.
സജി ചെറിയാൻ എംഎൽഎയുടെ നിരന്തരമായ ഇടപെടലുകളെ തുടർന്ന് മുൻ സർക്കാരാണ് ഇതിനായി 21 കോടി രൂപ വകയിരുത്തിയത്. പുതിയ ടവർ യാഥാർത്ഥ്യമാകുന്നതോടെ ആർഡിഒ ഓഫിസ്, താലൂക്ക് ഓഫിസ്, വില്ലേജ് ഓഫിസ്, സബ് റജിസ്ട്രാർ ഓഫിസ് എന്നിവയെല്ലാം ഒരേ കെട്ടിടത്തിൽ പ്രവർത്തനക്ഷമമാകും.
നിലവിൽ കാലപ്പഴക്കം ചെന്ന കെട്ടിടത്തിലാണ് സബ് റജിസ്ട്രാർ ഓഫിസ് പ്രവർത്തിക്കുന്നത്. നിർമ്മാണ പ്രവർത്തനങ്ങൾ നടക്കുന്നതിനാൽ താലൂക്ക് ഓഫിസ് തൽക്കാലത്തേക്ക് നഗരത്തിലെ വാടകക്കെട്ടിടത്തിലേക്കു മാറ്റിയിട്ടുണ്ട്.
നിർദിഷ്ട റവന്യു ടവറിനു സമീപത്തായി മുപ്പതിലേറെ സർക്കാർ ഓഫിസുകൾ പ്രവർത്തിക്കുന്ന മിനി സിവിൽ സ്റ്റേഷൻ സ്ഥിതി ചെയ്യുന്നുണ്ട്.
ഇതിനു സമീപം ഫയർസ്റ്റേഷന് എതിർവശത്തായാണ് നഗരസഭ ഓഫിസ് നിർമിക്കാൻ ലക്ഷ്യമിട്ടിരിക്കുന്നത്. പദ്ധതി പൂർത്തിയാകുന്നതോടെ ജനങ്ങൾക്ക് ഒരിടത്തുതന്നെ വിവിധ സർക്കാർ സേവനങ്ങൾ ലഭ്യമാകും.
പുതിയ കെട്ടിടത്തിന്റെ താഴത്തെ നിലയിൽ പാർക്കിങ് സൗകര്യം, ലോബി, ഇലക്ട്രോണിക് വോട്ടിങ് മെഷീൻ സൂക്ഷിക്കുന്നതിനുള്ള സ്ഥലം എന്നിവ സജ്ജീകരിച്ചിട്ടുണ്ട്. ഒന്നാം നിലയിൽ റജിസ്ട്രേഷൻ ഓഫിസും വില്ലേജ് ഓഫിസും, രണ്ടാം നിലയിൽ താലൂക്ക് ഓഫിസും ഇലക്ഷൻ വിഭാഗവും പ്രവർത്തിക്കും.
മൂന്നാം നിലയിലാണ് ആർഡിഒ ഓഫിസും കോൺഫറൻസ് റൂമും ഉൾപ്പെടുത്തിയിരിക്കുന്നത്. നാലാമത്തെ നിലയിൽ ഡിസാസ്റ്റർ മാനേജ്മെന്റ് ഓഫിസ്, കോൺഫറൻസ് ഹാൾ, റിക്രിയേഷൻ ഏരിയ എന്നിവയും ഒരുക്കിയിട്ടുണ്ട്.
ഇതിനുപുറമെ, വരൾച്ച, ഭൂമികുലുക്കം, തീപിടിത്തം തുടങ്ങിയ അടിയന്തര പ്രകൃതി ദുരന്ത ഘട്ടങ്ങളിൽ ഉപയോഗിക്കേണ്ട രക്ഷാപ്രവർത്തന ഉപകരണങ്ങൾ സൂക്ഷിക്കുന്നതിനുള്ള സംവിധാനങ്ങൾ, ആധുനിക രീതിയിലുള്ള റിക്കാർഡ് റൂം, സ്ട്രോങ്ങ് റൂം, ട്രെയ്നിങ് ഹാൾ, കഫറ്റീരിയ, ഉദ്യോഗസ്ഥർക്കുള്ള വിശ്രമമുറി എന്നിവയും ഈ ടവറിന്റെ പ്രത്യേകതകളാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
