വീര്യം കുറഞ്ഞ മദ്യാനുമതി: സർക്കാരിന്റെ വാദങ്ങൾ പൊളിയുന്നു, രേഖകൾ പുറത്ത്

സംസ്ഥാനത്ത് വീര്യം കുറഞ്ഞ മദ്യം വിൽക്കാൻ അനുമതി നൽകിയതുമായി ബന്ധപ്പെട്ട് ഉയർന്ന വിവാദങ്ങളിൽ സർക്കാർ നൽകിയ വിശദീകരണങ്ങൾ വസ്തുതാവിരുദ്ധമാണെന്ന് രേഖകൾ തെളിയിക്കുന്നു. പഴങ്ങളും പച്ചക്കറികളും ധാന്യങ്ങളും ഉപയോഗിച്ച് നിർമിക്കുന്ന ലഘു മദ്യങ്ങൾക്ക് അനുമതി നൽകാനാണ് ആലോചിച്ചതെന്നായിരുന്നു സിപിഎമ്മിന്റെ വാദം.

എന്നാൽ, ഈ വാദത്തിന് വിരുദ്ധമായ വിവരങ്ങളാണ് പുറത്തുവന്നിരിക്കുന്നത്. ബക്കാഡി, എസ്ഡിഎഫ് ഇൻഡസ്ട്രീസ് എന്നീ കമ്പനികൾ മുൻ സർക്കാരിന് സമർപ്പിച്ച അപേക്ഷകളിൽ പഴങ്ങളുടെ അംശമില്ലാത്തതും, ഈഥൈൽ ആൽക്കഹോൾ അടങ്ങിയതുമായ മദ്യം വിൽക്കാൻ അനുമതി തേടിയിരുന്നതായി വ്യക്തമാണ്.

വിദേശത്ത് നിന്ന് സ്പിരിറ്റ് ഇറക്കുമതി ചെയ്ത് മദ്യം ഉൽപാദിപ്പിക്കുകയായിരുന്നു ഇതിന്റെ ലക്ഷ്യം. ഈ വസ്തുതകൾ അറിഞ്ഞുകൊണ്ടുതന്നെയാണ് മുൻ സർക്കാർ ഇതിന് പച്ചക്കൊടി കാണിച്ചത്.

ബക്കാഡി ബ്രീസറിൽ 4.8 ശതമാനവും, ബക്കാഡി പ്ലസിൽ 8 ശതമാനവും ഈഥൈൽ ആൽക്കഹോൾ അടങ്ങിയിട്ടുണ്ടെന്ന് കമ്പനി വ്യക്തമാക്കിയതാണ്. എസ്ഡിഎഫ് ഇൻഡസ്ട്രീസിന്റെ ഉൽപന്നങ്ങളിൽ 10 മുതൽ 20 ശതമാനം വരെ ആൽക്കഹോൾ അടങ്ങിയിട്ടുണ്ട്.

ഇവയിൽ പഴങ്ങൾക്കു പകരം ഫ്ലേവറുകളാണ് ചേർക്കുന്നത്. ഇക്കാര്യം എക്സൈസ് കമ്മിഷണർ നേരത്തെ തന്നെ സർക്കാരിന്റെ ശ്രദ്ധയിൽപ്പെടുത്തിയിരുന്നു.

എന്നിട്ടും, എക്സൈസ് മന്ത്രിയായിരുന്ന എം.വി. ഗോവിന്ദന്റെ കാലയളവിൽ ഇത്തരം മദ്യങ്ങൾക്ക് വ്യക്തമായ നിർവചനം നൽകി റിപ്പോർട്ട് സമർപ്പിക്കാൻ നിർദേശം നൽകി.

2018-ൽ എക്സൈസ് കമ്മിഷണറായിരുന്ന ഋഷിരാജ് സിങ്, വീര്യം കുറഞ്ഞ മദ്യം സ്കൂൾ വിദ്യാർത്ഥികളടക്കമുള്ളവർ ശീതളപാനീയമായി തെറ്റിദ്ധരിച്ച് ഉപയോഗിക്കാൻ സാധ്യതയുണ്ടെന്ന് സർക്കാരിന് മുന്നറിയിപ്പ് നൽകിയിരുന്നു. ഇത് അവഗണിച്ചുകൊണ്ട് രണ്ടാം പിണറായി സർക്കാരിലെ രണ്ട് എക്സൈസ് മന്ത്രിമാർ വിവിധ ഘട്ടങ്ങളിലായി ഇതിന് അംഗീകാരം നൽകുകയായിരുന്നു.

പ്രതിപക്ഷ നേതാവ് വി.ഡി. സതീശൻ നിയമസഭയിൽ ഉന്നയിച്ചതുപോലെ, തിരഞ്ഞെടുപ്പ് കാലമായതുകൊണ്ടാണ് നികുതി ഘടന നിശ്ചയിക്കാതിരുന്നത് എന്ന വാദവും നിലനിൽക്കുന്നില്ല.

യഥാർത്ഥത്തിൽ മന്ത്രിമാർക്കിടയിലുണ്ടായ അഭിപ്രായവ്യത്യാസമാണ് ഇതിന് തടസ്സമായതെന്നാണ് സൂചന. വീര്യം കുറഞ്ഞ മദ്യം വിപണിയിലെത്തിയാൽ ഉയർന്ന അളവിൽ ആൽക്കഹോളുള്ള മദ്യത്തിന്റെ വിൽപന കുറയുമെന്നും, തൽഫലമായി നികുതി വരുമാനത്തിൽ വലിയ ഇടിവുണ്ടാകുമെന്നുമുള്ള ധനമന്ത്രിയുടെ ആശങ്കയും ഇതിന് പിന്നിലുണ്ട്.