കേന്ദ്രമന്ത്രിസഭാ പുനഃസംഘടനയ്ക്ക് കളമൊരുങ്ങുന്നു; അഴിച്ചുപണിക്ക് സാധ്യത

കേന്ദ്രസർക്കാരിന്റെ മൂന്നാം ഊഴത്തിൽ സുപ്രധാനമായ മന്ത്രിസഭാ പുനഃസംഘടനയ്ക്ക് വഴിയൊരുങ്ങുന്നു. അടുത്തയാഴ്ചയോടെ മന്ത്രിസഭയിൽ സമഗ്രമായ മാറ്റങ്ങൾ ഉണ്ടായേക്കുമെന്നാണ് ദേശീയ തലസ്ഥാനത്ത് നിന്നുള്ള സൂചനകൾ.

ഇതുമായി ബന്ധപ്പെട്ട രാഷ്ട്രീയ നീക്കങ്ങൾ ഇതിനകം തന്നെ സജീവമായിക്കഴിഞ്ഞു.

ആഭ്യന്തര മന്ത്രി അമിത് ഷാ കഴിഞ്ഞ ദിവസം രാഷ്ട്രപതി ദ്രൗപദി മുർമുവിനെ സന്ദർശിച്ചത് പുനഃസംഘടനയുടെ ഭാഗമായുള്ള ചർച്ചകളുടെ ഭാഗമായാണെന്നാണ് രാഷ്ട്രീയ വൃത്തങ്ങൾ വിലയിരുത്തുന്നത്. വരാനിരിക്കുന്ന സംസ്ഥാന നിയമസഭാ തിരഞ്ഞെടുപ്പുകളും പാർട്ടിയുടെ തന്ത്രപരമായ ലക്ഷ്യങ്ങളും മുൻനിർത്തി നിർണ്ണായകമായ അഴിച്ചുപണിക്കാണ് ബിജെപി തയ്യാറെടുക്കുന്നത്.

ഇതിന്റെ ഭാഗമായി ധനമന്ത്രി നിർമല സീതാരാമൻ ഉൾപ്പെടെയുള്ള പ്രമുഖ നേതാക്കൾ മന്ത്രിസഭയിൽ നിന്ന് പുറത്തായേക്കുമെന്ന വിവരങ്ങൾ പുറത്തുവരുന്നുണ്ട്. ഭരണതലത്തിലും സാമ്പത്തിക മേഖലയിലും വലിയ മാറ്റങ്ങൾ ലക്ഷ്യമിട്ട്, നിലവിലെ പ്രധാനമന്ത്രിയുടെ പ്രിൻസിപ്പൽ സെക്രട്ടറിയും മുൻ ആർബിഐ ഗവർണറുമായ ശക്തികാന്ത ദാസിനെ മന്ത്രിസഭയിൽ ഉൾപ്പെടുത്തുന്നതിനെക്കുറിച്ച് ആലോചനകളുണ്ട്.

സാമ്പത്തിക മേഖലയിലെ അദ്ദേഹത്തിന്റെ അറിവ് പ്രയോജനപ്പെടുത്തുന്നതിനായി സുപ്രധാന വകുപ്പ് തന്നെ നൽകിയേക്കും. നിലവിൽ മന്ത്രിമാരായ ധർമ്മേന്ദ്ര പ്രധാൻ, ഹർദീപ് സിംഗ് പുരി എന്നിവർക്ക് സ്ഥാനം നഷ്ടമായേക്കുമെന്നും, ഇവരെ പാർട്ടി സംഘടന ചുമതലകളിലേക്ക് മാറ്റിയേക്കുമെന്നും റിപ്പോർട്ടുകളുണ്ട്.

അതേസമയം, മുൻ കേന്ദ്രമന്ത്രി അനുരാഗ് ഠാക്കൂർ യുവനേതൃത്വത്തിന്റെ പ്രതിനിധിയായി വീണ്ടും മന്ത്രിസഭയിലേക്ക് തിരിച്ചെത്തുമെന്നാണ് സൂചന. സഖ്യകക്ഷികൾക്കും മന്ത്രിസഭയിൽ അർഹമായ പ്രാതിനിധ്യം നൽകാൻ ആലോചനയുണ്ട്.

മഹാരാഷ്ട്രയിലെ രാഷ്ട്രീയ സാഹചര്യങ്ങൾ കണക്കിലെടുത്ത് ശിവസേന ഷിൻഡെ വിഭാഗം നേതാവ് ശ്രീകാന്ത് ഷിൻഡെ മന്ത്രിസഭയുടെ ഭാഗമായേക്കാം. കൂടാതെ, ആം ആദ്മി പാർട്ടി വിട്ട് ബിജെപിയിൽ ചേർന്ന രാഘവ് ചദ്ദ, അശോക് മിത്തൽ എന്നിവരെയും പരിഗണിക്കുന്നുണ്ട്.

പഞ്ചാബിലെയും ഡൽഹിയിലെയും രാഷ്ട്രീയ നീക്കങ്ങളിൽ മുൻതൂക്കം നേടാൻ ഈ തീരുമാനം സഹായിക്കുമെന്നാണ് വിലയിരുത്തൽ. അടുത്ത ദിവസങ്ങളിൽ തന്നെ മന്ത്രിമാരുടെ അന്തിമ പട്ടിക പുറത്തുവരുമെന്നാണ് കരുതപ്പെടുന്നത്.