കർണാടകയിൽ നേതൃമാറ്റ ചർച്ചകൾ മുറുകുന്നു: കരുനീക്കങ്ങളുമായി സിദ്ധരാമയ്യയും ഡി.കെ. ശിവകുമാറും ദില്ലിയിൽ

കർണാടക രാഷ്ട്രീയത്തിൽ നിർണായകമായ നേതൃമാറ്റ ചർച്ചകൾ സജീവമായതോടെ, സംസ്ഥാന കോൺഗ്രസിലെ അധികാര തർക്കങ്ങൾ ദില്ലിയിലേക്ക് നീങ്ങുന്നു. മുഖ്യമന്ത്രി പദവിയിൽ തുടരുന്നതിനെച്ചൊല്ലിയുള്ള അവ്യക്തതകൾക്കിടയിൽ, തന്റെ നിലപാട് ശക്തമാക്കാൻ സിദ്ധരാമയ്യ നേരിട്ട് ഇടപെടലുകൾ ആരംഭിച്ചു.

നിലവിലെ സാഹചര്യത്തിൽ, മുഖ്യമന്ത്രി പദത്തിലേക്ക് ഉപമുഖ്യമന്ത്രി ഡി.കെ. ശിവകുമാർ എത്തുന്നത് തടയാൻ തന്ത്രപരമായ നീക്കമാണ് അദ്ദേഹം നടത്തുന്നത്.

ഇതിന്റെ ഭാഗമായി ദില്ലിയിൽ നടക്കുന്ന ഹൈക്കമാൻഡ് ചർച്ചകളിൽ ജി. പരമേശ്വരയെയും കൂടെക്കൂട്ടിയാണ് സിദ്ധരാമയ്യ തന്റെ കരുനീക്കങ്ങൾ നടത്തുന്നത്.

ഹൈക്കമാൻഡ് തന്നോട് സ്ഥാനമൊഴിയാൻ ആവശ്യപ്പെടുന്ന സാഹചര്യമുണ്ടായാൽ, പകരം ജി. പരമേശ്വരയെ മുഖ്യമന്ത്രി സ്ഥാനത്തേക്ക് നിർദ്ദേശിക്കാനാണ് സിദ്ധരാമയ്യയുടെ നീക്കം.

ദളിത് മുഖ്യമന്ത്രി എന്ന ആവശ്യം മുൻനിർത്തിക്കൊണ്ട് ഡി.കെ. ശിവകുമാർക്ക് ലഭിച്ചേക്കാവുന്ന മേൽക്കൈ മറികടക്കുകയാണ് ഈ നീക്കത്തിന്റെ ലക്ഷ്യം.

സർക്കാരിന്റെ മൂന്നാം വാർഷികത്തോട് അനുബന്ധിച്ച് നേതൃത്വത്തിൽ മാറ്റമുണ്ടാകുമെന്ന അഭ്യൂഹങ്ങൾ ശക്തമാണ്. രണ്ടര വർഷത്തിന് ശേഷം പദവി കൈമാറണമെന്ന ധാരണയുണ്ടായിരുന്നതായി ഡി.കെ.

ശിവകുമാർ പക്ഷം വാദിക്കുമ്പോൾ, താൻ അഞ്ചു വർഷം കാലാവധി പൂർത്തിയാക്കുമെന്നാണ് സിദ്ധരാമയ്യയുടെ നിലപാട്. എന്നാൽ, ഹൈക്കമാൻഡ് ആവശ്യപ്പെട്ടാൽ പദവി ഒഴിയാൻ താൻ തയ്യാറാണെന്ന് സിദ്ധരാമയ്യയോട് അടുത്ത വൃത്തങ്ങൾ സൂചിപ്പിക്കുന്നു.

നേതൃമാറ്റത്തിനൊപ്പം മന്ത്രിസഭയിൽ സമഗ്രമായ അഴിച്ചുപണി നടക്കാനുള്ള സാധ്യതകളും തെളിഞ്ഞുവരുന്നുണ്ട്. പാർട്ടിയിലെ മുതിർന്ന നേതാക്കളുടെ അതൃപ്തി പരിഹരിക്കുന്നതിനായി അവരെ മന്ത്രിസഭയിലേക്ക് കൊണ്ടുവരുന്നതും നേതൃത്വത്തിന്റെ പരിഗണനയിലുണ്ട്.

അതേസമയം, സർക്കാരിന്റെ ആഭ്യന്തര തർക്കങ്ങൾ സംസ്ഥാനത്തെ വികസന പ്രവർത്തനങ്ങളെ പ്രതികൂലമായി ബാധിച്ചിട്ടുണ്ടെന്ന് പ്രതിപക്ഷമായ ബി.ജെ.പി ആരോപിച്ചു. മുഖ്യമന്ത്രി സ്ഥാനത്തിനായി നടക്കുന്ന ഈ അധികാര തർക്കം ജനങ്ങളോടുള്ള വഞ്ചനയാണെന്നാണ് ബി.ജെ.പി നേതൃത്വത്തിന്റെ വിമർശനം.