ചിദംബരത്തിന്റെ ബാലൻ എന്ന ചിത്രത്തിന് വൻ പ്രശംസയുമായി സൂര്യയും ജ്യോതികയും

സംവിധായകൻ ചിദംബരം ഒരുക്കിയ ‘ബാലൻ- ദി ബോയ്’ എന്ന ചലച്ചിത്രം ആഗോളതലത്തിൽ സിനിമാ പ്രേമികളുടെയും നിരൂപകരുടെയും ശ്രദ്ധയാകർഷിച്ച് മുന്നേറുകയാണ്. ഈ വർഷം മലയാളത്തിൽ പുറത്തിറങ്ങിയ ഏറ്റവും മികച്ച ചിത്രങ്ങളിലൊന്നായി ഇതിനകം തന്നെ ഈ ചിത്രം വിലയിരുത്തപ്പെടുന്നു.

കേരളത്തിന് അകത്തും പുറത്തുമുള്ള ചലച്ചിത്ര പ്രവർത്തകർക്കിടയിൽ വലിയ ചർച്ചയാവുന്ന ഈ ചിത്രത്തെ പ്രശംസിച്ച് തമിഴ് സൂപ്പർതാരം സൂര്യയും നടിയായ ജ്യോതികയും രംഗത്തെത്തി. മലയാള സിനിമയിൽ നിന്ന് വീണ്ടുമൊരു ഗംഭീര ചലച്ചിത്രാനുഭവം എത്തിയിരിക്കുന്നു എന്നാണ് ഇരുവരും പറയുന്നത്.

“ബാലൻ കണ്ടു എന്നും, മഞ്ഞുമ്മൽ ബോയ്സിന് ശേഷം ഇതുപോലൊരു സിനിമ ചെയ്യാനുള്ള തീരുമാനം തന്നെ, ചിദംബരവും അദ്ദേഹത്തിന്റെ ടീമും നമ്മുക്ക് നൽകാൻ ആഗ്രഹിച്ചതിനെക്കുറിച്ച് എല്ലാം തുറന്നു കാണിക്കുന്നുണ്ടെന്നും സൂര്യ സോഷ്യൽ മീഡിയയിൽ കുറിച്ചു. ഈ ചിത്രം മലയാള വ്യവസായത്തിൽ നിന്നുള്ള മറ്റൊരു മികച്ച സിനിമാനുഭവമാണ് എന്നും, ജിത്തു മാധവൻ രചിച്ച ഈ അതുല്യമായ കഥയുമായി മുന്നോട്ട് നീങ്ങിയതിന് സംവിധായകനോട് വലിയ ബഹുമാനം ഉണ്ടെന്നും സൂര്യ പറയുന്നു.

പുതുമുഖ അഭിനേതാക്കളായ ഫർസാന പാലത്തിങ്കൽ, ആദിശേഷൻ, മുഹമ്മദ് സിനാൻ എന്നിവരെ പൂർണ്ണമായി വിശ്വസിച്ചതും, അബ്ബാസ് ആയി ടോവിനോ തോമസ് എന്ന നടനെ മികച്ച രീതിയിൽ ഉപയോഗിച്ചതും, പ്രവചനാതീതമായ രീതിയിൽ ചിത്രത്തിന്റെ കഥ പറയുകയും ചെയ്തതാണ് ബാലന്റെ ഹൈലൈറ്റുകൾ എന്നും സൂര്യ കൂട്ടിച്ചേർത്തു. ഈ ചിത്രത്തിലെ അഭിനയം, തിരക്കഥ, ഛായാഗ്രഹണം, സുഷിൻ ഒരുക്കിയ സംഗീതം ആർട്ട്, സൗണ്ട് തുടങ്ങി എല്ലാം അതിശയിപ്പിക്കുന്നതാണെന്നും, ഈ പുതുമുഖങ്ങളുടെ അഭിനയം കണ്ടപ്പോൾ, തന്റെ കഴിവ് തനിക്ക് ഇനിയും മിനുക്കണം എന്നാണ് തോന്നിയത് എന്നും കുറിച്ചു കൊണ്ടാണ് സൂര്യ ഈ ചിത്രത്തിനും അണിയറ പ്രവർത്തകർക്കും അഭിനന്ദനം നൽകിയത്.” നടിയായ ജ്യോതികയും ചിത്രത്തെ വാനോളം പുകഴ്ത്തി.

“ചിദംബരം ഏറ്റവും മികച്ച രീതിയിൽ ഒരുക്കിയ ചിത്രമാണ് ബാലൻ എന്ന് ജ്യോതികയും ചിത്രം കണ്ടതിന് ശേഷം സമൂഹ മാധ്യമത്തിൽ കുറിച്ചു. സഹാനുഭൂതി, നിഗൂഢത, നിഷ്കളങ്കത, ക്രിമിനൽ സഹജാവബോധം എന്നിവ വളരെ സുഗമമായി സമന്വയിപ്പിക്കുന്ന ജീത്തു മാധവന്റെ കൗതുകകരവും നിരന്തരം ആശ്ചര്യപ്പെടുത്തുന്നതുമായ തിരക്കഥയും ഈ ചിത്രത്തെ ഒരു മാസ്റ്റർപീസ് ആക്കി മാറ്റിയെന്നും ജ്യോതിക പറഞ്ഞു.

സ്ത്രീത്വത്തിന്റെ ശക്തമായ ആൾരൂപത്തെ സ്ക്രീനിൽ പ്രദർശിപ്പിച്ച ഫർസാനയുടെ പ്രകടനം ഏറെ സന്തോഷം നൽകിയെന്ന് ജ്യോതിക പറഞ്ഞു. കണ്ണുകളിലെ നിഷ്കളങ്കതയും ആഴവും നേരിട്ട് കാഴ്ചക്കാരുടെ ഹൃദയത്തിലേക്ക് തുളച്ചുകയറുന്ന രീതിയിൽ അഭിനയിച്ച ആദിശേഷനും സിനാനും, ഒപ്പം വൃദ്ധ കഥാപാത്രത്തെ അവതരിപ്പിച്ച ഡോളി ജൂണിനും ജ്യോതിക അഭിനന്ദനം നൽകി.

ഡോളി ജൂണിന്റെ കഥാപാത്രം വളരെ പുതുമയുള്ളതും അതിൽ അവർ ഗംഭീര പ്രകടനവുമാണ് നൽകിയതെന്നും ജ്യോതിക എടുത്തു പറയുന്നു. ടോവിനോ തോമസ് തന്റെ ഏറ്റവും മികച്ച പ്രകടനങ്ങളിലൊന്ന് നല്കാൻ, തൻറെ സ്റ്റാർഡത്തിന്റെ ഭാരമെല്ലാം ഒഴിവാക്കിയെന്നും, സുഷിൻ ശ്യാമിന്റെ സംഗീതം ആദ്യ പകുതിയിൽ തങ്ങളെ ത്രസിപ്പിക്കുകയൂം രണ്ടാം പകുതിയിൽ ശരിയായ വൈകാരിക നിമിഷങ്ങളെ മാത്രം സ്പർശിക്കുകയും ചെയ്യുന്നു എന്നും ജ്യോതിക കുറിച്ചു.

ഷൈജു ഖാലിദിന്റെ ക്യാമറ വർക്കിൽ കാവ്യാത്മകമായ ക്ലോസപ്പുകളും പെയിന്റ് ചെയ്ത ഫ്രെയിമുകളും ഉള്ളതുപോലെയാണ് അനുഭവപെട്ടതെന്നും, ഇത് ഒരു സമ്പൂർണ്ണ വിഷ്വൽ ട്രീറ്റ് ആണെന്നും അവർ പറയുന്നു. ഈ വലിയ മോശം ലോകത്തിൽ നഷ്ടപ്പെടാൻ നിർബന്ധിതരായ മാതൃത്വത്തിന്റെയും നിഷ്കളങ്കതയുടെയും ഈ കഥ, തിയേറ്ററുകളിൽ നഷ്ടപ്പെടുത്തരുത് എന്നും പറഞ്ഞ ജ്യോതിക, അത്രയും മൂർച്ചയുള്ളതും ബുദ്ധിപരമായി ഒരുക്കിയതുമായ ഒരു ചിത്രമാണ് ബാലൻ എന്നും കൂട്ടിച്ചേർത്തു.” ഒരു അമ്മയുടെയും മകന്റെയും ജീവിതത്തെ ആസ്പദമാക്കി ഒരുക്കിയ ഈ ക്രൈം ഡ്രാമ ത്രില്ലർ ചിത്രം കാൻ ഫിലിം ഫെസ്റ്റിവലിന്റെ ഭാഗമായ മാർഷേ ഡു ഫിലിമിലും പ്രദർശിപ്പിക്കുകയും നിരൂപക പ്രശംസ നേടുകയും ചെയ്തിരുന്നു.

കെ വി എൻ പ്രൊഡക്ഷൻസ്, തെസ്പിയൻ ഫിലിംസ് എന്നിവയുടെ ബാനറിൽ വെങ്കട്ട് കെ നാരായണ, ശൈലജ ദേശായി ഫെൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.