വെനസ്വേലൻ എണ്ണപ്പാടങ്ങളിൽ നിക്ഷേപം വർധിപ്പിക്കാൻ ഒഎൻജിസി; യുഎസ് സർക്കാരിന്റെ അനുമതിക്കായി കാത്തിരിപ്പ്

യുഎസ് പ്രസിഡന്റ് ഡോണൾഡ് ട്രംപ് നയിക്കുന്ന ഭരണകൂടത്തിന്റെ ട്രഷറി വകുപ്പിന് മുന്നിൽ ഇന്ത്യയുടെ നിർണായകമായ ഒരു അപേക്ഷ സമർപ്പിക്കപ്പെട്ടു. യുഎസ് ഭരണകൂടം ഇതിന് പച്ചക്കൊടി കാണിച്ചാൽ ഇന്ത്യയെ സംബന്ധിച്ചിടത്തോളം ഇരട്ടി നേട്ടമാണ് പ്രതീക്ഷിക്കുന്നത്.

വെനസ്വേലയിലെ എണ്ണ ഉൽപാദന മേഖലയിൽ നിർണായക സാന്നിധ്യമാകാൻ ഇന്ത്യയ്ക്ക് സാധിക്കുമെന്നതാണ് ഒന്നാമത്തെ കാര്യം. രണ്ടാമതായി, വർഷങ്ങളായി കുടിശികയായി തുടരുന്ന 50 കോടി ഡോളർ (ഏകദേശം 4800 കോടി രൂപ) ലാഭവിഹിതം തിരിച്ചുകിട്ടുമെന്ന പ്രതീക്ഷയും ഇന്ത്യയ്ക്കുണ്ട്.

നിലവിൽ വെനസ്വേലൻ എണ്ണ വ്യവസായത്തിന്റെയും വിൽപനയുടെയും മേൽനോട്ടം നിർവഹിക്കുന്നത് അമേരിക്കയാണ്. നിക്കോളാസ് മഡുറോ യുഎസ് സൈന്യത്തിന്റെ പിടിയിലായി ജയിലിലായതോടെയാണ് ഈ നിയന്ത്രണം കർശനമായത്.

അതിനാൽ, യുഎസിന്റെ അനുമതിയില്ലാതെ ഒരു നിക്ഷേപ തീരുമാനവും കൈക്കൊള്ളാൻ ഇന്ത്യൻ കമ്പനികൾക്ക് സാധിക്കില്ല. വെനസ്വേലൻ പൊതുമേഖലാ എണ്ണക്കമ്പനിയായ പിഡിവിഎസ്എയുടെ രണ്ട് എണ്ണപ്പാടങ്ങളിലെ ഓഹരികൾ ഭാഗികമായോ പൂർണമായോ ഏറ്റെടുക്കാനാണ് ഇന്ത്യൻ പൊതുമേഖലാ സ്ഥാപനമായ ഓയിൽ ആൻഡ് നാച്ചുറൽ ഗ്യാസ് കോർപറേഷൻ (ഒഎൻജിസി) താൽപര്യം പ്രകടിപ്പിച്ചിരിക്കുന്നത്.

അമേരിക്കൻ ഉപരോധം മൂലം ദീർഘകാലമായി പ്രതിസന്ധിയിലായിരുന്ന വെനസ്വേലൻ ക്രൂഡോയിൽ വ്യവസായം ഇപ്പോൾ തിരിച്ചുവരവിന്റെ പാതയിലാണ്. വിദേശ കമ്പനികളുമായുള്ള സഹകരണത്തിലൂടെ ഉൽപാദനവും വരുമാനവും വർധിപ്പിക്കാനാണ് വെനസ്വേല ലക്ഷ്യമിടുന്നത്.

യുഎസിന്റെ മേൽനോട്ടത്തിൽ വെനസ്വേലൻ എണ്ണ വീണ്ടും വിപണിയിൽ എത്തുമ്പോൾ ഇന്ത്യയാണ് ഇതിന്റെ പ്രധാന ആവശ്യക്കാരിൽ ഒരാൾ. ഒഎൻജിസി വിദേശ് വഴിയാണ് വെനസ്വേലയിലെ നിക്ഷേപങ്ങൾ കൈകാര്യം ചെയ്യുന്നത്.

നിലവിൽ വെനസ്വേലയിലെ സാൻ ക്രിസ്റ്റോബൽ എണ്ണപ്പാടത്തിന്റെ 40 ശതമാനം ഓഹരികൾ ഒഎൻജിസി വിദേശിന്റെ കൈവശമാണ്. കൂടാതെ, കാരാബോബോ-1 എണ്ണപ്പാടത്തിൽ 11 ശതമാനം ഓഹരി പങ്കാളിത്തവും കമ്പനിക്കുണ്ട്.

ഇവിടെ ഇന്ത്യൻ ഓയിൽ കോർപറേഷനും ഓയിൽ ഇന്ത്യയ്ക്കും 3.5 ശതമാനം വീതം ഓഹരികളുണ്ട്. ഈ ഓഹരി പങ്കാളിത്തം വർധിപ്പിക്കാനാണ് ഒഎൻജിസി വിദേശ് ശ്രമിക്കുന്നത്.

ഇതുമായി ബന്ധപ്പെട്ട് 2024-ൽ യുഎസ് സർക്കാരിനോട് കമ്പനി ഉപരോധ ഇളവുകൾക്കായി അപേക്ഷിച്ചിരുന്നു. ഈ എണ്ണപ്പാടങ്ങളിൽ നിലവിൽ 12,000 മുതൽ 15,000 വരെ ബാരൽ എണ്ണയാണ് പ്രതിദിനം ഉൽപാദിപ്പിക്കുന്നത്.

ഒഎൻജിസി ഏറ്റെടുക്കൽ പൂർത്തിയായാൽ ഒരു വർഷത്തിനുള്ളിൽ ഇത് ഇരട്ടിയാക്കാനും തുടർവർഷങ്ങളിൽ 50,000 ബാരലിലേക്ക് ഉയർത്താനുമാണ് പദ്ധതി. കൂടാതെ, നിലവിൽ കുടിശികയുള്ള 50 കോടി ഡോളർ ലാഭവിഹിതം തിരിച്ചുപിടിക്കാനും ഓഹരി വർധന സഹായകമാകുമെന്ന് വിലയിരുത്തപ്പെടുന്നു.

യുഎസ് കമ്പനികൾക്ക് അടുത്തിടെ സമാനമായ രീതിയിൽ ഓഹരി പങ്കാളിത്തം വർധിപ്പിക്കാൻ ട്രംപ് ഭരണകൂടം അനുമതി നൽകിയിരുന്നു. ഇതേ മാതൃകയിൽ തങ്ങൾക്കും അനുകൂല തീരുമാനം ഉണ്ടാകുമെന്ന പ്രതീക്ഷയിലാണ് ഒഎൻജിസി വിദേശ്.