ഇറാനുമായുള്ള കരാറിൽ തിടുക്കമില്ലെന്ന് ഡോണൾഡ് ട്രംപ്; ഉപരോധം തുടരുമെന്ന് പ്രഖ്യാപനം

ഇറാനുമായുള്ള നയതന്ത്ര ചർച്ചകളിൽ തൽക്കാലം കരാർ ഒപ്പിടുന്നതിന് തിടുക്കമില്ലെന്ന് യുഎസ് പ്രസിഡന്റ് ഡോണൾഡ് ട്രംപ് വ്യക്തമാക്കി. വാഷിങ്ടനിൽ മാധ്യമങ്ങളോട് സംസാരിക്കവെയാണ് അദ്ദേഹം ഇക്കാര്യം അറിയിച്ചത്.

കരാർ അന്തിമമാകുന്നതുവരെ ഇറാനെതിരെ ഏർപ്പെടുത്തിയിട്ടുള്ള നാവിക ഉപരോധം കർശനമായി തുടരുമെന്നും അദ്ദേഹം കൂട്ടിച്ചേർത്തു. ഇരുരാജ്യങ്ങളും തമ്മിലുള്ള തർക്കവിഷയങ്ങളിൽ ധൃതിപിടിച്ചുള്ള തീരുമാനങ്ങൾ എടുക്കേണ്ടതില്ലെന്നും, തെറ്റുകൾ സംഭവിക്കാതിരിക്കാൻ ആവശ്യമായ സമയം ഇരുപക്ഷത്തിനും അനുവദിക്കുമെന്നും ഡോണൾഡ് ട്രംപ് വിശദീകരിച്ചു.

അതേസമയം, ഇറാനിലെ ചില കേന്ദ്രങ്ങൾ നൽകുന്ന സൂചനയനുസരിച്ച് ഇരുരാജ്യങ്ങളും തമ്മിലുള്ള ഭിന്നതകൾ പൂർണമായി പരിഹരിക്കപ്പെട്ടിട്ടില്ല. ഹോർമുസ് കടലിടുക്കുമായി ബന്ധപ്പെട്ട

തർക്കങ്ങളിൽ ധാരണയിലെത്തിയെന്ന് നേരത്തെ സാമൂഹിക മാധ്യമങ്ങളിലൂടെ സൂചന ലഭിച്ചിരുന്നെങ്കിലും, നിലവിലെ സാഹചര്യത്തിൽ കരാർ അന്തിമഘട്ടത്തിലേക്ക് എത്തിയിട്ടില്ലെന്നാണ് വിലയിരുത്തൽ. ഹോർമുസ് കടലിടുക്കിലെ കപ്പൽ ഗതാഗതത്തിന് ചുങ്കം ഏർപ്പെടുത്തില്ലെന്ന് ഇറാൻ സമ്മതിച്ചതായും, ഇതിനു പകരമായി എണ്ണവ്യാപാരത്തിന് മേലുള്ള ചില ഉപരോധങ്ങൾ പിൻവലിക്കാൻ യുഎസ് സന്നദ്ധമായതായും റിപ്പോർട്ടുകളുണ്ട്.

കൂടാതെ, ഭാവിയിൽ ഇറാന് മേൽ ആക്രമണം നടത്തില്ലെന്ന് കരടുധാരണാപത്രത്തിൽ ഉൾപ്പെടുത്തിയിട്ടുണ്ടെന്നും വിവരങ്ങൾ വ്യക്തമാക്കുന്നു. ഇതിനിടെ, ഹോർമുസ്‌ഗാൻ പ്രവിശ്യയിൽ ഇസ്രയേൽ സൈന്യത്തിന്റെ നിരീക്ഷണ ഡ്രോൺ ഇറാൻ സൈന്യം വെടിവച്ചിട്ട

സംഭവം മേഖലയിലെ സംഘർഷാവസ്ഥയ്ക്ക് ആക്കം കൂട്ടിയിട്ടുണ്ട്.