മൂന്നാം തലമുറ ഹ്യുണ്ടായി ക്രെറ്റ വിപ്ലവകരമായ മാറ്റങ്ങളിലേക്ക്; പുതിയ സാങ്കേതികവിദ്യകളുമായി വരുന്നു

ഇന്ത്യൻ വിപണിയിലെ എസ്‌യുവി നിരയിൽ തരംഗം സൃഷ്ടിച്ച ഹ്യുണ്ടായി ക്രെറ്റയുടെ മൂന്നാം തലമുറ മോഡലിന്റെ പണിപ്പുരയിലാണ് കമ്പനി. രൂപകൽപ്പനയിലും സാങ്കേതിക സവിശേഷതകളിലും വലിയ മാറ്റങ്ങളുമായാണ് പുതിയ പതിപ്പ് വിപണിയിലെത്തുന്നത്.

ഏറ്റവും പ്രധാനപ്പെട്ട മാറ്റം വാഹനത്തിൽ ഉൾപ്പെടുത്തിയിരിക്കുന്ന അത്യാധുനിക പ്ലിയോസ് കണക്റ്റ് സിസ്റ്റമാണ്.

സാങ്കേതിക മികവ്
നിലവിലെ ക്രെറ്റയിൽ 10.25 ഇഞ്ച് ഡിസ്‌പ്ലേയാണുള്ളതെങ്കിൽ, പുതിയ തലമുറയിൽ കൂടുതൽ മികച്ച ദൃശ്യാനുഭവം ഉറപ്പാക്കുന്ന സംവിധാനങ്ങളുണ്ടാകും. ഈ വർഷം മെയ് തുടക്കത്തിൽ ഹ്യുണ്ടായി ഔദ്യോഗികമായി പുറത്തിറക്കിയ പ്ലിയോസ് കണക്റ്റ് സിസ്റ്റം ആദ്യമായി ഉൾപ്പെടുത്തുന്നത് ഗ്രാൻഡിയർ സെഡാനിലാണ്.

സ്ലിം ഡ്രൈവർ ഡിസ്‌പ്ലേയും വലിയ ടച്ച്‌സ്‌ക്രീനും ഇതിന്റെ പ്രത്യേകതയാണ്. ഗ്രാൻഡിയർ സെഡാന് 17 ഇഞ്ച് ടച്ച്‌സ്‌ക്രീൻ ലഭിക്കുമെന്നതാണ് ശ്രദ്ധേയം.

മൂന്ന് ഭാഗങ്ങളായി തിരിച്ചിട്ടുള്ള സ്ക്രീൻ ഇൻഫർമേഷൻ, ആപ്പുകൾ, താഴെയുള്ള ബാർ എന്നിങ്ങനെ വേർതിരിച്ചിരിക്കുന്നു. 360-ഡിഗ്രി 3D സറൗണ്ട് വ്യൂ ഉൾപ്പെടെയുള്ള വിവരങ്ങൾ ഇതിൽ ലഭ്യമാകും.

കെ3 പ്ലാറ്റ്‌ഫോമും സുരക്ഷയും
രണ്ടാം തലമുറ കിയ സെൽറ്റോസുമായി പങ്കിടുന്ന K3 പ്ലാറ്റ്‌ഫോമിനെ അടിസ്ഥാനമാക്കിയായിരിക്കും മൂന്നാം തലമുറ ക്രെറ്റ നിർമ്മിക്കുക. ഇത് വാഹനത്തിന്റെ വലുപ്പം വർദ്ധിപ്പിക്കുകയും സുരക്ഷയിൽ കൂടുതൽ കരുത്ത് പകരുകയും ചെയ്യും.

ഇതൊരു അഡ്വാൻസ്ഡ് സോഫ്റ്റ്‌വെയർ-ഡിഫൈഡ് വെഹിക്കിൾ (SDV) കൂടിയായിരിക്കും. കൂടാതെ, OTA അപ്‌ഡേറ്റുകൾ വഴി സസ്‌പെൻഷൻ, പവർട്രെയിൻ ട്യൂണിംഗ് എന്നിവയിൽ മാറ്റങ്ങൾ വരുത്താനും സാധിക്കും.

എഞ്ചിൻ കരുത്ത്
വിപണിയിലെത്തുമ്പോൾ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.5 ലിറ്റർ ഡീസൽ, 1.5 ലിറ്റർ ടർബോചാർജ്ഡ് പെട്രോൾ എന്നിങ്ങനെ മൂന്ന് എൻജിൻ ഓപ്ഷനുകളിൽ മാനുവൽ, ഓട്ടോമാറ്റിക് ട്രാൻസ്മിഷനുകൾക്കൊപ്പം വാഹനം ലഭ്യമാകും. ഇതിനു പുറമെ റീജനറേറ്റീവ് ബ്രേക്കിംഗ് സംവിധാനത്തോടുകൂടിയ 1.5 ലിറ്റർ ഹൈബ്രിഡ് എഞ്ചിൻ ഭാവിയിൽ അവതരിപ്പിക്കാനും സാധ്യതയുണ്ട്.