35-ാം നിലയിൽ നിന്ന് വീണിട്ടും ജീവിതത്തിലേക്ക് തിരികെവന്ന ചൈനീസ് ഇൻഫ്ലുവൻസർ; അതിജീവനത്തിന്റെ കഥ വൈറലാകുന്നു

ഉയരത്തിൽ നിന്ന് വീണിട്ടും അത്ഭുതകരമായി ജീവിതത്തിലേക്ക് തിരിച്ചെത്തിയ ചൈനീസ് ഇൻഫ്ലുവൻസർ വാൻആൻആൻ-ന്റെ അതിജീവനഗാഥ സമൂഹ മാധ്യമങ്ങളിൽ ചർച്ചയാകുന്നു. 27 വയസ്സുകാരിയായ വാൻആൻആൻ, 17 മാസത്തെ നീണ്ട

ചികിത്സയ്ക്കും പുനരധിവാസ നടപടികൾക്കും ശേഷമാണ് വീണ്ടും പൊതുജീവിതത്തിലേക്ക് തിരിച്ചെത്തിയത്. അപകടവും ചികിത്സയും
2025 ജൂൺ 10-ന് ഹുനാൻ പ്രവിശ്യയിലെ ചാങ്ഷയിലുള്ള ഒരു ആഡംബര റെസിഡൻഷ്യൽ കോംപ്ലെക്സിലാണ് ഞെട്ടിപ്പിക്കുന്ന സംഭവം നടന്നത്.

പുലർച്ചെ 5 മണിയോടെ 35-ാം നിലയിൽ നിന്ന് താഴേക്ക് വീഴുകയായിരുന്നു. കൂടെയുണ്ടായിരുന്ന സുഹൃത്താണ് അധികൃതരെ വിവരമറിയിച്ചത്.

ഇവർ കെട്ടിടത്തിൽ നിന്ന് ബോധപൂർവ്വം ചാടിയതല്ലെന്നാണ് പ്രാഥമിക റിപ്പോർട്ടുകൾ വ്യക്തമാക്കുന്നത്. വീഴ്ചയിൽ ഗുരുതരമായി പരിക്കേറ്റ യുവതിയെ അടിയന്തര ശസ്ത്രക്രിയയ്ക്ക് വിധേയയാക്കി.

ഏകദേശം 14 മണിക്കൂർ നീണ്ട ശസ്ത്രക്രിയയ്ക്കൊടുവിൽ 50 ദിവസത്തോളം അവർ തീവ്രപരിചരണ വിഭാഗത്തിൽ തുടർന്നു.

ബോധം തെളിയുന്നതിന് മുൻപായി പത്തിലധികം ശസ്ത്രക്രിയകൾക്ക് വാൻആൻആൻ വിധേയയായെന്ന് റിപ്പോർട്ടുകൾ സൂചിപ്പിക്കുന്നു. കെട്ടിടത്തിന് താഴെയുണ്ടായിരുന്ന മരങ്ങളും സസ്യജാലങ്ങളും വീഴ്ചയുടെ ആഘാതം കുറയ്ക്കാൻ സഹായിച്ചു എന്നാണ് ഡോക്ടർമാരുടെ നിഗമനം.

എന്നാൽ, ചികിത്സയ്ക്കിടെ ഇവരുടെ വലതുകാൽ നഷ്ടപ്പെട്ടിരുന്നു. ബോധം തിരിച്ചുകിട്ടിയ ശേഷമാണ് കാൽ മുറിച്ചുമാറ്റിയ വിവരം അവർ അറിയുന്നത്.

തിരിച്ചുവരവ്
ആശുപത്രിവാസകാലത്ത് കടുത്ത ശാരീരിക വേദന, ഓർമക്കുറവ്, പേശികളുടെ ബലക്ഷയം തുടങ്ങിയ വലിയ വെല്ലുവിളികളെയാണ് വാൻആൻആൻ നേരിട്ടത്. വേദനസംഹാരികൾ ഒഴിവാക്കിയ ശേഷം ആദ്യ 48 മണിക്കൂറിൽ മൂന്ന് മണിക്കൂറിൽ താഴെ മാത്രമാണ് ഇവർക്ക് ഉറങ്ങാൻ സാധിച്ചത്.

ദീർഘകാലത്തെ ചികിത്സയ്ക്ക് ശേഷം ഇപ്പോൾ വീൽചെയറിന്റെ സഹായത്തോടെ പുറത്തിറങ്ങാൻ അവർ പ്രാപ്തയായിട്ടുണ്ട്. കൃത്രിമക്കാൽ ഘടിപ്പിക്കുന്നതിനുള്ള മുന്നൊരുക്കങ്ങളും നടക്കുന്നുണ്ട്.

2026 ഒക്ടോബർ 12-ന് പുറത്തുവിട്ട വീഡിയോയിലൂടെയാണ് വാൻആൻആൻ തന്റെ തിരിച്ചുവരവ് ലോകത്തെ അറിയിച്ചത്.

“കൈയിലുള്ളതിനെ വിലമതിക്കുക” എന്ന സന്ദേശം പങ്കുവെച്ച യുവതി, നഷ്ടപ്പെട്ട കാര്യങ്ങളിൽ മാത്രം ശ്രദ്ധിക്കാതെ ലഭ്യമായ ജീവിതത്തെ സ്നേഹിച്ച് മുന്നോട്ടുപോകാനാണ് ആഗ്രഹിക്കുന്നതെന്ന് വ്യക്തമാക്കി.