യുക്രെയ്ൻ തീരത്ത് ചരക്കുകപ്പലിനു നേരെയുണ്ടായ റഷ്യൻ ആക്രമണത്തിൽ ജീവൻ നഷ്ടപ്പെട്ട അഖിൽ ജോയൻ എന്ന ഇരുപത്താറുകുകാരന്റെ വേർപാട് മലയോര മേഖലയെയാകെ വലിയ ദുഃഖത്തിലാഴ്ത്തിയിരിക്കുകയാണ്.
വെള്ളരിക്കുണ്ട് എകെജി നഗറിലെ വാളിപ്ലാക്കൽ വീട്ടിDലെ അംഗമായ അഖിൽ, ആഫ്രിക്കൻ രാജ്യമായ ഗിനി ബസായുടെ പതാകയേന്തി ഒഡേസ തുറമുഖത്തിന് സമീപം സർവീസ് നടത്തുകയായിരുന്ന മുംബൈ കമ്പനിയുടെ എംവി ഗോൾഡൻ ലിയോ എന്ന കപ്പലിൽ ചീഫ് ഓഫിസറായി സേവനം അനുഷ്ഠിക്കുകയായിരുന്നു. കഴിഞ്ഞ ദിവസമാണ് കപ്പലിനുനേരെ മിസൈൽ പതിച്ചത്.
കുടുംബത്തിന്റെ ദുഃഖത്തിൽ പങ്കുചേരാൻ കാസർകോട് ജില്ലാ കലക്ടർ അർജുൻ പാണ്ഡ്യൻ ഇന്നലെ ഉച്ചയോടെ വെള്ളരിക്കുണ്ടിലെ വസതിയിലെത്തി. അഖിലിന്റെ പിതാവ് ജോയൻ, മാതാവ് സാലി എന്നിവരെയും ബന്ധുക്കളെയും അദ്ദേഹം ആശ്വസിപ്പിച്ചു.
ഏകമകന്റെ വിയോഗത്തിൽ തകർന്നുപോയ മാതാപിതാക്കളെ ആശ്വസിപ്പിക്കാൻ വാക്കുകളില്ലാതെ കലക്ടറും വിഷമിച്ചു. അപകടം നടന്ന ദിവസം രാവിലെ പോലും മകൻ ഫോണിൽ വിളിച്ചിരുന്നതായി മാതാപിതാക്കൾ ഓർത്തെടുത്തു.
വിവരങ്ങൾ പറഞ്ഞുനൽകുന്നതിനിടെ അവർ പൊട്ടിക്കരഞ്ഞത് അവിടെയുണ്ടായിരുന്ന നാട്ടുകാരുടെയും കണ്ണുകൾ ഈറനണിയിച്ചു. യുദ്ധഭൂമിയിൽ നടക്കുന്ന ദുരന്തമായതിനാൽ മൃതദേഹം നാട്ടിലെത്തിക്കാനുള്ള നിയമപരമായ നടപടിക്രമങ്ങൾക്ക് കുറഞ്ഞത് രണ്ടാഴ്ചയെങ്കിലും സമയം വേണ്ടിവരുമെന്ന് കലക്ടർ അറിയിച്ചു.
നടപടികൾ വേഗത്തിലാക്കാൻ സംസ്ഥാന സർക്കാരിന്റെ ഭാഗത്തുനിന്നും ശക്തമായ ഇടപെടലുകൾ നടക്കുന്നുണ്ടെന്നും മുഖ്യമന്ത്രി നേരിട്ട് വിഷയം ശ്രദ്ധിക്കുന്നുണ്ടെന്നും അദ്ദേഹം വ്യക്തമാക്കി. സർക്കാരിന്റെ നേരിട്ടുള്ള മേൽനോട്ടത്തിലാകും മൃതദേഹം നാട്ടിൽ എത്തിക്കുക.
ഇതിനായുള്ള ഏകോപന ചുമതല വെള്ളരിക്കുണ്ട് തഹസിൽദാരെ ഏൽപ്പിച്ചിട്ടുണ്ടെന്നും എല്ലാ കാര്യങ്ങളിലും തന്റെ മുൻകൈ ഉണ്ടാകുമെന്നും കലക്ടർ കുടുംബത്തിന് ഉറപ്പുനൽകി. തികച്ചും സാധാരണ കുടുംബത്തിൽ നിന്നാണ് അഖിൽ ഈ നിലയിലേക്ക് ഉയർന്നു വന്നത്.
പിതാവ് ജോയൻ ചിറ്റാരിക്കാലിലെ വ്യാപാര സ്ഥാപനത്തിലെ ജീവനക്കാരനും അമ്മ സാലി പരപ്പ പോസ്റ്റ് ഓഫിസിലെ ആർഡി ഏജന്റായും ജോലി ചെയ്ത് ലഭിക്കുന്ന തുച്ഛമായ വരുമാനമായിരുന്നു കുടുംബത്തിന്റെ ആശ്രയം. നാല് വർഷം മുൻപ് മർച്ചന്റ് നേവിയിൽ ജോലി ലഭിച്ചതോടെയാണ് കുടുംബത്തിന്റെ സാമ്പത്തിക സ്ഥിതി മെച്ചപ്പെട്ടത്.
തുടർന്ന്, ഒരു വർഷം മുൻപ് വെള്ളരിക്കുണ്ടിൽ അവർ സ്വന്തമായി ഒരു വീടും നിർമിച്ചു. രണ്ടുമാസത്തെ അവധിക്കിടെ നാട്ടിലെത്തിയിരുന്ന അഖിൽ നാൽപത് ദിവസം മുൻപ് മാത്രമാണ് തിരികെ ജോലിസ്ഥലത്തേക്ക് മടങ്ങിയത്.
ഇതിനിടയിൽ ഇടുക്കി കട്ടപ്പന സ്വദേശിയായ യുവതിയുമായി അഖിലിന്റെ വിവാഹം നിശ്ചയിച്ചിരുന്നു. അടുത്ത വർഷം ഏപ്രിലിൽ അവധിക്കെത്തുമ്പോൾ വിവാഹം നടത്താനായിരുന്നു തീരുമാനിച്ചിരുന്നത്.
എന്നാൽ എല്ലാ സ്വപ്നങ്ങളും ബാക്കിയാക്കിയാണ് അഖിലിന്റെ മടക്കം. വെള്ളരിക്കുണ്ട് സെന്റ് ജൂഡ്സ് ഹയർസെക്കൻഡറി സ്കൂളിലെ പ്ലസ്ടു പഠനത്തിനുശേഷം ചെന്നൈയിൽ നിന്നും മറൈൻ എൻജിനീയറിങ് മികച്ച വിജലത്തോടെ പൂർത്തിയാക്കിയ അഖിൽ, പത്തൊൻപതാം വയസ്സിലാണ് മർച്ചന്റ് നേവിയിൽ പ്രവേശിക്കുന്നത്.
കപ്പലിൽ ചീഫ് ഓഫിസറായി സേവനം അനുഷ്ഠിക്കുന്നതിനിടയിൽ ക്യാപ്റ്റൻ പദവിക്കായുള്ള പരീക്ഷയ്ക്ക് തയാറെടുക്കുകയായിരുന്നു അദ്ദേഹം. പഠനത്തോടൊപ്പം കായികരംഗത്തും മികവ് തെളിയിച്ച വ്യക്തിയായിരുന്നു അഖിൽ.
2014-15 വർഷങ്ങളിൽ വടംവലി ദേശീയ ചാമ്പ്യൻഷിപ്പ് നേടിയ കേരള ടീമിൽ അംഗമായിരുന്നു. ഒതവണ സംസ്ഥാന ചാമ്പ്യൻഷിപ്പും നേടിയിട്ടുണ്ട്.
കൂടാതെ, റോപ് പുൾ അപ്പിൽ മുപ്പത് സെക്കൻഡിൽ ഇരുപത്തിയഞ്ച് തവണ പൂർത്തിയാക്കി വേൾഡ് വൈഡ് ബുക്ക് ഓഫ് റെക്കോർഡ്സിലും ഇടംനേടിയിരുന്നു. അഖിലിന്റെ വേർപാടിൽ സെന്റ് ജൂഡ്സ് ഹയർസെക്കൻഡറി സ്കൂൾ പ്രിൻസിപ്പലായിരുന്ന ഡോ.
മെൻഡലിൻ മാത്യുവും വടംവലി ദേശീയ പരിശീലകൻ ഷൈജൻ ചാക്കോയും അനുശോചനം രേഖപ്പെടുത്തി. അഖിൽ ജോയന്റെ നിര്യാണത്തിൽ പ്രമുഖ നേതാക്കൾ അനുശോചനം അറിയിച്ചു.
ആഭ്യന്തര മന്ത്രി രമേശ് ചെന്നിത്തല, രാജ്മോഹൻ ഉണ്ണിത്താൻ എംപി എന്നിവർ അഖിലിന്റെ പിതാവിനെ ഫോണിൽ ബന്ധപ്പെട്ട് ദുഃഖം അറിയിച്ചു. ഡൽഹിയിലുള്ള രാജ്മോഹൻ ഉണ്ണിത്താൻ എംപി കേന്ദ്ര ആഭ്യന്തര മന്ത്രാലയവുമായി നേരിട്ട് ബന്ധപ്പെട്ട് തുടർനടപടികൾ ഏകോപിപ്പിക്കുന്നുണ്ട്.
ഓൾ കേരള നാവിക് സുരക്ഷ (എകെഎൻഎസ്) ഭാരവാഹികളായ നൗഷാദ്, ബിജു എന്നിവരുടെ നേതൃത്വത്തിലുള്ള പതിനഞ്ചംഗ സംഘം ഇന്നലെ വെള്ളരിക്കുണ്ടിലെ വീട്ടിലെത്തി കുടുംബാംഗങ്ങളെ ആശ്വസിപ്പിച്ചു.
