കൊച്ചിയിലെ സിനിമാ മേഖലയെ പിടിച്ചുലച്ചുകൊണ്ട് താരസംഘടനയായ ‘അമ്മ’യിൽ ഉടലെടുത്ത പ്രതിസന്ധികൾ കൂടുതൽ സങ്കീർണ്ണമാകുന്നു. ഭരണസമിതിയുടെ കൂട്ടരാജിക്ക് പിന്നാലെ സംഘടനയ്ക്കുള്ളിലെ ഗുരുതരമായ വീഴ്ചകളെയും വ്യക്തിപരമായ ആക്ഷേപങ്ങളെയും കുറിച്ച് വെളിപ്പെടുത്തലുമായി നടി ശ്വേത മേനോൻ രംഗത്തെത്തി.
സംഘടനയുടെ പ്രാഥമിക അംഗത്വത്തിൽ നിന്നുപോലും രാജിവെക്കാൻ തന്നെ പ്രേരിപ്പിച്ചത് നടൻ ബാബുരാജ് ഉന്നയിച്ച അധിക്ഷേപകരമായ ആരോപണങ്ങളാണെന്ന് ശ്വേത മേനോൻ വ്യക്തമാക്കി. ബിജെപിക്ക് വേണ്ടി സ്ഥാനാർത്ഥിയെ കണ്ടെത്തുന്നതിന് താൻ സാമ്പത്തിക ഇടപാട് നടത്തിയെന്ന തരത്തിൽ യോഗത്തിൽ ബാബുരാജ് ആരോപണം ഉന്നയിച്ചതായി അവർ പറഞ്ഞു.
ഇതിൽ മനംനൊന്ത താൻ, താൻ ഒരു രാഷ്ട്രീയ പാർട്ടിയുടെയും ഏജന്റല്ലെന്നും തനിക്കെതിരെ ഉയർന്ന ആരോപണങ്ങൾ അടിസ്ഥാനരഹിതമാണെന്നും വ്യക്തമാക്കിയിട്ടുണ്ട്. ഈ സംഭവത്തിൽ കർശനമായ നിയമനടപടികൾ സ്വീകരിക്കുമെന്ന് അവർ അറിയിച്ചു.
സംഘടനയിൽ ഒരു പാവയെപ്പോലെ പ്രവർത്തിച്ചാൽ മാത്രമേ സ്ഥാനത്ത് തുടരാൻ സാധിക്കൂ എന്ന സ്ഥിതിവിശേഷം ഉണ്ടായെന്നും, വ്യക്തിത്വം പണയം വെച്ച് തുടരാൻ താൽപ്പര്യമില്ലാത്തതിനാലാണ് രാജിവെച്ചതെന്നും ശ്വേത മേനോൻ കൂട്ടിച്ചേർത്തു. ഭരണസമിതിയിലെ 17 അംഗങ്ങളും രാജിവെക്കാൻ കാരണമായത് ആസൂത്രിതമായ ഗൂഢാലോചനയാണെന്നും, മുൻപ് ആരോപണവിധേയരായ ചിലർക്ക് സംഘടനയുടെ നിയന്ത്രണം തിരികെ ലഭിക്കാൻ വേണ്ടിയുള്ള നീക്കങ്ങളാണ് നടന്നതെന്നും അവർ ആരോപിച്ചു.
കൂടാതെ, സംഘടനയുടെ പ്രവർത്തനങ്ങളെ തകിടം മറിക്കുന്ന രീതിയിൽ ട്രഷറർ ഉണ്ണി ശിവപാൽ യാതൊരു അറിയിപ്പുമില്ലാതെ മെയ് ഒന്നിന് സ്ഥലം വിട്ടത് വലിയ പ്രതിസന്ധികൾക്ക് വഴിവെച്ചതായും ശ്വേത മേനോൻ വെളിപ്പെടുത്തി. മുൻ കമ്മിറ്റിയിൽ ബാബുരാജ് ഉൾപ്പെടെയുള്ളവർ നടത്തിയ പല ക്രമക്കേടുകളും സംഘടനയുടെ അന്തസ്സ് മാനിച്ച് ഇതുവരെ പുറത്തുപറയാതിരുന്നതാണെന്നും, വരുംദിവസങ്ങളിൽ ഇവ മാധ്യമങ്ങളിലൂടെ വെളിപ്പെടുത്തുമെന്നും അവർ മുന്നറിയിപ്പ് നൽകി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
