സംസ്ഥാനത്തിന്റെ മുന്നേറ്റം വിലയിരുത്തി കോൺക്ലേവ് നാളെ കൊച്ചിയിൽ; കേന്ദ്രമന്ത്രി കെ.റാം മോഹൻ നായിഡു ഉദ്ഘാടനം ചെയ്യും

കേരളത്തിന്റെ എഴുപതാം വാർഷികത്തോട് അനുബന്ധിച്ചുള്ള പ്രമുഖ മാധ്യമ കോൺക്ലേവ് നാളെ കൊച്ചിയിൽ ആരംഭിക്കും. ‘കേരളം എഴുപതിൽ’ എന്നതാണ് ഇത്തവണത്തെ മുഖ്യ പ്രമേയം.

കേരളം രൂപീകൃതമായിട്ട് 70 വർഷം പൂർത്തിയാകുന്ന വേളയിൽ സംഘടിപ്പിക്കുന്ന ഈ സംഗമം, നാടിന്റെ പാരമ്പര്യവും അതിജീവനവും വിലയിരുത്തുന്നതിനൊപ്പം ഭാവിയിലെ വളർച്ചയ്ക്കുള്ള കൃത്യമായ മാർഗങ്ങളും തേടും. ബോൾഗാട്ടിയിലെ ലുലു ഗ്രാൻഡ് ഹയാത്ത് രാജ്യാന്തര കൺവൻഷൻ സെന്ററിലാണ് സമ്മേളനം നടക്കുന്നത്.

രാവിലെ 9 മണിക്ക് കേന്ദ്രമന്ത്രി കെ.റാം മോഹൻ നായിഡു കോൺക്ലേവ് ഔദ്യോഗികമായി ഉദ്ഘാടനം ചെയ്യും. ക്ഷണിക്കப்பட்டവർക്ക് രാവിലെ 8.30 മുതൽ വേദിയിലേക്ക് പ്രവേശനം ഉണ്ടായിരിക്കുന്നതാണ്.

‘കേരളം: സ്വപ്നങ്ങളും യാഥാർഥ്യങ്ങളും’ എന്ന വിഷയത്തിൽ മുഖ്യമന്ത്രി വി.ഡി.സതീശൻ വൈകിട്ട് സമാപനപ്രഭാഷണം നിർവഹിക്കും. വ്യത്യസ്ത മേഖലകളിലെ പ്രമുഖർ അണിനിരക്കുന്ന വിവിധ സെഷനുകൾ സമ്മേളനത്തിന്റെ ഭാഗമായി നടക്കും.

കരുത്തിന്റെ കടലാഴത്തെക്കുറിച്ചുള്ള ചിന്തകൾ നാവികസേനാ മേധാവി കൃഷ്ണ സ്വാമിനാഥൻ ചടങ്ങിൽ പങ്കുവെക്കും. ഇടതുരാഷ്ട്രീയത്തിന്റെ പ്രസക്തിയെക്കുറിച്ച് സിപിഎം ജനറൽ സെക്രട്ടറി എം.എ.ബേബിയുമായുള്ള സംവാദവും ഉണ്ടായിരിക്കും.

‘കേരളം വളരാനുള്ള വഴികൾ’ എന്ന വിഷയത്തിൽ വ്യവസായമന്ത്രി പി.കെ.കുഞ്ഞാലിക്കുട്ടി, ചോയ്സ് ഗ്രൂപ്പ് സിഎംഡി ജോസ് തോമസ്, കേരള ക്രിക്കറ്റ് അസോസിയേഷൻ സിഇഒ മീന ചിദംബരം, ജെയിൻ യൂണിവേഴ്സിറ്റി ഡയറക്‌ടർ ടോം എം. ജോസഫ് എന്നിവർ പങ്കെടുക്കുന്ന പ്രത്യേക സംവാദം നടക്കും.

പരിസ്ഥിതിയോടും സമൂഹത്തോടും വ്യവസായ മേഖലയ്ക്കുള്ള ഉത്തരവാദിത്തങ്ങളെക്കുറിച്ച് മലബാർ ഗ്രൂപ്പ് ചെയർമാൻ എം.പി.അഹമ്മദ് സംസാരിക്കും. കൂടാതെ, ഹൈബി ഈഡൻ എംപി, രമേഷ് പിഷാരടി എംഎൽഎ, ഫാത്തിമ തഹ്‌ലിയ എംഎൽഎ, പൊതുമരാമത്ത് വകുപ്പ് സെക്രട്ടറി അദീല അബ്ദുല്ല, എഴുത്തുകാരൻ വിനോയ് തോമസ്, കാലാവസ്ഥ–പരിസ്ഥിതി ശാസ്ത്ര‍‍ജ്ഞരായ ഡോ.എസ്.അഭിലാഷ്, സി.കെ.വിഷ്ണുദാസ്, യുവപ്രതിഭകളായ ഗൗരി കിഷൻ, റൗൾ ജോൺ അജു എന്നിവരും വിവിധ സെഷനുകളിൽ സംബന്ധിക്കും.