റെയിൽവേ സുരക്ഷ ശക്തമാക്കുന്നു; അത്യാധുനിക സാങ്കേതികവിദ്യകളും എഐ നിരീക്ഷണവും ഏർപ്പെടുത്തും

ഇന്ത്യൻ റെയിൽവേ ശൃംഖലയുടെ സുരക്ഷാ സംവിധാനങ്ങൾ കൂടുതൽ വിപുലവും കാര്യക്ഷമവുമാക്കുന്നതിന്റെ ഭാഗമായി അത്യാധുനിക സാങ്കേതികവിദ്യകൾ നടപ്പിലാക്കാൻ റെയിൽവേ മന്ത്രാലയം തീരുമാനിച്ചു. ന്യൂഡൽഹിയിലെ റെയിൽ ഭവനിൽ റെയിൽവേ മന്ത്രി അശ്വിനി വൈഷ്ണവിന്റെ അധ്യക്ഷതയിൽ ചേർന്ന ഉന്നതതല സുരക്ഷാ അവലോകന യോഗത്തിലാണ് ഇതുസംബന്ധിച്ച നിർണ്ണായക തീരുമാനങ്ങൾ കൈക്കൊണ്ടത്.

റെയിൽവേ സഹമന്ത്രിമാരായ വി. സോമണ്ണ, രവ്‌നീത് സിംഗ് ബിട്ടു, റെയിൽവേ ബോർഡ് ചെയർമാൻ തുടങ്ങിയ പ്രമുഖരും രാജ്യത്തുടനീളമുള്ള മുതിർന്ന ഉദ്യോഗസ്ഥരും യോഗത്തിൽ പങ്കെടുത്തു.

കഴിഞ്ഞ ദിവസങ്ങളിൽ റെയിൽവേ ശൃംഖലയിൽ ഉണ്ടായ തീപിടിത്തങ്ങൾ ഉൾപ്പെടെയുള്ള സംഭവങ്ങളുടെ പ്രാഥമിക അന്വേഷണത്തിൽ സാമൂഹിക വിരുദ്ധരുടെ പങ്കാളിത്തം സംശയിക്കുന്നതായി യോഗം വിലയിരുത്തി. ഈ വിഷയത്തെ അതീവ ഗൗരവത്തോടെയാണ് ഇന്ത്യൻ റെയിൽവേ നോക്കിക്കാണുന്നത്.

റെയിൽവേ പ്രൊട്ടക്ഷൻ ഫോഴ്‌സ് (RPF) ഈ കേസുകളിൽ സജീവമായ അന്വേഷണം നടത്തിവരികയാണ്. ഉചിതമായ സമയത്ത് അധികൃതർ ഇടപെട്ടതിലൂടെ വൻ ദുരന്തങ്ങൾ ഒഴിവാക്കാൻ സാധിച്ചതായി യോഗം ചൂണ്ടിക്കാട്ടി.

സുരക്ഷാ നവീകരണത്തിന്റെ ഭാഗമായി റെയിൽവേ ശൃംഖലയിലുടനീളം സിസിടിവി നിരീക്ഷണം വ്യാപിപ്പിക്കും. ക്യാമറകളുടെ നിലവാരം ഉയർത്തുന്നതിനൊപ്പം, വിവരങ്ങൾ അതിവേഗം വിശകലനം ചെയ്യാൻ എഐ (AI) സാങ്കേതികവിദ്യയും സൈബർ സുരക്ഷാ സംവിധാനങ്ങളും കൂടുതൽ ശക്തിപ്പെടുത്തും.

കൂടാതെ, റെയിൽവേ പ്രൊട്ടക്ഷൻ ഫോഴ്‌സും ഗവൺമെന്റ് റെയിൽവേ പോലീസും (GRP) തമ്മിലുള്ള ഏകോപനം വർധിപ്പിക്കുന്നതിനും സുരക്ഷാ വിവരങ്ങൾ വേഗത്തിൽ കൈമാറുന്നതിനുമായി പ്രത്യേക സംവിധാനം ഏർപ്പെടുത്തുമെന്നും മന്ത്രാലയം അറിയിച്ചു. ട്രെയിനുകളിലും സ്റ്റേഷനുകളിലും സാമൂഹിക വിരുദ്ധ പ്രവർത്തനങ്ങൾ തടയുന്നതിൽ പൊതുജനങ്ങളുടെയും യാത്രക്കാരുടെയും സഹകരണം റെയിൽവേ അഭ്യർത്ഥിച്ചു.

യാത്രയിലുടനീളം അതീവ ജാഗ്രത പാലിക്കണമെന്നും, സംശയാസ്പദമായ സാഹചര്യങ്ങളോ വ്യക്തികളോ ശ്രദ്ധയിൽപ്പെട്ടാൽ ഉടൻ തന്നെ 139 എന്ന റെയിൽവേ ഹെൽപ്പ് ലൈൻ നമ്പറിൽ ബന്ധപ്പെടണമെന്നും റെയിൽവേ അധികൃതർ നിർദേശിച്ചു.