അടിയന്തര കേന്ദ്രമന്ത്രിസഭാ യോഗം ഇന്ന്; സുപ്രധാന സാമ്പത്തിക-രാഷ്ട്രീയ വിഷയങ്ങൾ ചർച്ചയാകും

അഞ്ച് വിദേശ രാജ്യങ്ങളിലെ ഔദ്യോഗിക സന്ദർശനം പൂർത്തിയാക്കി തിരിച്ചെത്തിയതിന് പിന്നാലെ, പ്രധാനമന്ത്രി നരേന്ദ്ര മോദി കേന്ദ്ര മന്ത്രിസഭയുടെ അടിയന്തര യോഗം വിളിച്ചുചേർത്തു. ഡൽഹിയിലെ ‘സേവാ തീർത്ഥ്’ ഹാളിൽ ഇന്ന് വൈകിട്ട് 4 മണിക്കാണ് യോഗം നിശ്ചയിച്ചിരിക്കുന്നത്.

നിലവിലെ രാഷ്ട്രീയ-സാമ്പത്തിക സാഹചര്യങ്ങളുടെ പശ്ചാത്തലത്തിൽ, മുഴുവൻ കേന്ദ്ര കാബിനറ്റ് മന്ത്രിമാർക്കും സ്വതന്ത്ര ചുമതലയുള്ള സഹമന്ത്രിമാർക്കും സംസ്ഥാന ചുമതലയുള്ള മന്ത്രിമാർക്കും തലസ്ഥാനത്ത് തുടരാൻ കർശന നിർദ്ദേശം നൽകിയിട്ടുണ്ട്. യുഎസും ഇറാനും തമ്മിലുള്ള പശ്ചിമേഷ്യൻ സംഘർഷവും, അത് രാജ്യത്തിന്റെ സാമ്പത്തിക മേഖലയിൽ ഉണ്ടാക്കാൻ സാധ്യതയുള്ള പ്രത്യാഘാതങ്ങളുമാണ് യോഗത്തിലെ പ്രധാന ചർച്ചാവിഷയം.

ആഗോള വിപണിയിലെ ഇന്ധനവില വർദ്ധനവ്, വിതരണ ശൃംഖലയിലെ തടസ്സങ്ങൾ, പണപ്പെരുപ്പം എന്നിവ സർക്കാർ അതീവ ഗൗരവത്തോടെയാണ് വീക്ഷിക്കുന്നത്. ഈ പ്രതിസന്ധി നേരിടുന്നതിനായി പ്രതിരോധ മന്ത്രി രാജ്‌നാഥ് സിംഗിന്റെ നേതൃത്വത്തിൽ അമിത് ഷാ, നിർമ്മല സീതാരാമൻ, ഹർദീപ് സിംഗ് പുരി എന്നിവരടങ്ങുന്ന ഉന്നതതല മന്ത്രിസഭാ സമിതിക്ക് രൂപം നൽകിയിട്ടുണ്ട്.

രാജ്യത്ത് ആവശ്യത്തിന് അസംസ്‌കൃത എണ്ണയും എൽപിജി ശേഖരവുമുണ്ടെന്നും ആശങ്കപ്പെടേണ്ടതില്ലെന്നും രാജ്‌നാഥ് സിംഗ് വ്യക്തമാക്കിയിട്ടുണ്ട്. എങ്കിലും, അന്താരാഷ്ട്ര സാഹചര്യം പ്രധാനമന്ത്രി നേരിട്ട് നിരീക്ഷിക്കും.

അതേസമയം, വരാനിരിക്കുന്ന രാഷ്ട്രീയ നീക്കങ്ങളും യോഗത്തിൽ ചർച്ചയായേക്കും. ജൂൺ 10-ഓടെ മോദി 3.0 സർക്കാർ ഒന്നാം വാർഷികം ആഘോഷിക്കാൻ ഒരുങ്ങുന്ന സാഹചര്യത്തിൽ, കേന്ദ്ര മന്ത്രിസഭയിൽ അഴിച്ചുപണിയും വിപുലീകരണവും ഉണ്ടായേക്കുമെന്ന സൂചനകൾ ശക്തമാണ്.

വിവിധ മന്ത്രാലയങ്ങളുടെ കഴിഞ്ഞ ഒരു വർഷത്തെ പ്രവർത്തന മികവ് വിലയിരുത്തി, ജൂൺ രണ്ടാം വാരത്തോടെ പുതിയ മന്ത്രിമാരെ ഉൾപ്പെടുത്താനും വകുപ്പുകളിൽ മാറ്റം വരുത്താനും സാധ്യതയുണ്ട്. ഇന്നത്തെ യോഗത്തിൽ ഇതുസംബന്ധിച്ച അന്തിമ തീരുമാനങ്ങൾ ഉണ്ടായേക്കുമെന്നാണ് രാഷ്ട്രീയ വൃത്തങ്ങൾ വിലയിരുത്തുന്നത്.