അഗർബത്തിയും കൊതുകുതിരിയും പുകയ്ക്കുന്നത് ക്യാൻസറിന് കാരണമാകുമോ വിദഗ്ധർ പറയുന്നത് എന്ത്

മഴക്കാലത്ത് വീടുകളിൽ കൊതുകുകളെ തുരത്താൻ വ്യാപകമായി ഉപയോഗിക്കുന്ന ഒന്നാണ് കൊതുകുതിരികളും അഗർബത്തികളും. മലേരിയ, ഡെങ്കിപ്പനി, ചിക്കൻഗുനിയ തുടങ്ങിയ രോഗങ്ങൾ പരത്തുന്ന കൊതുകുകളെ അകറ്റി നിർത്താൻ ഇവ സഹായിക്കാറുണ്ട്.

എന്നാൽ ഇവ കത്തിക്കുമ്പോൾ പുറത്തുവിടുന്ന പുകയും രാസവസ്തുക്കളും ശ്വസിക്കുന്നത് ആരോഗ്യത്തിന് ഹാനികരമാണോ എന്ന സംശയം പലരിലുമുണ്ട്. പ്രത്യേകിച്ചും, ഈ പുക ശ്വസിക്കുന്നത് ക്യാൻസർ സാധ്യത വർദ്ധിപ്പിക്കുമോ എന്ന ആശങ്കയാണ് പലരും പങ്കുവെക്കുന്നത്.

ഈ വിഷയത്തിൽ വ്യക്തത വരുത്തിയിരിക്കുകയാണ് എച്ച്.ഒ.സി. വേദാന്തയിലെ മെഡിക്കൽ ഓങ്കോളജിസ്റ്റ് ഡോ.

ചിന്തൻ ഷാ. വീടുകളിൽ ഇടയ്ക്കിടെ അഗർബത്തികളോ കൊതുക് തിരികളോ ഉപയോഗിക്കുന്നത് നേരിട്ട് ക്യാൻസറിന് കാരണമാകും എന്ന് അവകാശപ്പെടുന്നതിന് നിലവിൽ യാതൊരു അടിസ്ഥാനവുമില്ലെന്ന് അദ്ദേഹം വ്യക്തമാക്കി.

എന്നാൽ, ഇവ കത്തിക്കുമ്പോൾ, പ്രത്യേകിച്ച് വായുസഞ്ചാരം കുറഞ്ഞ സ്ഥലങ്ങളിൽ, വീടിനുള്ളിലെ വായുവിന്റെ ഗുണനിലവാരത്തെ ഇത് സാരമായി ബാധിച്ചേക്കാമെന്നും അദ്ദേഹം മുന്നറിയിപ്പ് നൽകുന്നു. ഒരു അഗർബത്തി കത്തുമ്പോൾ അതിൽ നിന്ന് സുഗന്ധം മാത്രമല്ല പുറത്തുവരുന്നത്.

സൂക്ഷ്മ കണികകളും വാതക രൂപത്തിലുള്ള പദാർത്ഥങ്ങളും ഇതിലൂടെ വായുവിൽ കലരുന്നുണ്ട്. വോളറ്റൈൽ ഓർഗാനിക് സംയുക്തങ്ങൾ (VOCs), പോളിസൈക്ലിക് ആരോമാറ്റിക് ഹൈഡ്രോകാർബണുകൾ (PAHs) എന്നിവ ഇതിൽ ഉൾപ്പെടുന്നു.

വായുസഞ്ചാരം കുറഞ്ഞ അടച്ചിട്ട മുറിയിലോ ദീർഘനേരത്തേക്കോ ഇവ കത്തിക്കുമ്പോൾ ഇത്തരം ഘടകങ്ങളുമായുള്ള സമ്പർക്കം വർദ്ധിക്കാൻ സാധ്യതയുണ്ട്.

ഇതിൽ നിന്നുള്ള സൂക്ഷ്മ കണികകൾക്ക് മുറിയിലെ വായുവിൽ തങ്ങിനിൽക്കാനും ശ്വസനത്തിലൂടെ ശരീരത്തിനുള്ളിലേക്ക് പ്രവേശിക്കാനും കഴിയുന്നത്ര വലിപ്പം കുറവാണ്. കൊതുകുകളെ അകറ്റുന്ന ഘടകങ്ങൾ സാവധാനം പുറത്തുവിട്ടുകൊണ്ടാണ് കൊതുകുതിരികൾ പ്രവർത്തിക്കുന്നത്.

എങ്കിലും ഇവ കത്തുമ്പോൾ പുകയും സൂക്ഷ്മകണങ്ങളും ഉത്പാദിപ്പിക്കപ്പെടുന്നുണ്ട്. കൊതുകുതിരിയുടെ ഘടന, ഉപയോഗിക്കുന്ന അളവ്, മുറിയുടെ വലിപ്പം, വായുസഞ്ചാരത്തിനുള്ള സൗകര്യം എന്നിവയെല്ലാം ഇതിൽ നിന്നുള്ള പുക ശ്വസാനിടയാകുന്നതിന്റെ അളവിനെ സ്വാധീനിക്കുന്ന പ്രധാന ഘടകങ്ങളാണ്.

സങ്കീർണ്ണമായ പല കാരണങ്ങളുടെയും സംയോജനത്തിലൂടെയാണ് ക്യാൻസർ ഉണ്ടാകുന്നത്. ജനിതക ഘടകങ്ങൾ, പുകയിലയും മദ്യവുമായുള്ള സമ്പർക്കം, ചിലതരം അണുബാധകൾ, അമിതവണ്ണം, പാരിസ്ഥിതിക ഘടകങ്ങൾ, മറ്റ് ജീവിതശൈലീ ഘടകങ്ങൾ എന്നിവയുൾപ്പെടെ നിരവധി കാര്യങ്ങൾ ക്യാൻസർ സാധ്യതയെ സ്വാധീനിക്കുന്നുണ്ടെന്ന് വിദഗ്ധർ ചൂണ്ടിക്കാട്ടുന്നു.

വീടുകളിൽ സാധാരണയായി അഗർബത്തിയോ കൊതുക് തിരിയോ ഉപയോഗിക്കുന്നത് നേരിട്ട് ക്യാൻസറിലേക്ക് നയിക്കുമെന്ന് ഉറപ്പിക്കുന്ന തെളിവുകളൊന്നും ലഭ്യമല്ലെങ്കിലും, പുകയുമായുള്ള നിരന്തരവും ദീർഘകാലവുമായുള്ള സമ്പർക്കം ഒഴിവാക്കുന്നത് ശ്വാസകോശത്തെ ആരോഗ്യകരമായി സംരക്ഷിക്കാൻ സഹായിക്കും.