യുഎസ് പങ്കാളി നെതന്യാഹുവിന് പിന്തുണയുമായി ഡോണൾഡ് ട്രംപ്

വാഷിങ്ടൻ ∙ വരുന്ന മാസം 27ന് നടക്കാനിരിക്കുന്ന ഇസ്രയേൽ പാർലമെന്റ് തിരഞ്ഞെടുപ്പിൽ പ്രധാനമന്ത്രി ബെന്യാമിൻ നെതന്യാഹുവിന് പൂർണ പിന്തുണ പ്രഖ്യാപിച്ച് യുഎസ് പ്രസിഡന്റ് ഡോണൾഡ് ട്രംപ് രംഗത്തെത്തി. നെതന്യാഹു ശക്തനായ അമേരിക്കൻ പങ്കാളിയാണെന്നും അദ്ദേഹം വീണ്ടും രാജ്യത്തിന്റെ പ്രധാനമന്ത്രിയായി തിരഞ്ഞെടുക്കപ്പെടണമെന്നും ട്രംപ് തന്റെ സമൂഹമാധ്യമ അക്കൗണ്ടിൽ കുറിച്ചു.

നെതന്യാഹുവിനെ ‘മഹാനായ പോരാളിയായ പ്രധാനമന്ത്രി’ എന്നാണ് യുഎസ് പ്രസിഡന്റ് വിശേഷിപ്പിച്ചത്. ഇത് ‘ബിബി’ നെതന്യാഹുവിനുള്ള തന്റെ സമ്പൂർണ പിന്തുണയാണെന്നും അദ്ദേഹം വ്യക്തമാക്കുകയുണ്ടായി.

“ഞങ്ങൾ തമ്മിൽ മികച്ച ബന്ധമാണുള്ളത്. നെതന്യാഹു വീണ്ടും തിരഞ്ഞെടുക്കപ്പെട്ടാൽ ഒരുമിച്ച് മികച്ച രീതിയിൽ മുന്നോട്ടുപോകാൻ സാധിക്കും.

ഏത് കാര്യത്തിനും വിശ്വസിച്ചാശ്രയിക്കാൻ കഴിയുന്ന ഒരാൾ ഇസ്രയേലിന്റെ അമരത്തുണ്ടാകേണ്ടത് അത്യന്താപേക്ഷിതമാണ്. നെതന്യാഹുവിനെ പിന്തുണയ്ക്കാൻ താൻ നേരത്തേ തന്നെ തീരുമാനിച്ചിരുന്നതാണ്.

എന്നാൽ അധികം നേരത്തെയാകേണ്ടെന്ന് കരുതി മാത്രമാണ് കാത്തിരുന്നത്.” – ട്രംപ് വ്യക്തമാക്കി. എട്ടു മാസം മുമ്പ് ഇസ്രയേലുമായി ചേർന്ന് അമേരിക്ക തുടക്കം കുറിച്ച ഇറാൻ യുദ്ധത്തിൽ ആക്രമണങ്ങൾ വീണ്ടും ആരംഭിച്ചേക്കുമെന്ന സൂചനയും ട്രംപ് നൽകിയിട്ടുണ്ട്.

ഇറാൻ തങ്ങളുടെ സമീപനങ്ങളിൽ ഉടനടി മാറ്റം വരുത്തിയില്ലെങ്കിൽ, തുടങ്ങിയ ആ ദൗത്യം ഞങ്ങൾ ഉടൻ തന്നെ പൂർത്തിയാക്കുമെന്നാണ് അദ്ദേഹം നൽകിയിരിക്കുന്ന മുന്നറിയിപ്പ്. ട്രംപിന്റെ പ്രഖ്യാപനത്തോട് വളരെ പെട്ടെന്നുതന്നെ പ്രതികരിച്ച ബെന്യാമിൻ നെതന്യാഹു, ട്രംപിന്റെ ശക്തമായ പിന്തുണയ്‌ക്കും ഇതുവരെയുള്ള ഒത്തൊരുമിച്ചുള്ള പ്രവർത്തനങ്ങൾക്കും നന്ദി അറിയിച്ചു.

ഗാസ സംഘർഷത്തിന് ശേഷമുള്ള ഇസ്രയേലിലെ ആദ്യ പൊതുതിരഞ്ഞെടുപ്പാണ് നിലവിൽ നടക്കാനിരിക്കുന്നത്.