ട്രെയിൻ യാത്രയ്ക്കിടെ സഹയാത്രികർക്ക് നേരെ ഫയർ എക്സ്റ്റിംഗ്വിഷർ പ്രയോഗിച്ച് ഭീകരാന്തരീക്ഷം സൃഷ്ടിച്ച വിദേശ പൗരൻ പൊലീസിന്റെ ചോദ്യം ചെയ്യലിനിടയിൽ കുഴഞ്ഞുവീണ് മരിച്ചു. ഏകദേശം 45 വയസ്സ് പ്രായം തോന്നിക്കുന്ന വ്യക്തിയാണ് മരണപ്പെട്ടത്.
സൂറത്തിലാണ് ഈ സംഭവം അരങ്ങേറിയത്. മുംബൈയിൽ നിന്ന് ഡൽഹിയിലേക്ക് സഞ്ചരിക്കുകയായിരുന്ന ഗോൾഡൺ ടെംപിൾ എക്സ്പ്രസ് ട്രെയിനിലാണ് നാടകീയ സംഭവങ്ങൾ അരങ്ങേറിയത്.
ട്രെയിനിലെ ജനറൽ കോച്ചിൽ വെച്ച് മറ്റ് യാത്രക്കാരുമായി ഇയാൾ വാക്കേറ്റത്തിലും തർക്കത്തിലുമേർപ്പെടുകയായിരുന്നു. ഇതിനിടയിലാണ് കയ്യിൽ കിട്ടിയ ഫയർ എക്സ്റ്റിംഗ്വിഷർ കോച്ചിലുണ്ടായിരുന്ന യാത്രക്കാർക്ക് നേരെ ഇയാൾ അടിച്ചുകയറ്റിയത്.
ഈ ആക്രമണത്തിൽ പ്രകോപിതരായ ചില യാത്രക്കാർ ചേർന്ന് ഇയാളെ തടഞ്ഞുനിർത്തി മർദിക്കുകയും ചെയ്തു. സംഭവവികാസങ്ങളെ തുടർന്ന് സ്ഥലത്തെത്തിയ ആർപിഎഫ് (RPF) ഉദ്യോഗസ്ഥർ ഇയാളെ ശാന്തനാക്കാൻ ശ്രമിച്ചെങ്കിലും ഫലമുണ്ടായില്ല.
തുടർന്ന് സുരക്ഷാ ഉദ്യോഗസ്ഥർ ഇയാളെ കസ്റ്റഡിയിലെടുക്കുകയായിരുന്നു. എന്നാൽ കസ്റ്റഡിയിൽ വെച്ചുള്ള ചോദ്യം ചെയ്യലിനിടെ ഇയാൾ ബോധരഹിതനായി നിലത്തുവീഴുകയായിരുന്നുവെന്ന് പൊലീസ് വ്യക്തമാക്കി.
ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മരണപ്പെട്ടയാളുടെ പക്കൽ നിന്ന് പാസ്പോർട്ടോ വിസയോ മറ്റ് ഔദ്യോഗിക തിരിച്ചറിയൽ രേഖകളോ ഒന്നുംതന്നെ കണ്ടെത്താൻ സാധിച്ചിട്ടില്ലെന്ന് റെയിൽവേ പ്രൊട്ടക്ഷൻ ഫോഴ്സ് അറിയിച്ചു.
സംഭവത്തിൽ റെയിൽവേ പൊലീസ് അസ്വാഭാവിക മരണത്തിന് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.
