തല തെറിച്ചിട്ടും പോരാട്ടം തുടർന്ന് റോബോട്ട്; ചൈനയിൽ അരങ്ങേറിയത് അവിശ്വസനീയമായ ഫൈറ്റിംഗ് ടൂർണമെന്റ്

ചൈനയിലെ ഷെൻഷെനിൽ ലോകത്തിലെ ആദ്യത്തെ ഫുൾ-സൈസ് ഹ്യൂമനോയിഡ് റോബോട്ട് ഫ്രീ-കോംബാറ്റ് ടൂർണമെന്റ് ആരംഭിച്ചു. സാങ്കേതികവിദ്യയുടെ അത്ഭുതകരമായ കാഴ്ചകൾക്കാണ് ഈ വേദി സാക്ഷ്യം വഹിച്ചത്.

എഞ്ചിൻഎഐ സംഘടിപ്പിച്ച ‘അൾട്ടിമേറ്റ് റോബോട്ട് നോക്ക്-ഔട്ട് ലെജൻഡ്’ (URKL) എന്ന ടൂർണമെന്റിൽ നടന്ന ഒരു പോരാട്ടം ഇപ്പോൾ ആഗോളതലത്തിൽ വലിയ ചർച്ചയായി മാറിയിരിക്കുകയാണ്. പോരാട്ടത്തിന്റെ നാടകീയ നിമിഷങ്ങൾ
എഞ്ചിൻഎഐ വികസിപ്പിച്ചെടുത്ത ‘T800’ വിഭാഗത്തിൽപ്പെട്ട

‘വൈറ്റ് ഈഗിൾ’, ‘മാറ്റഡോർ’ എന്നീ രണ്ട് റോബോട്ടുകൾ തമ്മിലായിരുന്നു മത്സരം. മത്സരത്തിനിടെ ‘വൈറ്റ് ഈഗിൾ’ നടത്തിയ അതിശക്തമായ ഒരു ഹൈ-കിക്ക് ‘മാറ്റഡോറിന്റെ’ കഴുത്തിൽ പതിക്കുകയായിരുന്നു.

ഈ ആഘാതത്തിൽ ‘മാറ്റഡോറിന്റെ’ തല സോക്കറ്റിൽ നിന്നും ഇളകി മാറി. എന്നാൽ, സെൻസറുകൾ അടങ്ങുന്ന തല ഭാഗികമായി തകർന്ന് തൂങ്ങിക്കിടന്നിട്ടും ‘മാറ്റഡോർ’ പിന്മാറാൻ തയ്യാറായില്ല.

വയറുകളിൽ തൂങ്ങിയാടുന്ന തലയുമായി തന്നെ എതിരാളിക്കെതിരെ പഞ്ചുകളും കിക്കുകളും തുടർന്നു. മത്സരത്തിന്റെ അവസാന നിമിഷങ്ങളിൽ നിയന്ത്രണം വിട്ട

‘മാറ്റഡോർ’ മുന്നോട്ട് ആഞ്ഞ് സ്വന്തം ശരീരത്തിനടിയിൽ വീഴുകയും, തല പൂർണ്ണമായും തകരുകയും ചെയ്തു. വീണ്ടും എഴുന്നേൽക്കാൻ ശ്രമിച്ചെങ്കിലും തല വേർപെട്ടതോടെ റോബോട്ട് പൂർണ്ണമായി പ്രവർത്തനരഹിതമായി.

വിജയം കൈവരിച്ച ‘വൈറ്റ് ഈഗിൾ’ റിങ്ങിനുള്ളിൽ റോബോട്ടിക് നൃത്തച്ചുവടുകളോടെയാണ് ആഘോഷം നടത്തിയത്. ഈ ദൃശ്യങ്ങൾ സമൂഹമാധ്യമങ്ങളിൽ കടുത്ത ആശങ്കകൾക്കും ചർച്ചകൾക്കും വഴിതുറന്നിട്ടുണ്ട്.

എന്താണ് T800 റോബോട്ട്?
പ്രശസ്ത ഹോളിവുഡ് ചിത്രം ‘ടെർമിനേറ്റർ’ എന്ന സിനിമയിലെ കഥാപാത്രത്തിൽ നിന്ന് പ്രചോദനം ഉൾക്കൊണ്ടാണ് ‘T800’ എന്ന പേര് നൽകിയിരിക്കുന്നത്. മിക്സഡ് മാർഷൽ ആർട്സ് ശൈലിയിലുള്ള അതിവേഗ പഞ്ച് കോമ്പിനേഷനുകളും റൗണ്ട് ഹൗസ് കിക്കുകളും ചെയ്യാൻ പ്രാപ്തിയുള്ള അത്യാധുനിക മോട്ടോറുകളും അൽഗോരിതങ്ങളും ഈ റോബോട്ടിലുണ്ട്.

URKL ടൂർണമെന്റ്
ലോകത്തിലെ ആദ്യത്തെ വാണിജ്യ ഹ്യൂമനോയിഡ് റോബോട്ട് ഫ്രീ-സ്റ്റൈൽ ഫൈറ്റിംഗ് ലീഗാണ് URKL. 10 രാജ്യങ്ങളിൽ നിന്നുള്ള ഇരുനൂറിലധികം സർവകലാശാലകളും കമ്പനികളും പങ്കെടുത്ത പ്രാഥമിക റൗണ്ടുകൾക്ക് ശേഷം, തിരഞ്ഞെടുത്ത 32 ഫൈനലിസ്റ്റ് ടീമുകളാണ് ഇപ്പോൾ ഷെൻഷെനിൽ മാറ്റുരയ്ക്കുന്നത്.

സോഫ്റ്റ്‌വെയർ കോഡിംഗ്, ചലന നിയന്ത്രണം, കൃത്യമായ തീരുമാനമെടുക്കൽ, കസ്റ്റം ആർമർ ഡിസൈൻ എന്നിവയിലെ മികവാണ് വിജയികളെ നിശ്ചയിക്കുന്നത്. ഈ വർഷം അവസാനം വരെ നീളുന്ന ടൂർണമെന്റിലെ ജേതാക്കൾക്ക് 10 മില്യൺ യുവാൻ (ഏകദേശം 12 കോടിയോളം ഇന്ത്യൻ രൂപ) വിലമതിക്കുന്ന സുവർണ്ണ ചാമ്പ്യൻഷിപ്പ് ബെൽറ്റ് സമ്മാനമായി ലഭിക്കും.