കാസറഗോഡ് ചെറുവത്തൂരിൽ സ്ഥിതി ചെയ്യുന്ന വീരമലയെ സംസ്ഥാനത്തെ ആദ്യത്തെ ‘സൗന്ദര്യമല’യായി മാറ്റിയെടുക്കാനുള്ള തീവ്ര ശ്രമത്തിലാണ് അധികൃതർ. കഴിഞ്ഞ വർഷത്തെ കാലവർഷക്കാലത്ത് ദേശീയപാതയിലൂടെയുള്ള യാത്രക്കാർക്ക് വലിയ ഭീഷണിയുയർത്തിയിരുന്ന മയിച്ചയിലെ വീരമലയുടെ മുഖച്ഛായ മാറ്റാൻ ഒരു മാസത്തെ സമയം മാത്രമാണ് ഇനി അവശേഷിക്കുന്നത്.
10 കോടി രൂപ ചെലവ് പ്രതീക്ഷിക്കുന്ന ഈ പദ്ധതിയിലൂടെ മലയുടെ സുരക്ഷ ഉറപ്പാക്കാനും മനോഹാരിത വീണ്ടെടുക്കാനുമാണ് ലക്ഷ്യമിടുന്നത്. മലയെ സുരക്ഷിതമാക്കുന്നതിനായി ഇതിനെ തട്ടുകളാക്കി മാറ്റുന്ന നിർമാണ പ്രവർത്തനങ്ങൾ പുരോഗമിക്കുകയാണ്.
8 മീറ്റർ നീളത്തിലും 6 മീറ്റർ വീതിയിലുമുള്ള തട്ടുകൾ നിർമിച്ച്, കമ്പിവലകൾ ഉപയോഗിച്ച് സ്ക്രൂ ചെയ്ത് മലയുടെ ഉപരിതലം ബലപ്പെടുത്തുന്ന രീതിയാണ് അവലംബിക്കുന്നത്. ഓരോ ഭാഗത്തും മൂന്ന് മുതൽ നാല് വരെ തട്ടുകൾ ഇത്തരത്തിൽ ഒരുക്കും.
മലയിടിച്ചിൽ പൂർണമായും തടയുന്നതിനായി വേരുകൾ മണ്ണിലേക്ക് ആഴത്തിൽ ഇറങ്ങുന്ന രാമച്ചം പോലുള്ള സസ്യങ്ങൾ നട്ടുപിടിപ്പിക്കുന്ന പ്രവർത്തനങ്ങൾ ഇതിനോടകം ആരംഭിച്ചു കഴിഞ്ഞു. മൂന്ന് വർഷത്തിനുള്ളിൽ ഏകദേശം ഏഴ് മീറ്റർ ആഴത്തിലേക്ക് വേരുകൾ പടരാൻ ശേഷിയുള്ള സസ്യങ്ങളാണ് ഇവിടെ ഉപയോഗിക്കുന്നത്.
മഴക്കാലത്ത് മലയിൽനിന്ന് ശക്തമായി കുതിച്ചെത്തുന്ന വെള്ളം ദേശീയപാതയിലൂടെ സഞ്ചരിക്കുന്ന വാഹനങ്ങൾക്ക് വലിയ ആശങ്ക സൃഷ്ടിക്കാറുണ്ട്. ഇത് പരിഹരിക്കുന്നതിനായി വെള്ളം ഒഴുകിയെത്തുന്ന ഭാഗങ്ങളിൽ പ്രത്യേക പടികൾ നിർമിക്കാൻ തീരുമാനിച്ചിട്ടുണ്ട്.
ഈ പടികൾ വെള്ളത്തിന്റെ ഒഴുക്കിന്റെ വേഗത കുറയ്ക്കുകയും, അതേസമയം കാഴ്ചയിൽ മനോഹരമായ ഒരു വെള്ളച്ചാട്ടത്തിന് സമാനമായ അനുഭവം നൽകുകയും ചെയ്യും. സംസ്ഥാനത്ത് ദേശീയപാതയോരത്ത് ഇത്തരത്തിലുള്ള സംയോജിത സുരക്ഷാ സംവിധാനങ്ങൾ നടപ്പിലാക്കുന്നത് ആദ്യമായാണെന്ന് പദ്ധതിയുമായി ബന്ധപ്പെട്ട
ഉദ്യോഗസ്ഥർ വ്യക്തമാക്കി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
