മൺസൂൺ വൈകുന്നു: കടുത്ത ജലക്ഷാമത്തിലേക്ക് ഗോവ; കരുതൽ ശേഖരം ഒരു മാസത്തേക്ക് മാത്രം

മൺസൂൺ മഴയുടെ ലഭ്യതയിൽ വന്ന കുറവ് ഗോവയെ കടുത്ത കുടിവെള്ള പ്രതിസന്ധിയിലേക്ക് തള്ളിവിടുന്നു. സംസ്ഥാനത്തെ പ്രധാന ജലസംഭരണികളിലെ ജലനിരപ്പ് ഗണ്യമായി താഴ്ന്നതായി ജലവിതരണ വകുപ്പ് മന്ത്രി സുഭാഷ് ഫാൽ ദേശായി അറിയിച്ചു.

ലഭ്യമായ ജലശേഖരം ഇനി ഏകദേശം ഒരു മാസത്തേക്ക് മാത്രമേ തികയുകയുള്ളൂ എന്ന സാഹചര്യത്തിൽ, വെള്ളം അനാവശ്യമായി പാഴാക്കരുതെന്ന് സർക്കാർ പൊതുജനങ്ങൾക്ക് കർശന നിർദ്ദേശം നൽകിയിട്ടുണ്ട്. വ്യാഴാഴ്ച വാർത്താ ഏജൻസിയായ പിടിഐയോട് സംസാരിക്കവേയാണ് മന്ത്രി ഇക്കാര്യം വ്യക്തമാക്കിയത്.

‘‘പരിഭ്രാന്തരാകേണ്ട സാഹചര്യമില്ല.

ഒരു മാസത്തേക്ക് ആവശ്യമുള്ള വെള്ളമുണ്ട്. എന്നാൽ ഇത് അതിനുമുമ്പ് തീർന്നുപോകാതിരിക്കാൻ കർശന നിർദേശങ്ങൾ പുറപ്പെടുവിക്കും’’ – അദ്ദേഹം പറഞ്ഞു.

വ്യവസായ മേഖലയിൽ നിന്നടക്കം ജലവിതരണത്തെ സംബന്ധിച്ച ആശങ്കകൾ ഉയരുന്നുണ്ടെന്നും അദ്ദേഹം കൂട്ടിച്ചേർത്തു. സംസ്ഥാനത്തെ വിവിധ അണക്കെട്ടുകളിലെ ജലനിരപ്പ് താഴെ പറയുന്നവയാണ്: സെലൗലിം അണക്കെട്ട്: ദക്ഷിണ ഗോവയ്ക്കും കുഷാവതി ജില്ലയുടെയും വടക്കൻ ഗോവയുടെയും ചില ഭാഗങ്ങൾക്കും ജലമെത്തിക്കുന്ന ഈ അണക്കെട്ടിൽ നിലവിൽ 27% വെള്ളം മാത്രമാണുള്ളത്.

280 എംഎൽഡി ജലസംഭരണ ശേഷിയുള്ള അണക്കെട്ടാണിത്. അൻജുനെം അണക്കെട്ട്: ഗോവ-കർണാടക അതിർത്തിയിൽ സ്ഥിതി ചെയ്യുന്ന ഈ അണക്കെട്ടിലെ സ്ഥിതി കൂടുതൽ ആശങ്കാജനകമാണ്.

ജലശേഖരം വെറും 9.9 ശതമാനമായി കുറഞ്ഞു. പ്രതിദിനം 50 എംഎൽഡി ശേഷിയുള്ള ഈ പദ്ധതി പഡോഷെ, ദത്തവാഡി പ്ലാന്റുകൾക്കാണ് വെള്ളം നൽകുന്നത്.

മൈസാൽ അണക്കെട്ട്: പോണ്ടയ്ക്ക് സമീപം സ്ഥിതി ചെയ്യുന്ന ഇവിടെ 19% ജലം മാത്രമാണ് ശേഷിക്കുന്നത്. പ്രതിദിനം 10-14 എംഎൽഡി ജലം ഇവിടെ നിന്ന് ലഭ്യമാണ്.

അതേസമയം, കാനക്കോണയിലെ ചാപ്പോളി അണക്കെട്ടിലും വടക്കൻ ഗോവയിലെ അംഥാനെ റിസർവോയറിലും നിലവിൽ മതിയായ ജലമുണ്ടെന്നും ആ മേഖലകളിൽ തൽക്കാലം ക്ഷാമം അനുഭവപ്പെടില്ലെന്നും മന്ത്രി ഉറപ്പുനൽകി. ജലവിഭവ വകുപ്പ് മന്ത്രി സുഭാഷ് ഷിറോഡ്കറുമായി യോഗം ചേർന്ന് സ്ഥിതിഗതികൾ വിലയിരുത്തുമെന്നും അദ്ദേഹം അറിയിച്ചു.

നിലവിൽ ജലവിതരണ സംവിധാനം മെച്ചപ്പെടുത്തിയിട്ടുള്ളതിനാൽ വലിയ ക്ഷാമമില്ലെന്നും എന്നാൽ ഭാവിയിൽ പ്രതിസന്ധി ഒഴിവാക്കാൻ മുൻകരുതൽ അത്യാവശ്യമാണെന്നും മന്ത്രി കൂട്ടിച്ചേർത്തു. കാലാവസ്ഥാ നിരീക്ഷണ കേന്ദ്രത്തിന്റെ കണക്കുകൾ പ്രകാരം അടുത്ത വാരാന്ത്യത്തോടെ സംസ്ഥാനത്ത് മഴ ശക്തമാകാൻ സാധ്യതയുണ്ട്.

അതുവരെ അതീവ ജാഗ്രത പാലിക്കണമെന്ന് സർക്കാർ ജനങ്ങളോട് അഭ്യർത്ഥിച്ചു.