ജിദ്ദ ഇസ്‌ലാമിക് തുറമുഖത്ത് അത്യാധുനിക ലോജിസ്റ്റിക്സ് കേന്ദ്രം പ്രവർത്തനമാരംഭിച്ചു

ആഗോള ലോജിസ്റ്റിക്സ് ഭൂപടത്തിൽ സൗദി അറേബ്യയുടെ സ്ഥാനം കൂടുതൽ സുദൃഢമാക്കുന്നതിന്റെ ഭാഗമായി, ജിദ്ദ ഇസ്‍ലാമിക് തുറമുഖത്ത് അത്യാധുനിക ബോണ്ടഡ് സംയോജിത ലോജിസ്റ്റിക്സ് കേന്ദ്രം പ്രവർത്തനം തുടങ്ങി. സൗദിയിലെ ദേശീയ ഷിപ്പിങ് കമ്പനിയായ അൽ ബഹ്റി, സക്കാത്ത്, ടാക്സ് ആൻഡ് കസ്റ്റംസ് അതോറിറ്റി (സാറ്റ്ക), സൗദി പോർട്ട്സ് അതോറിറ്റി (മവാനി) എന്നിവയുടെ സംയുക്ത സഹകരണത്തോടെയാണ് അന്താരാഷ്ട്ര നിലവാരത്തിലുള്ള ഈ പദ്ധതി യാഥാർത്ഥ്യമാക്കിയത്.

ഗതാഗത-ലോജിസ്റ്റിക്സ് മന്ത്രി എൻജി. സ്വാലിഹ് അൽ ജാസിർ കേന്ദ്രത്തിന്റെ ഉദ്ഘാടനം നിർവഹിച്ചു.

അൽ ബഹ്റി കമ്പനിയുടെ ചരിത്രത്തിലെ സുപ്രധാന ചുവടുവെപ്പായ ഈ പദ്ധതി, 95,000 ചതുരശ്ര മീറ്ററിലധികം വിസ്തൃതിയിലാണ് ഒരുക്കിയിരിക്കുന്നത്. ഏകദേശം 80,000-ത്തിലധികം പാലറ്റുകൾ ഒരേസമയം സൂക്ഷിക്കാൻ സാധിക്കുന്ന വമ്പിച്ച സംഭരണ ശേഷിയാണ് ഈ കേന്ദ്രത്തിനുള്ളത്.

പ്രധാന സവിശേഷതകൾ: * താപനില നിയന്ത്രിത സംവിധാനങ്ങൾ: സാധനങ്ങളുടെ ഗുണനിലവാരം കാത്തുസൂക്ഷിക്കുന്നതിനായി സാധാരണ സംഭരണത്തിന് പുറമെ, തണുപ്പിച്ചതും ഫ്രോസൺ രീതിയിലുള്ളതുമായ ആധുനിക സംഭരണ സൗകര്യങ്ങൾ ഇവിടെ ലഭ്യമാണ്. * നികുതി രഹിത സംഭരണം: സാറ്റ്കയുടെ അംഗീകൃത നിബന്ധനകൾക്ക് വിധേയമായി പ്രവർത്തിക്കുന്ന കേന്ദ്രത്തിൽ, പ്രാദേശിക വിപണിയിൽ പ്രവേശിക്കുന്നത് വരെ കസ്റ്റംസ് തീരുവയോ വാറ്റോ മുൻകൂറായി അടയ്ക്കാതെ തന്നെ ചരക്കുകൾ സൂക്ഷിക്കാനും പുനർകയറ്റുമതി ചെയ്യാനും കമ്പനികൾക്ക് സാധിക്കും.

* ഏകജാലക സേവനം: സ്റ്റോറേജ്, ഹാൻഡ്‌ലിങ്, കസ്റ്റംസ് ക്ലിയറൻസ്, മൂല്യവർദ്ധിത ലോജിസ്റ്റിക്സ് സേവനങ്ങൾ എന്നിവയെല്ലാം ഒരൊറ്റ മേൽക്കൂരയ്ക്ക് കീഴിൽ ലഭ്യമാക്കിയതാണ് ഈ കേന്ദ്രത്തിന്റെ പ്രത്യേകത. * ഡിജിറ്റൽ ട്രാക്കിങ്: കസ്റ്റംസിന്റെ ‘ഫസഹ്’ ഡിജിറ്റൽ പ്ലാറ്റ്‌ഫോമുമായി നേരിട്ട് ബന്ധിപ്പിച്ചിരിക്കുന്നതിനാൽ, ചരക്കുകളുടെ നീക്കം തത്സമയം നിരീക്ഷിക്കാനും നടപടിക്രമങ്ങൾ അതിവേഗം പൂർത്തിയാക്കാനും സാധിക്കും.

ഇതൊരു സുപ്രധാന നാഴികക്കല്ലാണെന്ന് അൽ ബഹ്‍രി സി.ഇ.ഒ എൻജി. അഹമ്മദ് അൽ സുബൈഇ പറഞ്ഞു.

“തങ്ങളുടെ സംയോജിത ലോജിസ്റ്റിക്സ് സേവനങ്ങൾ വികസിപ്പിക്കുന്നതിലെ സുപ്രധാന നാഴികക്കല്ലാണിത്. സൗദിയെ ഒരു ആഗോള ലോജിസ്റ്റിക്സ് ഹബ്ബാക്കി മാറ്റുന്നതിനുള്ള രാജ്യത്തിന്റെ ലക്ഷ്യങ്ങളെ പിന്തുണയ്ക്കാൻ അൽ ബഹ്‍രി പ്രതിജ്ഞാബദ്ധമാണ്.” മേഖലയിലെ ഏറ്റവും തിരക്കേറിയ ജിദ്ദ തുറമുഖത്ത് സ്ഥിതി ചെയ്യുന്നതിനാൽ, പ്രധാന അന്താരാഷ്ട്ര കപ്പൽ ഗതാഗത പാതകളിലേക്ക് നേരിട്ട് പ്രവേശനം സാധ്യമാകും.

ഇത് സൗദിയിലേക്കും മറ്റ് ജി.സി.സി വിപണികളിലേക്കും ചരക്കുകൾ എത്തിക്കുന്നതിനുള്ള സമയദൈർഘ്യം ഗണ്യമായി കുറയ്ക്കും. ആഗോള ലോജിസ്റ്റിക് പെർഫോമൻസ് ഇൻഡക്സിൽ മുന്നേറുന്ന സൗദി അറേബ്യക്ക് ഈ പുതിയ കേന്ദ്രം വലിയ കരുത്താകും.