വിഴിഞ്ഞം തുറമുഖം: ഗതാഗത ക്രമീകരണങ്ങൾക്കായി ട്രയൽ റൺ പൂർത്തിയാക്കി

വിഴിഞ്ഞം അന്താരാഷ്ട്ര തുറമുഖത്തുനിന്നുള്ള ചരക്ക് നീക്കം സുഗമമാക്കുന്നതിനുള്ള റോഡ് നിർമ്മാണ പ്രവർത്തനങ്ങളുടെ ഭാഗമായി പരീക്ഷണ ഓട്ടം (ട്രയൽ റൺ) വിജയകരമായി പൂർത്തിയായി. തുറമുഖത്തുനിന്ന് 1.7 കിലോമീറ്റർ ദൂരത്തിലുള്ള പാതയിലൂടെയാണ് ട്രക്ക് സർവീസ് നടത്തിയത്.

തുറമുഖത്ത് നിന്ന് ദേശീയപാതയിലേക്ക് പ്രവേശിക്കുന്നതിനായി പുതുതായി നിർമിച്ച പാതയിലാണ് കഴിഞ്ഞ ദിവസം രാത്രിയോടെ പരീക്ഷണ ഓട്ടം സംഘടിപ്പിച്ചത്. ഒഴിഞ്ഞ കണ്ടെയ്നറുമായി പുറപ്പെട്ട

ട്രക്ക്, തുറമുഖത്ത് നിന്ന് സർവീസ് റോഡ് വഴി ദേശീയപാതയിലേക്ക് പ്രവേശിച്ചു. തുടർന്ന് വെള്ളാർ ജംഗ്ഷനിലെത്തി കാഞ്ഞിരംകുളം ഭാഗത്തേക്ക് സഞ്ചരിച്ച വാഹനം, അവിടെ നിന്ന് യു-ടേൺ എടുത്ത് തലയ്ക്കോട് വഴി തിരികെ തുറമുഖത്തേക്ക് മടങ്ങുകയായിരുന്നു.

ദേശീയപാത അതോറിറ്റി ഉദ്യോഗസ്ഥരുടെ നേതൃത്വത്തിലാണ് ഈ സുപ്രധാന ട്രയൽ റൺ നടന്നത്. പുതിയതായി നിർമിച്ച മേൽപ്പാലങ്ങളിലൂടെയും സർവീസ് റോഡുകളിലൂടെയുമുള്ള വാഹനങ്ങളുടെ സുഗമമായ സഞ്ചാരം അധികൃതർ നേരിട്ട് വിലയിരുത്തി.

പ്രവർത്തനാനുമതി ലഭിച്ചാലുടൻ പൂർണ്ണതോതിൽ ചരക്ക് നീക്കം ആരംഭിക്കാനുള്ള ഒരുക്കത്തിലാണ് തുറമുഖ അധികൃതർ. ഭാവിയിൽ ചരക്ക് ലോറികൾ നിരത്തിലിറങ്ങുമ്പോൾ ദേശീയപാതയിലെ ഗതാഗതത്തിൽ വരുത്തേണ്ട

മാറ്റങ്ങൾ സംബന്ധിച്ചും ഈ പരീക്ഷണ ഓട്ടത്തിലൂടെ വ്യക്തത വരുത്താൻ സാധിക്കും. ട്രയൽ റണ്ണിന്റെ വിവരങ്ങൾ വിശദമായി പരിശോധിച്ച ശേഷം മാത്രമേ അന്തിമ ഗതാഗത അനുമതി നൽകുകയുള്ളൂ.