ഗൂഗിൾ കലണ്ടറിൽ ഇനി ഇഷ്ടാനുസരണം നിറങ്ങൾ തിരഞ്ഞെടുക്കാം: പുതിയ അപ്‌ഡേറ്റുമായി ഗൂഗിൾ

ഉപയോക്താക്കളുടെ ദീർഘകാല ആവശ്യങ്ങൾ പരിഗണിച്ച് തങ്ങളുടെ കലണ്ടർ സേവനത്തിൽ നിർണ്ണായക മാറ്റങ്ങൾ വരുത്താനൊരുങ്ങുകയാണ് ഗൂഗിൾ. കലണ്ടറിലെ ഇവന്റുകൾ വേർതിരിച്ചറിയാൻ മുൻപ് ഉണ്ടായിരുന്ന പരിമിതമായ നിറങ്ങൾക്ക് പകരം വിപുലമായ കളർ പാലറ്റുകളാണ് ഇപ്പോൾ അവതരിപ്പിച്ചിരിക്കുന്നത്.

നേരത്തെ 11 നിറങ്ങൾ മാത്രമായിരുന്നു ഇവന്റുകൾക്കായി ലഭ്യമായിരുന്നത്. എന്നാൽ, പുതിയ അപ്‌ഡേറ്റിലൂടെ 24 പ്രീ-ഡിഫൈൻഡ് നിറങ്ങൾ ഉപയോക്താക്കൾക്ക് ലഭ്യമാകും.

വെബ് പതിപ്പിലോ ഗൂഗിൾ കലണ്ടർ എപിഐ വഴിയോ ഉപയോഗിക്കുന്നവർക്ക് പൂർണ്ണമായ RGB കളർ പിക്കർ സംവിധാനം ഇപ്പോൾ ലഭ്യമാണ്. ഇതിലൂടെ ഹെക്സ് (Hex) കോഡുകൾ ഉപയോഗിച്ച് ദശലക്ഷക്കണക്കിന് നിറങ്ങൾ സൃഷ്ടിക്കാൻ ഉപയോക്താക്കൾക്ക് സാധിക്കും.

ഡെസ്ക്ടോപ്പിൽ സജ്ജീകരിക്കുന്ന ഈ നിറങ്ങൾ മൊബൈൽ ആപ്ലിക്കേഷനുകളിലും തത്സമയം ലഭ്യമാകും. ഈ മാറ്റത്തെക്കുറിച്ച് ഗൂഗിൾ ഔദ്യോഗികമായി അറിയിച്ചത് ഇങ്ങനെയാണ്: “This fulfills a long-standing feature request from both business and personal users for more customizable options.” വർഷങ്ങളായി ഉപയോക്താക്കൾ ഉന്നയിക്കുന്ന ഒരു പ്രധാന പരാതിയായിരുന്നു കലണ്ടറിലെ നിറങ്ങളുടെ പരിമിതി.

പലരും തങ്ങളുടെ കലണ്ടർ കൂടുതൽ വ്യക്തതയുള്ളതാക്കാൻ വിവിധ വഴികൾ തേടിയിരുന്നു. നിറങ്ങൾ കുറവായതുകൊണ്ട് കലണ്ടർ നോക്കുമ്പോൾ ആശയക്കുഴപ്പം ഉണ്ടാകുന്നുവെന്ന് ചില ഉപയോക്താക്കൾ നേരത്തെ പരാതിപ്പെട്ടിരുന്നു.

ഇതേത്തുടർന്ന്, “I use Google Calendar a lot and one thing that always bothered me was how limited the event colors are. After a while everything just starts blending together and it gets harder to scan the calendar quickly.” എന്ന് ഒരു ഉപയോക്താവ് റെഡിറ്റിൽ കുറിച്ചിരുന്നു.

പ്രവർത്തന രീതി
അടുത്ത രണ്ടാഴ്ചയ്ക്കുള്ളിൽ തന്നെ എല്ലാ പേഴ്സണൽ, വർക്ക്സ്പേസ് അക്കൗണ്ടുകളിലും ഈ ഫീച്ചർ ലഭ്യമാകും. കലണ്ടറിൽ ഒരു ഇവന്റ് എഡിറ്റ് ചെയ്യുമ്പോൾ വരുന്ന കളർ ഓപ്ഷനിൽ ക്ലിക്ക് ചെയ്താൽ പുതിയ നിറങ്ങൾ തിരഞ്ഞെടുക്കാം.

ഇവന്റുകളിൽ റൈറ്റ് ക്ലിക്ക് ചെയ്തും നിറങ്ങൾ മാറ്റാവുന്നതാണ്.