ഇന്ത്യൻ വാഹന വിപണിയിലെ സാന്നിധ്യം ശക്തമാക്കുന്നതിന്റെ ഭാഗമായി എസ്യുവി നിര വിപുലീകരിക്കാൻ ഒരുങ്ങി കിയ ഇന്ത്യ. വരുന്ന 2028–29 കാലയളവിലായിരിക്കും രണ്ട് പുതിയ എസ്യുവികൾ കമ്പനി രാജ്യത്ത് അവതരിപ്പിക്കാൻ ലക്ഷ്യമിടുന്നത്.
ഏകദേശം 10 ലക്ഷം രൂപ മുതൽ 35 ലക്ഷം രൂപ വരെ വിലമതിക്കുന്ന വിഭാഗത്തിലായിരിക്കും ഈ നവീന മോഡലുകൾ വിപണിയിലെത്തുകയെന്നാണ് ലഭ്യമാകുന്ന വിവരങ്ങൾ. സെൽറ്റോസിനേക്കാൾ താഴെയുള്ള വിഭാഗത്തിലാണ് ആദ്യത്തെ പുതിയ എസ്യുവി ഇടംപിടിക്കുന്നത്.
ബി-സെഗ്മെന്റിൽ ഉൾപ്പെടുത്തി അവതരിപ്പിക്കുന്ന ഈ മിഡ്സൈസ് എസ്യുവിയുടെ വരവ് കമ്പനി ഇതിനോടകം തന്നെ ഏറെക്കുറെ അന്തിമമാക്കിക്കഴിഞ്ഞു. ഏകദേശം 4.2 മീറ്റർ നീളമുള്ള ഈ വാഹനം വിപണിയിലെത്തിയ ശേഷവും സെൽറ്റോസിന്റെ വിൽപ്പന തുടരുന്നതായിരിക്കും.
നിലവിൽ മറ്റ് പ്രമുഖ ബ്രാൻഡുകൾ പിന്തുടരുന്ന വിപണി തന്ത്രത്തിന് സമാനമായിരിക്കും കിയയും ഇവിടെ സ്വീകരിക്കുക. മാരുതി വിക്ടോറിസിന് നേരിട്ടുള്ള എതിരാളിയായാണ് ഈ പുതിയ വാഹനം എത്തുന്നത്.
സെൽറ്റോസിനെ അപേക്ഷിച്ച് അൽപ്പം കൂടി കുറഞ്ഞ നിരക്കിൽ വാഹനം ഉപഭോക്താക്കളിലേക്ക് എത്തിക്കാനാണ് സാധ്യത കൽപ്പിക്കുന്നത്. പെട്രോൾ, ഡീസൽ, ഹൈബ്രിഡ് പവർട്രെയിൻ വകഭേദങ്ങൾ പുതിയ എസ്യുവിയിൽ ഉൾപ്പെടുത്താൻ കമ്പനി ആലോചിക്കുന്നുണ്ട്.
സെൽറ്റോസുമായി പ്ലാറ്റ്ഫോം, എഞ്ചിൻ സംവിധാനങ്ങൾ, മറ്റ് ഫീച്ചറുകൾ എന്നിവ പങ്കുവെക്കുമെങ്കിലും ഡിസൈൻ കാര്യത്തിൽ തികച്ചും വ്യത്യസ്തമായ ശൈലി ആയിരിക്കും ഈ മോഡലിന് നൽകുക. ഇതിലൂടെ ഒരേ സെഗ്മെന്റിൽ തന്നെ വ്യത്യസ്ത താൽപ്പര്യങ്ങളുള്ള ഉപഭോക്താക്കളെ തങ്ങളിലേക്ക് ആകർഷിക്കാനാണ് ലക്ഷ്യമിടുന്നത്.
ഹ്യുണ്ടായിയും സമാനമായ മിഡ്സൈസ് എസ്യുവിയുമായി ഈ ശ്രേണിയിലേക്ക് കടന്നുവരാൻ തയാറെടുക്കുന്നതായി റിപ്പോർട്ടുകളുണ്ട്. ഇതോടെ വരും കാലങ്ങളിൽ വിപണിയിൽ ശക്തമായ മത്സരം തന്നെ പ്രതീക്ഷിക്കാവുന്നതാണ്.
ഇതിനുപുറമെ, സെൽറ്റോസിന് മുകളിലായി സ്ഥാനം പിടിക്കുന്ന മറ്റൊരു എസ്യുവിയും കിയയുടെ പരിഗണനയിലുണ്ട്. സി-സെഗ്മെന്റിൽ എത്തുന്ന ഈ മോഡലിന്റെ ഏറ്റവും വലിയ പ്രത്യേകത ഇതിന്റെ ഏഴ് സീറ്റർ ലേഔട്ട് ആയിരിക്കും.
സെൽറ്റോസിനും സോറന്റോയ്ക്കും ഇടയിലുള്ള വിടവ് നികത്താനാണ് ഈ വാഹനം എത്തുന്നതെങ്കിലും ഇതിന് കമ്പനിയുടെ അന്തിമ അനുമതി ഇതുവരെ ലഭിച്ചിട്ടില്ല. വിപണിയിലെത്തുകയാണെങ്കിൽ ഹ്യുണ്ടായി അൽകസാർ, ടാറ്റ സഫാരി, എംജി ഹെക്ടർ പ്ലസ് തുടങ്ങിയ പ്രമുഖ മോഡലുകളായിരിക്കും കിയയുടെ ഈ ഏഴ് സീറ്റർ എസ്യുവിയുടെ പ്രധാന എതിരാളികൾ.
കമ്പനിയുടെ മൾട്ടി-പവർട്രെയിൻ നയം തുടരുകയാണെങ്കിൽ ഈ പുതിയ പതിപ്പിലും പെട്രോൾ, ഡീസൽ, ഹൈബ്രിഡ് ഓപ്ഷനുകൾ ലഭ്യമാകുന്നതാണ്. ഭാവിയിൽ പ്രീമിയം വിഭാഗത്തിനായി സോറന്റോയും ഇന്ത്യൻ വിപണിയിൽ എത്തിയേക്കുമെന്നാണ് വിലയിരുത്തൽ.
ഏകദേശം 30–35 ലക്ഷം രൂപ വില പ്രതീക്ഷിക്കുന്ന സോറന്റോയ്ക്ക് താഴെയായിരിക്കും പുതിയ ഏഴ് സീറ്റർ എസ്യുവി സ്ഥാനം പിടിക്കുക. എങ്കിലും ഈ വാഹനങ്ങളുടെ ഔദ്യോഗിക പേരുകൾ, കൃത്യമായ എൻജിൻ വിവരങ്ങൾ, ഫീച്ചറുകൾ, വില എന്നിവ സംബന്ധിച്ച വിവരങ്ങൾ കിയ ഇതുവരെ പുറത്തുവിട്ടിട്ടില്ല.
ഈ പദ്ധതികൾ പൂർണ്ണ രൂപം പ്രാപിച്ചാൽ വരും വർഷങ്ങളിൽ രാജ്യത്തെ എസ്യുവി വിപണിയിൽ കടുത്ത പോരാട്ടത്തിന് വഴിയൊരുങ്ങും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
