ആലുവ ആസ്ഥാനമായി പ്രവർത്തിക്കുന്ന പ്രമുഖ സ്വകാര്യ ധനകാര്യ സ്ഥാപനമായ ഫെഡറൽ ബാങ്ക് നടപ്പു സാമ്പത്തിക വർഷത്തിന്റെ ആദ്യപാദത്തിൽ (ഏപ്രിൽ-ജൂൺ) റെക്കോർഡ് പ്രകടനം കാഴ്ചവെച്ചു. മുൻവർഷത്തെ സമാന കാലയളവിൽ 862 കോടി രൂപയായിരുന്നു ബാങ്കിന്റെ ലാഭമെങ്കിൽ, ഇത്തവണ അത് 37 ശതമാനം വർധനയോടെ 1177 കോടി രൂപയിലെത്തി.
ബാങ്കിന്റെ പ്രവർത്തനമികവ് ഓഹരി വിപണിയിലും പ്രതിഫലിച്ചു. എൻഎസ്ഇയിൽ വ്യാപാരം അവസാനിക്കുമ്പോൾ ബാങ്കിന്റെ ഓഹരി വില 7 ശതമാനം ഉയർന്ന് 351 രൂപയിലാണ് വ്യാപാരം അവസാനിപ്പിച്ചത്.
ബാങ്കിന്റെ സാമ്പത്തിക നേട്ടത്തിന്റെ പ്രധാന സൂചികകൾ താഴെ പറയുന്നവയാണ്:
പ്രധാന സാമ്പത്തിക നേട്ടങ്ങൾ
പ്രവർത്തനലാഭം 22 ശതമാനം വർധിച്ച് 1897 കോടി രൂപയായി. പലിശവരുമാനം 8 ശതമാനം വർധനയോടെ 7238 കോടി രൂപയിലെത്തിയപ്പോൾ, അറ്റ പലിശവരുമാനം (NII) 2946 കോടി രൂപയായി ഉയർന്നു.
അറ്റ പലിശ മാർജിൻ (NIM) 3.20 ശതമാനത്തിൽ നിന്ന് 3.33 ശതമാനത്തിലേക്ക് മെച്ചപ്പെട്ടത് ബാങ്കിന്റെ കരുത്ത് വർധിപ്പിച്ചു. ആസ്തി ഗുണനിലവാരത്തിലും മികച്ച മുന്നേറ്റമാണ് ബാങ്ക് കൈവരിച്ചത്.
മൊത്തം നിഷ്ക്രിയ ആസ്തി (GNPA) 1.52 ശതമാനത്തിലേക്ക് താഴ്ന്നു. അറ്റ നിഷ്ക്രിയ ആസ്തി (NNPA) ദശാബ്ദത്തിലെ ഏറ്റവും കുറഞ്ഞ നിരക്കായ 0.18 ശതമാനത്തിലാണ്.
പ്രതി ഓഹരി ലാഭം (EPS) 19.15 രൂപയായി വർധിച്ചു. ബിസിനസ് വളർച്ച
ബാങ്കിന്റെ മൊത്തം ബിസിനസ് 6 ലക്ഷം കോടി രൂപ എന്ന നിർണ്ണായക നാഴികക്കല്ലിന് തൊട്ടരികിലെത്തിയിട്ടുണ്ട്.
നിലവിൽ 5.97 ലക്ഷം കോടി രൂപയാണ് ബാങ്കിന്റെ മൊത്തം ബിസിനസ്. നിക്ഷേപങ്ങൾ 11.37 ശതമാനം ഉയർന്ന് 3.20 ലക്ഷം കോടി രൂപയായും, വായ്പകൾ 15 ശതമാനം വർധിച്ച് 2.81 ലക്ഷം കോടി രൂപയായും മാറിയിട്ടുണ്ട്.
പ്രവാസി നിക്ഷേപം 14.24 ശതമാനം വർധിച്ച് 1.05 ലക്ഷം കോടി രൂപയിലെത്തി. ബാങ്കിന്റെ ഈ നേട്ടത്തെക്കുറിച്ച് മാനേജിങ് ഡയറക്ടറും സിഇഒയുമായ കെ.വി.എസ്.മണിയൻ പ്രതികരിച്ചത് ഇങ്ങനെയാണ്: “വെല്ലുവിളികൾ നിറഞ്ഞ സാഹചര്യത്തിലും ലാഭത്തിൽ 37% വർധന നേടാനായത് ബാങ്കിന്റെ പ്രവർത്തനമികവും സുശക്തമായ അടിത്തറയുമാണ് വ്യക്തമാക്കുന്നത്.
മുഖ്യ പ്രവർത്തനമേഖലയിൽ (കോർ ബിസിനസ്) നിന്നാണ് നേട്ടമെന്നതും ശ്രദ്ധേയമാണ്.”
വിപണിമൂല്യം ലക്ഷം കോടിയിലേക്ക്
നിലവിലെ ഓഹരി വില പ്രകാരം ഫെഡറൽ ബാങ്കിന്റെ വിപണിമൂല്യം 86,000 കോടി രൂപയാണ്. മുത്തൂറ്റ് ഫിനാൻസിന് ശേഷം കേരളത്തിൽ നിന്ന് ഒരു ലക്ഷം കോടി രൂപ വിപണിമൂല്യം കൈവരിക്കുന്ന രണ്ടാമത്തെ കമ്പനിയാകാനുള്ള കുതിപ്പിലാണ് ബാങ്ക്.
Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി/ഐപിഒ/സ്വർണം മുതലായവ വാങ്ങാനോ വില്ക്കാനോ ഉള്ള നിര്ദേശമോ ഉപദേശമോ അല്ല. ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്.
നിക്ഷേപം നടത്തുന്നതിന് മുമ്പ് നിങ്ങള് സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
