സാംസങ്ങിന്റെ പുതിയ ഫോൾഡബിൾ ഫോണുകൾ ജൂലൈയിൽ: ഡിസ്പ്ലേ സാങ്കേതികവിദ്യയിൽ നിർണ്ണായക മാറ്റങ്ങൾ

സ്മാർട്ട്ഫോൺ വിപണിയിൽ മടക്കാവുന്ന ഫോണുകളുടെ നിർമ്മാണത്തിൽ മുൻനിരയിലുള്ള സാംസങ് തങ്ങളുടെ പുതിയ ഉൽപ്പന്നങ്ങൾ പുറത്തിറക്കാൻ തയ്യാറെടുക്കുന്നു. വരാനിരിക്കുന്ന ജൂലൈ മാസത്തിലെ ‘അൺപാക്ക്ഡ്’ (Unpacked) ചടങ്ങിൽ രണ്ട് പുതിയ ബുക്ക്-സ്റ്റൈൽ ഫോൾഡബിൾ സ്മാർട്ട്ഫോണുകൾ കമ്പനി അവതരിപ്പിക്കുമെന്നാണ് സൂചനകൾ.

നിലവിലെ റിപ്പോർട്ടുകൾ പ്രകാരം ഗാലക്സി ഇസഡ് ഫോൾഡ് 8 അൾട്ര, പുതിയ വൈഡ്-സ്ക്രീൻ ഫോൾഡബിൾ മോഡൽ എന്നിവയാണ് വിപണിയിലേക്ക് എത്തുന്നത്. ഡിസ്പ്ലേയുടെ കാര്യത്തിൽ വലിയ സാങ്കേതിക മാറ്റങ്ങൾക്കാണ് ഇത്തവണ കമ്പനി മുൻതൂക്കം നൽകുന്നത്.

ഇസഡ് ഡി നെറ്റ് കൊറിയ പുറത്തുവിട്ട വിവരങ്ങൾ പ്രകാരം, വൈഡ്-സ്ക്രീൻ ഫോൾഡബിൾ ഫോണിന്റെ ഉൾവശത്തെ ഗ്ലാസിന് 60μm (മൈക്രോമീറ്റർ) കട്ടി ഉണ്ടായിരിക്കും.

അതേസമയം, കൂടുതൽ പ്രീമിയം മോഡലായ ഗാലക്സി ഇസഡ് ഫോൾഡ് 8 അൾട്രയിൽ ഇത് 45μm ആയി തുടരുമെന്നാണ് വ്യക്തമാകുന്നത്. ഇതിന്റെ പ്രസക്തി ഫോൾഡബിൾ സ്മാർട്ട്ഫോണുകളുടെ നിർമ്മാണത്തിൽ ഗ്ലാസിന്റെ കട്ടി വളരെ പ്രധാനപ്പെട്ട

ഒന്നാണ്. ഗ്ലാസിന് കട്ടി കുറയുമ്പോൾ മടക്കുമ്പോൾ പൊട്ടാനുള്ള സാധ്യത കുറവാണെങ്കിലും, ഡിസ്പ്ലേയിൽ മടക്കുകൾ (crease) വേഗത്തിൽ വീഴാനും ബാഹ്യമായ ആഘാതങ്ങളെ പ്രതിരോധിക്കാനുള്ള ശേഷി കുറയാനും സാധ്യതയുണ്ട്.

അതിനാൽ, പുതിയ വൈഡ്-സ്ക്രീൻ മോഡലിൽ 60μm കട്ടിയുള്ള ഗ്ലാസ് ഉപയോഗിക്കുന്നത് വഴി ഡിസ്പ്ലേയിലെ മടക്കുകൾ കുറയ്ക്കാനും കൂടുതൽ ഈടുനിൽപ്പ് നൽകാനും സാധിക്കുമെന്ന് കരുതപ്പെടുന്നു. എന്നാൽ, ഇത് ഫോണിന്റെ ഭാരവും കനവും അല്പം വർദ്ധിപ്പിച്ചേക്കാം.

ഗാലക്സി ഇസഡ് ഫ്ലിപ്പ് മോഡലിൽ കാര്യമായ മാറ്റങ്ങൾ പ്രതീക്ഷിക്കുന്നില്ല. ഫോണുകൾക്ക് പുറമെ, ഗാലക്സി വാച്ച് 9, ഗാലക്സി വാച്ച് അൾട്ര 2 എന്നീ പുതിയ വെയറബിൾ ഉപകരണങ്ങളും ഇതേ ചടങ്ങിൽ അവതരിപ്പിക്കുമെന്നാണ് പ്രതീക്ഷിക്കുന്നത്.