യുകെയ്ക്കെതിരെ രൂക്ഷ വിമർശനവുമായി ബെഞ്ചമിൻ നെതന്യാഹു; പരാമർശം ‘ഇസ്ലാമിക് റിപ്പബ്ലിക് ഓഫ് ബ്രിട്ടൺ’ എന്ന്

ബ്രിട്ടനെതിരെ അതിരൂക്ഷമായ വിമർശനവുമായി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു രംഗത്ത്. യുകെയെ ‘ഇസ്ലാമിക് റിപ്പബ്ലിക് ഓഫ് ബ്രിട്ടൺ’ എന്ന് വിശേഷിപ്പിച്ച അദ്ദേഹം, ആണവായുധമുള്ള ആദ്യ ഇസ്ലാമിക രാജ്യമാകാൻ യുകെയ്ക്ക് പ്രാപ്തിയുണ്ടെന്നും മുന്നറിയിപ്പ് നൽകി.

ഇസ്രായേലിനോടുള്ള നിലപാടുകളിൽ വന്ന മാറ്റങ്ങളെ ചൂണ്ടിക്കാണിച്ചായിരുന്നു ഈ പരാമർശങ്ങൾ. ഇസ്രായേലിലെ ആർമി റേഡിയോയ്ക്ക് അനുവദിച്ച പ്രത്യേക അഭിമുഖത്തിലാണ് അദ്ദേഹം ഇക്കാര്യങ്ങൾ വ്യക്തമാക്കിയത്.

ചരിത്രപരമായ സംഭവങ്ങൾ ഓർമ്മിപ്പിച്ചുകൊണ്ട്, മുൻ ബ്രിട്ടീഷ് പ്രധാനമന്ത്രി വിൻസ്റ്റൺ ചർച്ചിലിന്റെ മകനും മാധ്യമപ്രവർത്തകനുമായ റാൻഡോൾഫ് ചർച്ചിൽ വർഷങ്ങൾക്ക് മുൻപ് ഇസ്രായേലിന് അനുകൂലമായി നിലകൊണ്ടതിനെ നെതന്യാഹു പ്രശംസിച്ചു. എന്നാൽ സമകാലിക ബ്രിട്ടനിലെ സാഹചര്യം ഇതിൽ നിന്നും തികച്ചും വിപരീതമാണെന്ന് അദ്ദേഹം കുറ്റപ്പെടുത്തി.

“ഇന്നത്തെ ബ്രിട്ടനിൽ നിങ്ങൾക്കിത് കാണാൻ കഴിയില്ല, അതിനെ ഇപ്പോൾ ‘ഇസ്ലാമിക് റിപ്പബ്ലിക് ഓഫ് ബ്രിട്ടൻ’ എന്നാണ് വിളിക്കുന്നത്” എന്ന് നെതന്യാഹു പറഞ്ഞു. ബ്രിട്ടനെ മാത്രം ലക്ഷ്യമിടുന്നത് ശരിയാണോയെന്നും യൂറോപ്പ് മുഴുവൻ സമാനമായ സാഹചര്യത്തിലൂടെയല്ലേ കടന്നുപോകുന്നത് എന്നുമുള്ള അഭിമുഖകാരന്റെ ചോദ്യത്തിന് അദ്ദേഹം നൽകിയ മറുപടി ശ്രദ്ധേയമായി.

അതെ, പക്ഷേ ആണവായുധങ്ങളുള്ള ആദ്യത്തെ ഇസ്ലാമിക രാജ്യം ഇസ്ലാമിക് റിപ്പബ്ലിക് ഓഫ് ബ്രിട്ടൻ ആയിരിക്കുമെന്ന് ആരോ പറഞ്ഞത് നിങ്ങൾക്കറിയാമല്ലോ എന്നായിരുന്നു അദ്ദേഹത്തിന്റെ പ്രതികരണം. ഗാസ യുദ്ധവുമായി ബന്ധപ്പെട്ട

സംഭവവികാസങ്ങളാണ് ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിൽ ഉലച്ചിലുകൾ ഉണ്ടാക്കിയത്. ബ്രിട്ടീഷ് പ്രധാനമന്ത്രിയായി ചുമതലയേൽക്കുന്നതിന് മുൻപ്, ഗാസയിലെ ഇസ്രായേൽ സൈനിക നടപടിയോടുള്ള ലേബർ പാർട്ടിയുടെ ആദ്യകാല സമീപനത്തിൽ ആൻഡി ബേൺഹാം മാപ്പ് പറഞ്ഞിരുന്നു.

തന്റെ നേതൃത്വത്തിൽ പാർട്ടിക്ക് ഈ വിഷയത്തിൽ പിഴവുകൾ പറ്റിയിട്ടുണ്ടെന്നും ഭാവിയിൽ കൂടുതൽ ജാഗ്രത പുലർത്തുമെന്നുമായിരുന്നു അദ്ദേഹത്തിന്റെ നിലപാട്. ഗാസയിൽ സംഘർഷം അവസാനിപ്പിക്കുന്നതിനായി അമേരിക്ക മുന്നോട്ടുവെച്ച പദ്ധതികളെ നെതന്യാഹു ഈ അവസരത്തിൽ പൂർണ്ണമായി തള്ളിക്കളഞ്ഞു.

ഹമാസിന്റെ നിരായുധീകരണം പൂർത്തിയാകുന്നതുവരെ ഗാസയിൽ നിന്ന് സൈന്യത്തെ പിൻവലിക്കില്ലെന്ന് അദ്ദേഹം ആവർത്തിച്ചു വ്യക്തമാക്കി. അമേരിക്കൻ ഭരണകൂടം ഇതിനോടകം കരട് രേഖ അയച്ചു നൽകിയിട്ടുണ്ടെങ്കിലും തങ്ങൾ അത് അംഗീകരിക്കാൻ തയ്യാറല്ലെന്ന് നെതന്യാഹു അറിയിച്ചു.

അത് തങ്ങളുടെ കരടല്ലെന്നും, ഇതുസംബന്ധിച്ച് തങ്ങളുടെ ഔദ്യോഗിക പ്രതികരണങ്ങൾ തിരികെ നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.