ഗൂഗിൾ ഇമേജ് സെർച്ചിന് കാൽനൂറ്റാണ്ട്; ജെന്നിഫർ ലോപ്പസിന്റെ ആ വസ്ത്രധാരണത്തിൽ തുടങ്ങി എഐ വിപ്ലവം വരെ

ഇന്റർനെറ്റ് ലോകത്തെ ചിത്രങ്ങളുടെ തിരച്ചിൽ സംവിധാനമായ ഗൂഗിൾ ഇമേജസ് (Google Images) പ്രവർത്തനമാരംഭിച്ചിട്ട് 25 വർഷം പിന്നിടുന്നു. പ്രശസ്ത ഗായികയും നടിയുമായ ജെന്നിഫർ ലോപ്പസ് 2000-ലെ ഗ്രാമി അവാർഡ് ചടങ്ങിൽ ധരിച്ച പച്ച നിറത്തിലുള്ള വർസാച്ചെ (Versace) ഗൗൺ ആണ് ഈ സംവിധാനത്തിന്റെ പിറവിക്ക് വഴിയൊരുക്കിയത്.

ഈ സംഭവത്തെക്കുറിച്ച് മുൻ ഗൂഗിൾ സിഇഒയും ചെയർമാനുമായ എറിക് ഷ്മിഡ്റ്റ് 2015-ൽ പ്രോജക്ട് സിൻഡിക്കേറ്റിൽ ഇങ്ങനെ കുറിച്ചു: “At the time, it was the most popular search query we had ever seen. But we had no surefire way of getting users exactly what they wanted: J­Lo wearing that dress.

Google Image Search was born.” പുതിയ മാറ്റങ്ങൾ
ഈ വാർഷികത്തോടനുബന്ധിച്ച് ഗൂഗിൾ ഇമേജസ് അതിന്റെ ഇന്റർഫേസിൽ വലിയ മാറ്റങ്ങൾ കൊണ്ടുവരുന്നു. ഉപയോക്താക്കൾക്ക് കൂടുതൽ വ്യക്തതയോടെ ചിത്രങ്ങൾ തിരയാനും കാണാനും കഴിയുന്ന ‘ബ്രൗസബിൾ ഹോം’ എന്ന പുതിയ രീതിയാണ് അവതരിപ്പിക്കുന്നത്.

തത്സമയം അപ്‌ഡേറ്റ് ചെയ്യപ്പെടുന്ന ചിത്രങ്ങളുടെ ഒരു ഗാലറിയാണ് ഇതിലുണ്ടാകുക. ഉപയോക്താക്കളുടെ താൽപ്പര്യങ്ങൾക്കനുസരിച്ച് ചിത്രങ്ങൾ ലഭ്യമാക്കുന്ന രീതിയിൽ ഇത് ക്രമീകരിച്ചിരിക്കുന്നു.

സേവ് ചെയ്യുന്ന ചിത്രങ്ങൾ ഗൂഗിൾ കലക്ഷൻ ടാബുകളിൽ സൂക്ഷിക്കാനും സൗകര്യമുണ്ടാകും. യുഎസിലെ ഡെസ്ക്ടോപ്പ് പതിപ്പിലാണ് ആദ്യഘട്ടത്തിൽ ഈ മാറ്റങ്ങൾ ലഭ്യമാകുക.

എഐ അധിഷ്ഠിത ചിത്രനിർമ്മാണം
ഇമേജ് സെർച്ചിനൊപ്പം തന്നെ ഗൂഗിൾ നിർണ്ണായകമായ മറ്റൊരു പ്രഖ്യാപനം കൂടി നടത്തിയിട്ടുണ്ട്. ഗൂഗിൾ സെർച്ചിലെ എഐ ഓവർവ്യൂവിൽ (AI Overviews) പുതിയതായി ഇമേജ് ജനറേഷൻ സൗകര്യം കൂടി ഉൾപ്പെടുത്തുകയാണ്.

നാനോ ബനാന 2 ലൈറ്റ് (Nano Banana 2 Lite) എന്ന അത്യാധുനിക മോഡൽ ഉപയോഗിച്ച് നൽകുന്ന ടെക്സ്റ്റ് നിർദ്ദേശങ്ങളെ (prompts) ചിത്രങ്ങളാക്കി മാറ്റാൻ ഇതിലൂടെ സാധിക്കും. വരും ആഴ്ചകളിൽ ഇംഗ്ലീഷ് ഭാഷയിൽ ഈ സേവനം ലഭ്യമാകും.

2009-ൽ സമാനമായ ചിത്രങ്ങൾ കണ്ടെത്താനുള്ള സൗകര്യം അവതരിപ്പിച്ചത് മുതൽ, ഈ വർഷം പുറത്തിറക്കിയ ‘സർക്കിൾ ടു സെർച്ച്’ (Circle to Search) വരെയുള്ള സാങ്കേതിക മുന്നേറ്റങ്ങളെ ഗൂഗിൾ പ്രത്യേകമായി ഓർമ്മിപ്പിച്ചു.