1947-ൽ ഇന്ത്യ സ്വാതന്ത്ര്യം നേടിയെങ്കിലും, ഗോവ, ദാമൻ, ദിയു തുടങ്ങിയ പ്രദേശങ്ങൾ 1961 വരെ പോർച്ചുഗീസ് അധീനതയിൽ തന്നെയായിരുന്നു. 1510-ൽ ഗോവയിൽ വേരുറപ്പിച്ച പോർച്ചുഗീസുകാർ തങ്ങളുടെ കൊളോണിയൽ ഭരണം വിപുലീകരിക്കുന്നതിന്റെ ഭാഗമായാണ് ‘പോർച്ചുഗീസ് ഇന്ത്യ’ എന്ന സംവിധാനം രൂപീകരിച്ചത്.
ഈ കാലഘട്ടത്തിൽ ഏറെ ശ്രദ്ധേയമായ ഒന്നായിരുന്നു ടി.എ.ഐ.പി (Transportes Aéreos da Índia Portuguesa) എന്ന വിമാന സർവീസ്. 1955 മുതൽ 1961-ൽ പോർച്ചുഗീസ് ഭരണം അവസാനിക്കുന്നത് വരെ ഈ സർക്കാർ വിമാനക്കമ്പനി പ്രവർത്തനനിരതമായിരുന്നു.
തങ്ങളുടെ ഇന്ത്യൻ അധീനപ്രദേശങ്ങളിലേക്ക് നേരിട്ടുള്ള വ്യോമപാത നിലനിർത്തുക എന്നതായിരുന്നു ഈ എയർലൈൻ സ്ഥാപിക്കുന്നതിന് പിന്നിലെ പ്രധാന ലക്ഷ്യം. ഇന്ത്യയും പോർച്ചുഗലും തമ്മിലുള്ള നയതന്ത്ര ബന്ധത്തിൽ വിള്ളലുകൾ വീണതോടെ, ഇന്ത്യൻ വ്യോമപാത ഉപയോഗിക്കുന്നതിലെ നിയന്ത്രണങ്ങളെ മറികടക്കാൻ ടി.എ.ഐ.പി പോർച്ചുഗീസുകാരെ സഹായിച്ചു.
ഇതിന്റെ ഭാഗമായി ഗോവ, ദാമൻ, ദിയു എന്നിവിടങ്ങളിൽ വിമാനത്താവളങ്ങളും അത്യാവശ്യമായ അടിസ്ഥാന സൗകര്യങ്ങളും അവർ വികസിപ്പിച്ചു. അടുത്തിടെ, ഈ വിമാനക്കമ്പനിയുടെ അപൂർവമായ ചിത്രങ്ങൾ സമൂഹമാധ്യമങ്ങളിൽ പ്രചരിച്ചത് വലിയ കൗതുകം ഉണർത്തിയിരുന്നു.
ടിക്കറ്റുകൾ, വിമാനത്തിനുള്ളിലെ ദൃശ്യങ്ങൾ, ജീവനക്കാർ, പൈലറ്റുമാർ, വെള്ള സാരി ധരിച്ച എയർ ഹോസ്റ്റസുമാർ എന്നിവരുടെ ചിത്രങ്ങൾ അക്കാലത്തെ വ്യോമയാന ചരിത്രത്തിലേക്ക് വെളിച്ചം വീശുന്നു. 1961 ഡിസംബർ 19-ന് ഗോവ ഇന്ത്യൻ യൂണിയന്റെ ഭാഗമായതോടെ ടി.എ.ഐ.പി എന്ന അധ്യായം പൂർണമായും അവസാനിച്ചു.
ഗോവ ഇന്ത്യയോട് ചേരുന്നതിന് തൊട്ടുമുമ്പുള്ള ദിവസമായ ഡിസംബർ 18-നായിരുന്നു ടി.എ.ഐ.പി തങ്ങളുടെ അവസാന നിർണായക സർവീസുകൾ നടത്തിയത്. ദബോലിം വിമാനത്താവളത്തിൽ ഉണ്ടായിരുന്ന ഡിസി-4 വിമാനം, ഇന്ത്യൻ സൈന്യത്തിന്റെ ഓപ്പറേഷനിടെയുണ്ടായ ബോംബാക്രമണങ്ങളെ അതിജീവിച്ച് മറ്റൊരു ടി.എ.പി (TAP) പോർച്ചുഗൽ വിമാനത്തിനൊപ്പം കറാച്ചിയിലേക്ക് പറന്നുയർന്നു.
അവിടെ നിന്ന് ലിസ്ബണിലേക്കുള്ള യാത്രയോടെ ടി.എ.ഐ.പി എന്ന വിമാനക്കമ്പനിയുടെ പ്രവർത്തനം എന്നെന്നേക്കുമായി നിലച്ചു. തുടർന്ന് ഗോവ കേന്ദ്രഭരണ പ്രദേശമായി മാറുകയും, 1987 മെയ് 30-ന് പൂർണ്ണ സംസ്ഥാന പദവി ലഭിക്കുകയും ചെയ്തു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
