പശ്ചിമ ബംഗാൾ ഉപതിരഞ്ഞെടുപ്പ്: സ്ഥാനാർത്ഥി പട്ടിക പുറത്തുവിട്ട് കോൺഗ്രസും ഇടത് മുന്നണിയും, പ്രതിസന്ധിയിൽ തൃണമൂൽ

പശ്ചിമ ബംഗാളിലെ പ്രധാനപ്പെട്ട രണ്ട് നിയമസഭാ മണ്ഡലങ്ങളായ നന്ദിഗ്രാം, റെജിനഗർ എന്നിവിടങ്ങളിൽ വരാനിരിക്കുന്ന ഉപതിരഞ്ഞെടുപ്പിനുള്ള സ്ഥാനാർത്ഥികളെ കോൺഗ്രസും ഇടത് മുന്നണിയും ഔദ്യോഗികമായി പ്രഖ്യാപിച്ചു.

അതേസമയം, ഭരണകക്ഷിയായ തൃണമൂൽ കോൺഗ്രസിൽ നിലനിൽക്കുന്ന രൂക്ഷമായ ഉൾപാർട്ടി ഭിന്നത കാരണം ഔദ്യോഗിക ചിഹ്നം ആർക്ക് ലഭിക്കുമെന്ന കാര്യത്തിൽ കടുത്ത അനിശ്ചിതത്വം തുടരുകയാണ്. മണ്ഡലങ്ങളിലെ ഒഴിവുകൾ സംബന്ധിച്ച് തിരഞ്ഞെടുപ്പ് കമ്മീഷന്റെ പ്രഖ്യാപനം വന്നതോടെയാണ് രാഷ്ട്രീയ നീക്കങ്ങൾ സജീവമായത്.

നന്ദിഗ്രാം മണ്ഡലത്തിൽ വിജയിച്ചിരുന്ന ബി.ജെ.പി നേതാവ് സുവേന്ദു അധികാരി മുഖ്യമന്ത്രിയായതിനെ തുടർന്ന് സ്ഥാനം രാജിവെച്ച ഒഴിവിലേക്കാണ് തിരഞ്ഞെടുപ്പ് നടക്കുന്നത്. അതുപോലെ റെജിനഗറിൽ വിജയം നേടിയിരുന്ന എ.ജെ.യു.പി നേതാവ് ഹുമയൂൺ കബീറും തന്റെ എം.എൽ.എ സ്ഥാനം രാജിവെച്ചിരുന്നു.

ഈ ഒഴിവുകളിലേക്ക് വരുന്ന ഒക്ടോബർ 6-ന് ഉപതിരഞ്ഞെടുപ്പ് നടക്കുമെന്നും ഒക്ടോബർ 9-ന് വോട്ടെണ്ണൽ നടക്കുമെന്നും കമ്മീഷൻ അറിയിച്ചിട്ടുണ്ട്. കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെ അംഗീകരിച്ച ഔദ്യോഗിക സ്ഥാനാർത്ഥി പട്ടിക പാർട്ടി ഇതിനോടകം പുറത്തുവിട്ടിട്ടുണ്ട്.

ഇതനുസരിച്ച് റെജിനഗറിൽ മുഹമ്മദ് അബ്ദുള്ളഹിൽ കാഫിയും, നന്ദിഗ്രാമിൽ മിലൻ പ്രദേശും കോൺഗ്രസ് ടിക്കറ്റിൽ ജനവിധി തേടും. മറുവശത്ത്, ഇടതുമുന്നണി സ്ഥാനാർത്ഥികളെയും പ്രഖ്യാപിച്ചു കഴിഞ്ഞു.

അഡ്വ. സയീദ് അസദ് അലി റെജിനഗറിലും, ശാന്തി ഗോപാൽ ഗിരി നന്ദിഗ്രാമിലും സി.പി.ഐ സ്ഥാനാർത്ഥിയായും മത്സരിക്കുമെന്ന് ഇടതുമുന്നണി നേതൃത്വം വ്യക്തമാക്കി.

കഴിഞ്ഞ മെയ് മാസത്തിൽ നടന്ന ഫൽത്ത ഉപതിരഞ്ഞെടുപ്പിൽ സി.പി.ഐ (എം) സ്ഥാനാർത്ഥി ശംഭുനാഥ് കുർമി തൃണമൂലിനെ പിന്തള്ളി രണ്ടാം സ്ഥാനത്തെത്തിയിരുന്നു. ഇതിന്റെ തുടർച്ചയെന്നോണം, ജനകീയ വിഷയങ്ങളിൽ ഊന്നിക്കൊണ്ട് തങ്ങളുടെ രാഷ്ട്രീയ സ്വാധീനം കൂടുതൽ ശക്തമാക്കാനാണ് ഇടത് മുന്നണി ലക്ഷ്യമിടുന്നത്.

എന്നാൽ, കടുത്ത വിഭാഗീയത നേരിടുന്ന തൃണമൂൽ കോൺഗ്രസിൽ പാർട്ടി ചിഹ്നത്തെ ചൊല്ലിയുള്ള തർക്കം മുറുകുകയാണ്. ഇതുവരെയും അവർ സ്ഥാനാർത്ഥികളെ പ്രഖ്യാപിച്ചിട്ടില്ല.

പാർട്ടിക്കുള്ളിലെ അനൈക്യം കാരണം ഔദ്യോഗിക ചിഹ്നമായ ‘രണ്ട് പൂക്കളും പുൽച്ചെടിയും’ ആർക്ക് അനുവദിക്കണമെന്ന കാര്യത്തിൽ തിരഞ്ഞെടുപ്പ് കമ്മീഷനും ഇതുവരെ അന്തിമ തീരുമാനത്തിലെത്തിയിട്ടില്ല. മമത ബാനർജിയുടെ നേതൃത്വത്തിലുള്ള വിഭാഗവും ഋതബ്രത ബാനർജിയുടെ നേതൃത്വത്തിലുള്ള വിഭാഗവും ചിഹ്നത്തിനായി ശക്തമായ അവകാശവാദമാണ് ഉന്നയിക്കുന്നത്.

കമ്മീഷന്റെ ഭാഗത്തുനിന്നും തീരുമാനം വൈകിയാൽ, തൃണമൂൽ സ്ഥാനാർത്ഥികൾക്ക് പാർട്ടി ചിഹ്നമില്ലാതെ സ്വതന്ത്രരായി ജനവിധി തേടേണ്ട ഗതികേട് ഉണ്ടായേക്കാം.

സംസ്ഥാനത്ത് ശക്തമായ സ്വാധീനമുള്ള ബി.ജെ.പിയും ഇതുവരെ തങ്ങളുടെ സ്ഥാനാർത്ഥി പട്ടിക പുറത്തുവിട്ടിട്ടില്ല. ഈ തിരഞ്ഞെടുപ്പ് ഫലം ബി.ജെ.പിയെ സംബന്ധിച്ച് സർക്കാരിന്റെ നിലവിലുള്ള ഭൂരിപക്ഷത്തെ ബാധിക്കില്ലെങ്കിലും, ഇടത് മുന്നണിയോ കോൺഗ്രസോ വിജയിക്കുകയാണെങ്കിൽ അത് സംസ്ഥാനത്തെ രാഷ്ട്രീയ സാഹചര്യങ്ങളിൽ വലിയ മാറ്റങ്ങൾക്ക് വഴിവെച്ചേക്കുമെന്നാണ് വിലയിരുത്തപ്പെടുന്നത്.