സംസ്ഥാനത്തെ ദേശീയപാത 66 ഉൾപ്പെടെയുള്ള റോഡ് വികസനത്തിന്റെ ഭാഗമായി ലക്ഷക്കണക്കിന് മരങ്ങൾ മുറിച്ചുനീക്കിയെങ്കിലും, അവയ്ക്ക് പകരമായി പുതിയ മരങ്ങൾ നട്ടുപിടിപ്പിക്കുന്ന നടപടികൾ ഇനിയും പൂർണ്ണമായിട്ടില്ല. വികസന പ്രവർത്തനങ്ങൾ ആരംഭിച്ച ഘട്ടത്തിൽ, മുറിച്ചുമാറ്റുന്ന ഓരോ മരത്തിനു പകരം 10 മരങ്ങൾ വീതം വെച്ചുപിടിപ്പിക്കുമെന്നായിരുന്നു അധികൃതരുടെ പ്രഖ്യാപനം.
എന്നാൽ, പദ്ധതിയുമായി ബന്ധപ്പെട്ട സാമ്പത്തിക ശുപാർശകൾ അന്തിമമാകാത്തതിനാലും ചെലവുകൾ സംബന്ധിച്ച അവ്യക്തതകൾ നിലനിൽക്കുന്നതിനാലും ദേശീയപാത അതോറിറ്റി ഇതിനായി തുക അനുവദിച്ചിട്ടില്ല.
സാധാരണഗതിയിൽ ഇത്തരം പദ്ധതികളിൽ നഷ്ടപ്പെടുന്ന മരങ്ങൾക്ക് പകരമായി വൃക്ഷത്തൈകൾ നടാൻ ഫണ്ട് അനുവദിക്കാറുണ്ട്. കരാർ കമ്പനികളോ വനംവകുപ്പിന്റെ സാമൂഹിക വനവൽക്കരണ വിഭാഗമോ ആണ് ഇതിന്റെ മേൽനോട്ടം വഹിക്കേണ്ടത്.
നിലവിൽ ദേശീയപാത 66-ന്റെ വിവിധ റീച്ചുകളിൽ സമർപ്പിക്കപ്പെട്ട ശുപാർശകളിൽ ചെലവ് കണക്കാക്കുന്നതിൽ ഏകീകൃത സ്വഭാവമില്ലാത്തതാണ് തടസ്സങ്ങൾക്ക് പ്രധാന കാരണം.
സംസ്ഥാനത്തൊട്ടാകെ ഏകീകൃത നിരക്ക് നിശ്ചയിച്ച് പുതിയൊരു ശുപാർശ സമർപ്പിക്കാനുള്ള നീക്കത്തിലാണ് വനംവകുപ്പ്. സർക്കാർ തലത്തിലുള്ള തീരുമാനങ്ങൾക്ക് ശേഷമേ ഇതിനായുള്ള തുക ദേശീയപാത അതോറിറ്റിയിൽ നിന്ന് ലഭ്യമാകൂ.
സംസ്ഥാനത്താകെ ഒന്നര ലക്ഷത്തിലധികം മരങ്ങളാണ് റോഡ് വികസനത്തിനായി മുറിച്ചുമാറ്റിയത്. ഇതിനു പകരമായി 15 ലക്ഷത്തോളം വൃക്ഷത്തൈകൾ നട്ടുപിടിപ്പിക്കേണ്ടതുണ്ട്.
എങ്കിൽ മാത്രമേ ഇതിൽ പത്തിലൊന്നെങ്കിലും പരിപാലിക്കപ്പെട്ട് വളരുകയുള്ളൂ എന്നാണ് വിലയിരുത്തൽ. ഫണ്ട് ലഭ്യമായാലും സ്ഥലലഭ്യത വലിയൊരു വെല്ലുവിളിയാണ്.
ജനസാന്ദ്രതയേറിയ മേഖലകളിൽ തൈകൾ നടാൻ കഴിയാതെ വരുമ്പോൾ സമീപപ്രദേശങ്ങളെ ആശ്രയിക്കേണ്ടി വരും. ലഭിക്കുന്ന ഫണ്ട് ഉപയോഗിച്ച് തീരസംരക്ഷണത്തിനായുള്ള വനവൽക്കരണ പ്രവർത്തനങ്ങളും ആസൂത്രണം ചെയ്യുന്നുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
