തിരുവനന്തപുരം ഡിവിഷനിൽ പുതിയ ചരിത്രമെഴുതാൻ കോട്ടയം റെയിൽവേ സ്റ്റേഷൻ; അതിവേഗ വാട്ടറിങ് സംവിധാനം വരുന്നു

തിരുവനന്തപുരം ഡിവിഷനിലെ എല്ലാ പ്ലാറ്റ്ഫോമുകളിലും അതിവേഗത്തിൽ ജലം ലഭ്യമാക്കുന്ന സംവിധാനം നടപ്പിലാക്കുന്ന ആദ്യ റെയിൽവേ സ്റ്റേഷനായി കോട്ടയം മാറുന്നു. ഇതിന്റെ ഭാഗമായി പൈപ്പ് ലൈൻ സൗകര്യമില്ലാത്ത പ്ലാറ്റ്ഫോമുകളിൽ പൈപ്പുകൾ സ്ഥാപിക്കുന്ന പ്രവൃത്തികൾ ഇതിനോടകം ആരംഭിച്ചിട്ടുണ്ട്.

വരാനിരിക്കുന്ന ശബരിമല തീർത്ഥാടന സീസണിന് മുൻപായി മുഴുവൻ നിർമ്മാണ ജോലികളും പൂർത്തീകരിക്കാനാണ് റെയിൽവേ ലക്ഷ്യമിടുന്നത്. റെയിൽവേയുടെ മെക്കാനിക്കൽ വിഭാഗത്തിനാണ് ഈ പദ്ധതിയുടെ മേൽനോട്ട

ചുമതല നൽകിയിട്ടുള്ളത്. പദ്ധതിയുടെ വിശദാംശങ്ങൾ
സ്റ്റേഷനിലെ മുഴുവൻ പ്ലാറ്റ്ഫോമുകളിലും ട്രെയിനുകളിലേക്ക് വെള്ളം നിറയ്ക്കുന്നതിനായി പ്രത്യേക പൈപ്പ് ലൈൻ ശൃംഖലയാണ് സജ്ജമാക്കുന്നത്.

നിലവിൽ നാല് പ്ലാറ്റ്ഫോമുകളിൽ മാത്രമാണ് ഈ സൗകര്യം നിലവിലുള്ളത്. അതിവേഗത്തിൽ ജലം നിറയ്ക്കാൻ സഹായിക്കുന്ന ഹൈ പ്രഷർ ക്വിക് വാട്ടറിങ് സിസ്റ്റത്തിലേക്ക് (ക്യുഡബ്ല്യുഎസ്) സ്റ്റേഷനിലെ മുഴുവൻ ലൈനുകളും ഘട്ടംഘട്ടമായി മാറ്റും.

ഇതിനായി 40 എച്ച്പി ശേഷിയുള്ള മൂന്ന് പുതിയ പമ്പുകളാണ് സ്ഥാപിക്കുന്നത്. സാധാരണയായി 24 കോച്ചുകളുള്ള ഒരു എക്സ്പ്രസ് ട്രെയിനിൽ വെള്ളം നിറയ്ക്കാൻ നിലവിൽ 30 മുതൽ 40 മിനിറ്റ് വരെ സമയമെടുക്കുന്നുണ്ട്.

എന്നാൽ പുതിയ സംവിധാനം യാഥാർത്ഥ്യമാകുന്നതോടെ കേവലം 10 മിനിറ്റിനുള്ളിൽ 24 കോച്ചുകളിലും പൂർണ്ണമായി വെള്ളം നിറയ്ക്കാൻ സാധിക്കും. യാത്രക്കാർക്ക് ലഭിക്കുന്ന പ്രധാന നേട്ടങ്ങൾ
സ്റ്റേഷനിലെ മുഴുവൻ പ്ലാറ്റ്‌ഫോമുകളിൽ നിന്നും നേരിട്ട് ട്രെയിൻ സർവീസുകൾ ആരംഭിക്കാൻ പുതിയ സംവിധാനത്തിലൂടെ സാധിക്കും.

നിലവിൽ അഞ്ചാമത്തെ പ്ലാറ്റ്‌ഫോമിൽ നിന്ന് ഒരു ട്രെയിൻ സർവീസ് ആരംഭിക്കണമെങ്കിൽ, ശുചീകരണത്തിന് ശേഷം വെള്ളം നിറയ്ക്കുന്നതിനായി ട്രെയിൻ മറ്റ് പ്ലാറ്റ്‌ഫോമുകളിലേക്ക് മാറ്റിയിടേണ്ട അവസ്ഥയാണുള്ളത്.

വെള്ളം നിറയ്ക്കാൻ ആവശ്യമായ സമയം ഗണ്യമായി കുറയുന്നത് വഴി കൂടുതൽ ട്രെയിനുകൾ ഒരേസമയം കൈകാര്യം ചെയ്യാൻ റെയിൽവേയ്ക്ക് സാധിക്കും. കോട്ടയത്തു നിന്ന് പുറപ്പെടുന്ന പുതിയ ട്രെയിൻ സർവീസുകൾ ആരംഭിക്കുന്നതിനുള്ള നടപടികൾ വേഗത്തിലാക്കണം.

ഒന്ന്, രണ്ട് പ്ലാറ്റ്‌ഫോമുകൾ കോട്ടയം വഴി കടന്നുപോകുന്ന ട്രെയിനുകളുടെ കൈകാര്യത്തിനായി ഉപയോഗിക്കുന്നവയാണ്. തുടർന്നുള്ള മൂന്ന്, നാല്, അഞ്ച് പ്ലാറ്റ്‌ഫോമുകളിലെ ജലവിതരണ സംവിധാനം പ്രയോജനപ്പെടുത്തി പുതിയ സർവീസുകൾ ആരംഭിക്കേണ്ടതാണ്.

അറ്റകുറ്റപ്പണികൾക്കുള്ള പ്രത്യേക സൗകര്യങ്ങൾ ഇല്ലാത്ത സ്റ്റേഷൻ ആയതിനാൽ, സർവീസ് ആരംഭിക്കുന്ന സ്റ്റേഷനിൽ അറ്റകുറ്റപ്പണി പൂർത്തിയാക്കി കോട്ടയത്ത് എത്തി മടങ്ങിപ്പോകുന്ന ‘ടേൺ എറൗണ്ട്’ രീതിയിൽ മാത്രമെ നിലവിൽ പുതിയ സർവീസുകൾ തുടങ്ങാനാകൂ. വെള്ളം കയറ്റുക, ശുചീകരിക്കുക എന്നീ പ്രവൃത്തികളാണ് ഇവിടെ പ്രധാനമായും നടക്കേണ്ടത്.

പുതിയ സാങ്കേതികവിദ്യ എത്തുന്നതോടെ ഈ നടപടികൾ ഏറെ എളുപ്പമാകും. എറണാകുളത്ത് സർവീസ് അവസാനിപ്പിക്കുന്ന മുംബൈ–എറണാകുളം തുരന്തോ എക്സ്പ്രസ്, കാരയ്ക്കൽ–എറണാകുളം എക്സ്പ്രസ്, ബെംഗളൂരു–എറണാകുളം ഇന്റർസിറ്റി എക്സ്പ്രസ്, പുണെ–എറണാകുളം ബൈ വീക്ക്‌ലി, മഡ്ഗാവ്–എറണാകുളം എക്സ്പ്രസ് തുടങ്ങിയ ട്രെയിനുകൾ കോട്ടയത്തേക്ക് നീട്ടണമെന്ന് നേരത്തെ തന്നെ ശുപാർശയുണ്ട്.

ഈ നടപടികൾ എത്രയും പെട്ടെന്ന് പൂർത്തിയാക്കണം. ഇതിനൊപ്പം കോട്ടയത്തുനിന്ന് മംഗളൂരു, കോയമ്പത്തൂർ, മുംബൈ നഗരങ്ങളിലേക്കും പുതിയ ട്രെയിൻ സർവീസുകൾ ആരംഭിക്കാനുള്ള നിർദ്ദേശങ്ങൾ പരിഗണനയിലുണ്ട്.

ഒന്നാം നമ്പരിന്റെ ഉപ പ്ലാറ്റ്‌ഫോമിന്റെ സാധ്യതകൾ ഇതുവരെ കോട്ടയത്ത് കാര്യക്ഷമമായി പ്രയോജനപ്പെടുത്തിയിട്ടില്ല. മെമു, പാസഞ്ചർ സർവീസുകൾ ഈ ഭാഗം കേന്ദ്രീകരിച്ച് ആരംഭിക്കണം.

ഇതുവഴി രാവിലെയും വൈകിട്ടുമുള്ള ട്രെയിനുകളിലെ അമിത തിരക്കിന് വലിയൊരു പരിഹാരം കാണാൻ സാധിക്കും. നിലവിലുള്ള വേണാട്, പാലരുവി, മെമു ട്രെയിനുകളിൽ പല ദിവസങ്ങളിലും യാത്രക്കാർക്ക് തിക്കിത്തിരക്കേണ്ടി വരുന്ന സാഹചര്യം ഒഴിവാക്കാൻ ഇത് സഹായിക്കും.