നിർണായക അഭിമുഖത്തിന് മുൻപ് മകന് ധൈര്യേകിയ അച്ഛന്റെ സ്നേഹസ്പർശം; ഹൃദയഹാരിയായ വീഡിയോ വൈറൽ

നാം എത്രയൊക്കെ വളർന്നാലും മാതാപിതാക്കളെ സംബന്ധിച്ച് നമ്മൾ എന്നും കുട്ടികൾ തന്നെയായിരിക്കും. അത്തരം നിഷ്കളങ്കമായ കരുതലും സ്നേഹവും പ്രതിഫലിപ്പിക്കുന്ന ഒരു ദൃശ്യമാണ് ഇപ്പോൾ സാമൂഹിക മാധ്യമങ്ങളിൽ ഏറെ ശ്രദ്ധനേടുന്നത്.

ജീവിതത്തിലെ വഴിത്തിരിവാകുന്ന നിർണായകമായ അഭിമുഖത്തിന് പ്രവേശിക്കുന്നതിന് തൊട്ടുമുമ്പ്, മകന് ആത്മവിശ്വാസവും ധൈര്യവും പകർന്നുനൽകുന്ന ഒരു പിതാവിന്റെ ഹൃദയസ്പർശിയായ ദൃശ്യങ്ങളാണ് പുറത്തുവന്നിരിക്കുന്നത്. ഉത്തർപ്രദേശ് പബ്ലിക് സർവീസ് കമ്മീഷൻ ആസ്ഥാനമായ പ്രയാഗ്‌രാജിലെ ‘സരസ്വതി ഭവനിൽ’ നിന്നാണ് ഈ മനോഹരമായ കാഴ്ച ക്യാമറയിൽ പകർത്തിയത്.

ഇൻസ്റ്റാഗ്രാമിൽ PRABHAKAR SINGH (@target_with_p_s_parihar) എന്ന അക്കൗണ്ടിലൂടെയാണ് ഈ വീഡിയോ പങ്കുവെക്കപ്പെട്ടിട്ടുള്ളത്. അഭിമുഖ ഹാളിലേക്ക് പോകുന്നതിന് നിമിഷങ്ങൾ മാത്രം ബാക്കിനിൽക്കെ, മകന്റെ കോട്ട് ശരിപ്പെടുത്തി നൽകുന്ന പിതാവിനെയാണ് വീഡിയോയുടെ തുടക്കത്തിൽ കാണാൻ സാധിക്കുന്നത്.

തുടർന്ന് തന്റെ പോക്കറ്റിൽ നിന്നും ചീർപ്പ് പുറത്തെടുത്ത് മകന്റെ മുടി ഒതുക്കിക്കൊടുക്കുന്ന സ്നേഹനിധിയായ അച്ഛനെ ദൃശ്യങ്ങളിൽ കാണാം. വിശേഷപ്പെട്ട

ഒരു കാര്യത്തിന് തുടക്കമിടുമ്പോൾ വീട്ടിൽ നിന്നും നൽകുന്നതുപോലെ അല്പം മധുരം മകന് നൽകി അദ്ദേഹം അനുഗ്രഹിക്കുകയും ചെയ്യുന്നു. ഇതിനുശേഷം പിതാവിന്റെ കാൽക്കൽ തൊട്ട് വണങ്ങി അനുഗ്രഹം വാങ്ങിയ ശേഷമാണ് യുവാവ് അഭിമുഖ ഹാളിലേക്ക് പ്രവേശിക്കുന്നത്.

വർഷങ്ങളുടെ കഷ്ടപ്പാടുകളുടെയും കഠിനാധ്വാനത്തിന്റെയും സ്വപ്നങ്ങളുടെയും ആകെത്തുകയാണ് ഈ കൊച്ചു വീഡിയോയെന്നാണ് സാമൂഹിക മാധ്യമങ്ങളിൽ ഉയരുന്ന പ്രധാന അഭിപ്രായം. ഇന്ത്യയിലെ മത്സരപ്പരീക്ഷകൾ വെറുമൊരു വ്യക്തിയുടെ മാത്രം വിജയമോ പരാജയമോ അല്ല, മറിച്ച് അതിനുപിന്നിൽ ഒരു കുടുംബത്തിന്റെ മുഴുവൻ പ്രാർത്ഥനകളും കാത്തിരിപ്പുമുണ്ടാകും എന്നതിന്റെ ഉത്തമ തെളിവാണ് ഈ ദൃശ്യങ്ങൾ.

ഈ അച്ഛന്റെയും മകന്റെയും സ്നേഹബന്ധത്തിന് ആശംസകളുമായി നിരവധിപേരാണ് ഇതിനോടകം രംഗത്തെത്തിയിട്ടുള്ളത്. ആകെ 812 ഒഴിവുകളിലേക്ക് നടക്കുന്ന യു.പി.പി.എസ്.സി 2025 അഭിമുഖങ്ങളാണ് നിലവിൽ പ്രയാഗ്‌രാജിൽ പുരോഗമിക്കുന്നത്.

മുഖ്യ പരീക്ഷയിൽ വിജയം കൈവരിച്ച 2,297 ഉദ്യോഗാർത്ഥികളാണ് ഈ അഭിമുഖ പ്രക്രിയയിൽ പങ്കെടുക്കുന്നത്. കഴിഞ്ഞ സെപ്റ്റംബർ 28 -ന് ആരംഭിച്ച അഭിമുഖങ്ങൾ ഒക്ടോബർ 24 വരെ രണ്ട് ഷിഫ്റ്റുകളിലായി തുടരുന്നതാണ്.