തളിപ്പറമ്പ് മണ്ഡലത്തിലെ സ്വതന്ത്ര എംഎൽഎ ടി കെ ഗോവിന്ദന് നേരെ വധഭീഷണി. വൈകുന്നേരം ഒരു പൊതുപരിപാടിയിൽ പങ്കെടുക്കുന്നതിനിടെയാണ് അജ്ഞാത നമ്പറിൽ നിന്ന് എംഎൽഎയുടെ ഫോണിലേക്ക് ഭീഷണി സന്ദേശം എത്തിയത്.
‘ഈ യാത്ര അധികമുണ്ടാകില്ല, പണി ജയിലിൽ ഉള്ളവർ നോക്കും’ എന്നായിരുന്നു ഫോൺ വിളിച്ചയാൾ ഭീഷണിപ്പെടുത്തിയത്. ഇതിനു പുറമെ, ആഭ്യന്തര മന്ത്രി രമേശ് ചെന്നിത്തലയെ അങ്ങേയറ്റം അസഭ്യമായ ഭാഷയിൽ ഫോൺ വിളിച്ചയാൾ അധിക്ഷേപിക്കുകയും ചെയ്തു.
സംഭവത്തിൽ ഗൗരവമായ സുരക്ഷാ ഭീഷണി കണക്കിലെടുത്ത് ടി കെ ഗോവിന്ദൻ മയ്യിൽ പൊലീസിൽ ഔദ്യോഗികമായി പരാതി സമർപ്പിച്ചു. തളിപ്പറമ്പിൽ പി കെ ശ്യാമളയെ സ്ഥാനാർഥിയാക്കിയതിലുള്ള അതൃപ്തിയെത്തുടർന്ന് സിപിഎം ബന്ധം ഉപേക്ഷിച്ച വ്യക്തിയാണ് ടി കെ ഗോവിന്ദൻ.
തുടർന്ന് യുഡിഎഫ് പിന്തുണയോടെ സ്വതന്ത്ര സ്ഥാനാർഥിയായി മത്സരിച്ച് പാർട്ടിയുടെ ശക്തികേന്ദ്രത്തിൽ അദ്ദേഹം വിജയിക്കുകയായിരുന്നു. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
