സൗദി അറേബ്യയുടെ തലസ്ഥാനമായ റിയാദ് ലക്ഷ്യമാക്കി യെമനിലെ ഹൂതി വിമതരുടെ ആക്രമണം തുടരുന്നു. കിംഗ് ഖാലിദ് എയർപോർട്ടിന് നേരെ 24 മണിക്കൂറിനിടെ മൂന്നാം തവണയാണ് ആക്രമണമുണ്ടായത്.
ഇതിനുപുറമേ നജ്റാൻ വിമാനത്താവളവും വിമതർ ലക്ഷ്യമിട്ടു. ഇവിടെ മിസൈൽ അവശിഷ്ടങ്ങൾ പതിച്ച് നഴ്സറിക്കും മെഡിക്കൽ കോംപ്ലക്സിനും നാശനഷ്ടങ്ങൾ സംഭവിച്ചിട്ടുണ്ട്.
ആക്രമണങ്ങളുടെ പശ്ചാത്തലത്തിൽ റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തിന്റെ പ്രവർത്തനങ്ങളിൽ കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്. വിമാനക്കമ്പനികളുടെ കൃത്യമായ അറിയിപ്പ് ലഭിച്ച ശേഷം മാത്രമേ യാത്രക്കാർ എയർപോർട്ടിലേക്ക് പുറപ്പെടാവൂ എന്ന് അധികൃതർ നിർദ്ദേശം നൽകി.
മേഖലയിലെ സുരക്ഷാ സാഹചര്യം വഷളായതിനെ തുടർന്ന് എയർ ഇന്ത്യ റിയാദിലേക്കും തിരിച്ചുമുള്ള വിമാന സർവീസുകൾ ഒക്ടോബർ 10 വരെ താത്കാലികമായി നിർത്തിവെച്ചു. സാഹചര്യങ്ങൾ വിലയിരുത്തിയ ശേഷമാകും സർവീസുകൾ പുനരാരംഭിക്കുന്നത് സംബന്ധിച്ച അന്തിമ തീരുമാനം.
റിയാദിലെയും പരിസര പ്രദേശങ്ങളിലെയും നിലവിലെ സ്ഥിതിഗതികൾ ഗൗരവമായി കണ്ട് ഇന്ത്യൻ എംബസി പ്രവാസികൾക്കായി ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. അത്യാവശ്യ ഘട്ടങ്ങളിലല്ലാതെ വീടുകൾക്ക് പുറത്തിറങ്ങരുതെന്നും പ്രാദേശിക ഭരണകൂടവും എംബസിയും നൽകുന്ന സുരക്ഷാ നിർദ്ദേശങ്ങൾ കർശനമായി പാലിക്കണമെന്നും അധികൃതർ ആവശ്യപ്പെട്ടു.
അതേസമയം, സൗദി അറേബ്യയിലെ എണ്ണ ശുദ്ധീകരണ ശാലകളിൽ ജോലി ചെയ്യുന്ന തൊഴിലാളികൾ ഉടനടി അവിടെനിന്ന് ഒഴിഞ്ഞു പോകണമെന്ന് ഹൂതി വിമതർ മുന്നറിയിപ്പ് നൽകിയിട്ടുണ്ട്. സൗദിയുടെ പ്രധാന ഇന്ധന സംഭരണ കേന്ദ്രങ്ങൾ തങ്ങളുടെ ലക്ഷ്യമാണെന്നും തൊഴിലാളികൾ ജീവൻ അപകടത്തിലാക്കരുതെന്നും ഹൂതി വിമത വക്താവ് വ്യക്തമാക്കി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
