യുഎസിൽ തത്സമയ വാർത്താ സംപ്രേഷണത്തിനിടയിൽ കൺമുന്നിൽ കാറപകടം; പ്രൊഫഷണലിസം കൈവിടാതെ റിപ്പോർട്ടർ

തത്സമയ വാർത്താ സംപ്രേഷണത്തിനിടയിൽ കൺമുന്നിൽ അരങ്ങേറിയ ഭീകരമായ കാറപകടത്തിൽ മാധ്യമപ്രവർത്തകൻ പ്രകടിപ്പിച്ച സംയമനവും പ്രതികരണവും സമൂഹമാധ്യമങ്ങളിൽ വലിയ തോതിൽ ചർച്ചയാകുന്നു. അപകടം കണ്ട

ഉടൻ തന്നെ ഞെട്ടൽ മറികടന്ന് അതിവേഗം സമചിത്തത വീണ്ടെടുക്കുകയും തന്റേതായ കർത്തവ്യത്തിലേക്ക് തിരികെ പ്രവേശിക്കുകയും ചെയ്ത ഈ മാധ്യമപ്രവർത്തകന്റെ പ്രൊഫഷണലിസത്തെ പ്രശംസിച്ച് നിരവധി പേരാണ് രംഗത്തെത്തിയത്. യുഎസിലെ ഒഹായോ സംസ്ഥാനത്തുള്ള സിൻസിനാറ്റിയിലെ കാലാവസ്ഥാ – ട്രാഫിക് റിപ്പോർട്ടറായ കെ ജെ ജേക്കബ്സ് തത്സമയ ട്രാഫിക് അപ്‌ഡേറ്റ് നൽകിക്കൊണ്ടിരിക്കുമ്പോഴാണ് ട്രാഫിക് ക്യാമറയ്ക്ക് മുന്നിൽ അപ്രതീക്ഷിതമായ ഈ സംഭവം അരങ്ങേറിയത്.

ഇൻ്റർസ്റ്റേറ്റ് 71 ഹൈവേയുടെ നടുവിലത്തെ വരിയിൽ കേടായി കിടന്നിരുന്ന ഒരു വാഹനത്തിന് ചുറ്റും ഗതാഗതം മന്ദഗതിയിലാകുന്നതിനെക്കുറിച്ച് വിശദീകരിക്കുന്നതിനിടയിലായിരുന്നു സംഭവം. ഇതിനിടയിൽ ഹൈവേയിലേക്ക് പ്രവേശിച്ച മറ്റൊരു കാർ നിയന്ത്രണം വിട്ട് നിർത്തിയിട്ടിരുന്ന വാഹനത്തിലേക്ക് ശക്തമായി ഇടിച്ചുകയറുകയായിരുന്നു.

കൺമുന്നിൽ നടന്ന അപ്രതീക്ഷിത ആഘാതത്തിൽ സ്വാഭാവികമായും ഞെട്ടിപ്പോയ ജേക്കബ്സിന്റെ നാവിൽ നിന്ന് പെട്ടെന്ന് “Oh sh..!” എന്ന വാക്ക് അറിയാതെ പുറത്തുവന്നു. എന്നാൽ, അണയാത്ത ജാഗ്രതയോടെ ഉടനടി സ്വയം നിയന്ത്രിച്ച അദ്ദേഹം ആ വാക്ക് അപൂർണ്ണമായി നിർത്തി.

തുടർന്ന് അദ്ദേഹം ടെലിവിഷൻ പ്രേക്ഷകരോട് മാപ്പ് ചോദിക്കുകയും ചെയ്തു. “അയ്യോ, എന്നോട് ക്ഷമിക്കണം!

കൺമുന്നിലാണ് ആ അപകടം നടന്നത്, അറിയാതെ അനുചിതമായ എന്തോ എന്‍റെ നാവിൽ നിന്ന് വരാൻ പോയതാണ്. തത്സമയം ഒരു കാർ മറ്റൊരു കാറിലേക്ക് ഇടിച്ചുകയറുന്നത് നിങ്ങൾക്ക് കാണാം.” എന്ന് അദ്ദേഹം വ്യക്തമാക്കി.

പെട്ടെന്നുണ്ടായ അടിയന്തിര സാഹചര്യത്തിൽ നിന്നും വേഗത്തിൽ കരകയറിയ ജേക്കബ്സ് ക്യാമറയ്ക്ക് മുന്നിൽ കാണികൾ കണ്ട ദൃശ്യങ്ങൾ തികഞ്ഞ ശാന്തതയോടെ തുടർന്ന് വിശദീകരിക്കുകയുണ്ടായി.

പിന്നീട് ഈ സംപ്രേഷണത്തിന്‍റെ ദൃശ്യങ്ങൾ അദ്ദേഹം തന്‍റെ ഇൻസ്റ്റാഗ്രാം പേജിലൂടെ പങ്കുവെക്കുകയുമുണ്ടായി. സ്വന്തം പ്രതികരണത്തെക്കുറിച്ച് അദ്ദേഹം കുറിച്ചത് ഇങ്ങനെയാണ്: “ലൈവ് ടിവിയിലെ വളരെ സ്വാഭാവികമായ ഒരു പ്രതികരണമായിരുന്നു അത്, പക്ഷേ കൃത്യസമയത്ത് നാവിനെ നിയന്ത്രിക്കാൻ കഴിഞ്ഞതിൽ സന്തോഷമുണ്ട്!” തത്സമയ സംപ്രേഷണത്തിനിടയിലെ അപ്രതീക്ഷിത സമ്മർദ്ദത്തിലും സാധാരണക്കാരെപ്പോലെ പ്രതികരിച്ച അദ്ദേഹത്തിന്‍റെ സ്വാഭാവികതയും, തുടർന്ന് സെക്കൻഡുകൾക്കുള്ളിൽ വാർത്താ അവതരണത്തിലേക്ക് തിരിച്ചെത്തിയ കർത്തവ്യബോധവും മാതൃകാപരമാണെന്ന് ചൂണ്ടിക്കാട്ടി നിരവധി പേരാണ് സമൂഹമാധ്യമങ്ങളിൽ കുറിപ്പുകൾ പങ്കുവെക്കുന്നത്.