പെരുമ്പാവൂരിൽ യുവാക്കൾക്ക് നേരെ ആൾക്കൂട്ട മർദനം: വസ്ത്രം അഴിപ്പിച്ച് തല മൊട്ടയടിച്ചു; ആറുപേർ അറസ്റ്റിൽ

പെരുമ്പാവൂർ കണ്ടന്തറയിൽ ലഹരി വിൽപനക്കാരാണെന്ന് ആരോപിച്ച് മൂന്ന് യുവാക്കൾക്ക് നേരെ ആൾക്കൂട്ടത്തിന്റെ ക്രൂര മർദനം. സംഭവത്തിൽ ആറുപേരെ പെരുമ്പാവൂർ പോലീസ് അറസ്റ്റ് ചെയ്തു.

സാജിദ്, മാഹിൻ കുട്ടി, ഷെമീർ, ഷെരീഫ്, റഫീക്ക്, അൻവർ എന്നിവരാണ് പിടിയിലായത്. ജൂലൈ 09, 2026 ബുധനാഴ്ച വൈകിട്ട് നാലുമണിയോടെയായിരുന്നു സംഭവം.

മഞ്ഞപ്പെട്ടി സ്വദേശികളായ ഗോകുൽ (18), ആൽബി (20), മുഹമ്മദ് അൽഫാസ് (20) എന്നിവർക്കാണ് മർദനമേറ്റത്. കണ്ടന്തറയിലെ ഒരു സോഡാ ഫാക്ടറിയിൽ ജോലി അന്വേഷിച്ചെത്തിയതായിരുന്നു ഇവർ.

ഫാക്ടറിയിലെ ഒഴിവുകളെക്കുറിച്ച് അറിഞ്ഞാണ് എത്തിയതെങ്കിലും, സ്ഥലത്തെത്തിയ യുവാക്കളെ ഒരു സംഘം ആളുകൾ തടഞ്ഞുനിർത്തുകയും ബൈക്കിന്റെ താക്കോൽ ഊരി മാറ്റുകയുമായിരുന്നു. തുടർന്ന്, “സാധനം എവിടെയാണ് നിങ്ങൾ ഒളിപ്പിച്ച് വച്ചത്.

നിങ്ങളുടെ കയ്യിൽ സാധനമുണ്ട്. അത് കൊടുക്കാനല്ലേ നിങ്ങൾ വന്നത്” എന്ന് ചോദിച്ച് യുവാക്കളെ ക്രൂരമായി മർദിച്ചു.

ലഹരി വിൽപനയുമായി തങ്ങൾക്ക് ബന്ധമില്ലെന്ന് യുവാക്കൾ അപേക്ഷിച്ചെങ്കിലും ആൾക്കൂട്ടം ചെവിക്കൊണ്ടില്ല. ഇവരെ മുറിയിൽ കയറ്റി വസ്ത്രങ്ങൾ അഴിപ്പിച്ച ശേഷവും മർദനം തുടർന്നു.

തുടർന്ന് സമീപത്തെ ബാർബർ ഷോപ്പിൽ നിന്ന് ആളുകളെ വിളിച്ചുവരുത്തി യുവാക്കളുടെ തല മൊട്ടയടിപ്പിക്കുകയും ചെയ്തു. നടുറോഡിൽ മുട്ടുകുത്തി നിർത്തി ട്രിമ്മർ ഉപയോഗിച്ചായിരുന്നു ഈ നടപടി.

“നിലത്ത് വീണ മുടി മുഴുവൻ വാരിക്കൊണ്ട് പോകണമെന്നും ഒരൊറ്റ മുടി പോലും നിലത്ത് കിടക്കരുതെന്നും” പ്രതികൾ യുവാക്കളെക്കൊണ്ട് നിർബന്ധപൂർവ്വം ചെയ്യിപ്പിച്ചു. യുവാക്കൾ നൽകിയ പരാതിയുടെ അടിസ്ഥാനത്തിൽ പോലീസ് കേസെടുത്ത് അന്വേഷണം നടത്തിവരികയാണ്.