ഗ്രാഫീൻ ഒഎസും ആൻഡ്രോയിഡ് ഫോൺ സുരക്ഷയും: തെറ്റിദ്ധാരണകളും യാഥാർത്ഥ്യങ്ങളും

ആൻഡ്രോയിഡ് ഉപയോക്താക്കൾക്കിടയിൽ ഇന്ന് സ്വകാര്യതയുമായി ബന്ധപ്പെട്ട് വലിയ ചർച്ചകളാണ് നടക്കുന്നത്. മിക്ക ആപ്പുകളിലും സേവനങ്ങളിലും ആർട്ടിഫിഷ്യൽ ഇന്റലിജൻസ് അടിച്ചേൽപ്പിക്കപ്പെടുന്ന സാഹചര്യത്തിൽ, വ്യക്തിഗത ഡാറ്റയുടെ സുരക്ഷയെക്കുറിച്ച് കൂടുതൽ ശ്രദ്ധിക്കേണ്ടി വരുന്നു.

ഈ പശ്ചാത്തലത്തിലാണ് ഗൂഗിൾ പിക്സൽ 9 പ്രോ സ്മാർട്ട്ഫോണിൽ ഗ്രാഫീൻ ഒഎസ് പരീക്ഷിക്കാൻ തീരുമാനിച്ചത്. എന്നാൽ ഇതിനെക്കുറിച്ച് മുൻപ് നിലനിന്നിരുന്ന പല ധാരണകളും തെറ്റാണെന്ന് അനുഭവം കൊണ്ടുതന്നെ ബോധ്യമായി.

പലരുടെയും പ്രധാന സംശയം ഇത് ഇൻസ്റ്റാൾ ചെയ്താൽ ഗൂഗിൾ സേവനങ്ങൾ പൂർണ്ണമായും നഷ്ടപ്പെടും എന്നതായിരുന്നു. എന്നാൽ ഗ്രാഫീൻ ഒഎസ് ഉപയോഗിക്കുമ്പോഴും സാധാരണ ആൻഡ്രോയിഡ് ഫോണിലെപ്പോലെ ഗൂഗിൾ പ്ലേ സ്റ്റോർ ഡൗൺലോഡ് ചെയ്ത് ഉപയോഗിക്കാൻ സാധിക്കും.

ജിമെയിൽ, യൂട്യൂബ്, ഗൂഗിൾ ഡ്രൈവ്, മാപ്സ് തുടങ്ങിയ സേവനങ്ങൾ തടസ്സമില്ലാതെ തുടരാം. ഇവിടെ ഗൂഗിൾ പ്ലേ സർവീസസ് സിസ്റ്റം ലെവൽ ആക്സസിന് പകരം ഒരു സാധാരണ സാൻഡ്ബോക്സ് ആപ്ലിക്കേഷനായിട്ടാണ് പ്രവർത്തിക്കുന്നത്.

പിക്സൽ എക്സ്ക്ലൂസീവ് ആയ ചില ഫീച്ചറുകൾ നഷ്ടപ്പെടുമെങ്കിലും ഗൂഗിളിന്റെ ഭൂരിഭാഗം ആപ്പുകളും ഇതിൽ സുഗമമായി പ്രവർത്തിക്കും. കസ്റ്റം റോമുകൾ ഇൻസ്റ്റാൾ ചെയ്യുന്നത് മുൻപ് വളരെ ബുദ്ധിമുട്ടേറിയ പ്രക്രിയയായിരുന്നു.

എന്നാൽ ഗ്രാഫീൻ ഒഎസ് ഇൻസ്റ്റാളേഷൻ വളരെ ലളിതമാണ്. കമ്പ്യൂട്ടറും ക്രോമിയം അധിഷ്ഠിത ബ്രൗസറും യുഎസ്ബി കേബിളും ഉപയോഗിച്ച് വെബ് അധിഷ്ഠിത ഇൻസ്റ്റാളർ വഴി വളരെ എളുപ്പത്തിൽ ഇത് പൂർത്തിയാക്കാം.

എന്നാൽ ഗൂഗിൾ പിക്സൽ ഡിവൈസുകളിൽ മാത്രമാണ് നിലവിൽ ഇതിന് പിന്തുണയുള്ളത് എന്നത് ശ്രദ്ധിക്കേണ്ട കാര്യമാണ്.

ഇൻസ്റ്റാൾ ചെയ്യുന്നതിന് മുൻപ് ഫോണിലെ ഡാറ്റ ബാക്ക് അപ്പ് ചെയ്യേണ്ടതും ബൂട്ട് ലോഡർ അൺലോക്ക് ചെയ്യേണ്ടതുമാണ്. ഡെവലപ്പർ ഓപ്ഷനുകൾ ഉപയോഗിക്കുമ്പോൾ ബാങ്കിംഗ് ആപ്പുകൾ പ്രവർത്തിക്കുമോ എന്ന ആശങ്ക പലർക്കുമുണ്ട്.

ഗ്രാഫീൻ ഒഎസിന്റെ കാര്യത്തിലും സാൻഡ്ബോക്സ്ഡ് ഗൂഗിൾ പ്ലേ സർവീസസ് വഴി പ്ലേ ഇന്റഗ്രിറ്റി എപിഐ പിന്തുണ ലഭിക്കുന്നുണ്ട്. അതിനാൽ ഭൂരിഭാഗം ബാങ്കിംഗ്, പേയ്മെന്റ് ആപ്പുകളും വലിയ തടസ്സങ്ങളില്ലാതെ പ്രവർത്തിക്കും.

എങ്കിലും ആപ്പുകളുടെ സുരക്ഷാ പരിശോധനകളുടെ കാഠിന്യത്തിനനുസരിച്ച് ഇതിൽ വ്യത്യാസങ്ങൾ ഉണ്ടാകാം. സോഫ്റ്റ്‌വെയർ അപ്ഡേറ്റുകളുടെ കാര്യത്തിലും ആശങ്കകൾക്ക് സ്ഥാനമില്ല.

ഗൂഗിൾ പിക്സൽ ഡിവൈസുകൾക്ക് ലഭിക്കുന്നതുപോലെ തന്നെ ഓവർ ദി എയർ (OTA) വഴി കൃത്യമായ അപ്ഡേറ്റുകളും സെക്യൂരിറ്റി പാച്ചുകളും ഗ്രാഫീൻ ഒഎസ് ടീം നൽകുന്നുണ്ട്. സുരക്ഷയ്ക്ക് മുൻഗണന നൽകുന്ന ഈ ഓപ്പറേറ്റിംഗ് സിസ്റ്റം ആൻഡ്രോയിഡിന് പുറമെ അധിക സുരക്ഷാ മുൻകരുതലുകളും നൽകുന്നു.

ഗൂഗിൾ മെസേജസും ആർസിഎസ് ടെക്സ്റ്റിംഗും ഇതിൽ യാതൊരു തടസ്സവുമില്ലാതെ പ്രവർത്തിക്കുന്നുണ്ട്. പ്ലേ സ്റ്റോറിൽ നിന്ന് ആപ്പ് ഡൗൺലോഡ് ചെയ്ത് ക്രമീകരണങ്ങൾ മാറ്റിയാൽ ഈ സേവനം ലഭ്യമാകും.

ചുരുക്കത്തിൽ, ഗ്രാഫീൻ ഒഎസ് സംബന്ധിച്ച് നിലനിൽക്കുന്ന തെറ്റിദ്ധാരണകൾ പലതും അടിസ്ഥാനരഹിതമാണ്. സ്വകാര്യതയ്ക്ക് മുൻഗണന നൽകുന്നതും അനാവശ്യമായ എഐ ഫീച്ചറുകൾ ഒഴിവാക്കിയതുമായ ഒരു മികച്ച ആൻഡ്രോയിഡ് അനുഭവം നൽകാൻ ഇതിന് സാധിക്കുന്നുണ്ട്.