വിതുരയിൽ ട്രാവലറിന് നേരെ ആക്രമണം: മുഖംമൂടി സംഘം വാഹനം തടഞ്ഞുനിർത്തി ഗ്ലാസ് തകർത്തു

തിരുവനന്തപുരം വിതുരയിൽ വിനോദയാത്ര സംഘം സഞ്ചരിച്ച ട്രാവലറിന് നേരെ മുഖംമൂടി അണിഞ്ഞ സംഘത്തിന്റെ ആക്രമണം. ഞായറാഴ്ച വൈകിട്ടാണ് സംഭവം നടന്നത്.

പൊന്മുടിയിൽ വെച്ചുണ്ടായ വാക്കുതർക്കത്തിന്റെ തുടർച്ചയായാണ് ഈ അക്രമം അരങ്ങേറിയതെന്നാണ് പ്രാഥമിക നിഗമനം. ബാലരാമപുരം സ്വദേശികൾ സഞ്ചരിച്ച ട്രാവലറിനെ കാറിലെത്തിയ സംഘം പിന്തുടരുകയായിരുന്നു.

വഴിമധ്യേ ട്രാവലറിനെ ഓവർടേക്ക് ചെയ്ത് തടഞ്ഞുനിർത്തിയ ശേഷം മുഖംമൂടി ധരിച്ചെത്തിയവർ വാഹനത്തിന്റെ ഗ്ലാസുകൾ അടിച്ചുതകർക്കുകയായിരുന്നു. സ്ത്രീകളും കുട്ടികളും ഉൾപ്പെടെ മുപ്പതോളം പേർ ഈ സമയത്ത് വാഹനത്തിൽ ഉണ്ടായിരുന്നു.

സംഭവത്തിൽ വാഹന ഉടമ വിതുര പൊലീസിൽ ഔദ്യോഗികമായി പരാതി നൽകി. പരാതിയുടെ അടിസ്ഥാനത്തിൽ പൊലീസ് കേസ് രജിസ്റ്റർ ചെയ്ത് അന്വേഷണം ഊർജ്ജിതമാക്കി.

പ്രദേശത്തെയും പരിസരത്തെയും സിസിടിവി ദൃശ്യങ്ങൾ പരിശോധിച്ചതിൽ നിന്ന് അക്രമികൾ ഉപയോഗിച്ച കാറിന്റെ നമ്പർ ലഭിച്ചിട്ടുണ്ടെന്ന് പൊലീസ് വ്യക്തമാക്കി. ഈ വിവരങ്ങൾ കേന്ദ്രീകരിച്ച് പ്രതികളെ ഉടൻ പിടികൂടുമെന്ന് അന്വേഷണ ഉദ്യോഗസ്ഥർ അറിയിച്ചു.