ഗൂഗിൾ പിക്സൽ സ്മാർട്ട്ഫോണുകൾ മാറ്റേണ്ട പ്രധാന കാര്യങ്ങൾ എന്തൊക്കെയാണ്? ഒരു അവലോകനം

ആൻഡ്രോയിഡ് ലോകത്ത് ഗൂഗിൾ പിക്സൽ ഫോണുകൾക്ക് വലിയ സ്വീകാര്യതയുണ്ടെങ്കിലും, ഈ നിരയിൽ ഇനിയും പരിഹരിക്കപ്പെടേണ്ട നിരവധി പ്രശ്നങ്ങളുണ്ട്.

ഗൂഗിൾ പിക്സൽ 10 പ്രോ ഡെയ്‌ലി ഡ്രൈവറായി ഉപയോഗിക്കുന്ന ഒരാളെന്ന നിലയിൽ, പിക്സൽ അനുഭവം പൂർണ്ണതയോട് അടുത്തുകൊണ്ടിരിക്കുകയാണെങ്കിലും ചില കാര്യങ്ങളിൽ മാറ്റങ്ങൾ അത്യന്താപേക്ഷിതമാണെന്ന് കാണാം. മികച്ച സ്പീക്കറുകളുടെ ആവശ്യകത
സ്മാർട്ട്ഫോൺ റിവ്യൂകളിൽ ഡിസ്പ്ലേ, പെർഫോമൻസ്, ബാറ്ററി ലൈഫ്, ക്യാമറ എന്നിവയ്ക്കാണ് സാധാരണയായി മുൻഗണന നൽകാറുള്ളതെങ്കിലും സ്പീക്കർ പ്രകടനം പലപ്പോഴും അവഗണിക്കപ്പെടുന്നു.

ഈ വർഷം പുറത്തിറങ്ങിയ ഫ്ലാഗ്ഷിപ്പ് ഫോണുകളിൽ വെച്ച് ഏറ്റവും കുറഞ്ഞ നിലവാരമുള്ള സ്പീക്കറുകൾ ഉള്ളത് പിക്സൽ 10 പ്രോയ്ക്കാണ്. $1,000 വിലവരുന്ന ഒരു സ്മാർട്ട്ഫോണിൽ നിന്ന് ആളുകൾ ഇതിലും മികച്ചത് പ്രതീക്ഷിക്കുന്നു.

ഐഫോൺ 17 പ്രോ മാക്സ്, സാംസങ് ഗാലക്സി എസ്25 അൾട്രാ, വൺപ്ലസ് 15 തുടങ്ങിയ ഫോണുകളിലെ സ്പീക്കറുകൾ പിക്സലിനെ അപേക്ഷിച്ച് വളരെ മികച്ചതാണ്. പിക്സൽ 11 സീരീസിലെങ്കിലും ഗൂഗിൾ സ്പീക്കർ ഗുണനിലവാരം ഉയർത്തുമെന്നാണ് പ്രതീക്ഷിക്കുന്നത്.

ക്യാമറ പ്രൊസസിംഗിലെ മാറ്റങ്ങൾ
ഗൂഗിൾ പിക്സൽ ഫോണുകൾ അറിയപ്പെടുന്നത് അവയുടെ ക്യാമറ പ്രൊസസിംഗും എഐ വർക്കുകളും കാരണമാണ്. എന്നാൽ ഈ സ്ഥിരത ഇപ്പോൾ അല്പം ബോറടിപ്പിക്കുന്നതായി തോന്നിതുടങ്ങിയിട്ടുണ്ട്.

ഒപ്പോ, വിവോ, ഷവോമി തുടങ്ങിയ മറ്റ് ബ്രാൻഡുകൾ ക്യാമറ ഹാർഡ്‌വെയറിൽ വലിയ പരീക്ഷണങ്ങൾ നടത്തുമ്പോൾ ഗൂഗിളിന്റെ ക്യാമറ അനുഭവം ഒരേപോലെ തുടരുകയാണ്. ഇതിൽ ഗൂഗിൾ കൂടുതൽ ശ്രദ്ധ പതിപ്പിക്കേണ്ടതുണ്ട്.

മിഡ്-റേഞ്ച് ഫോണുകളിലെ മാറ്റങ്ങളും ഫ്ലിപ്പ് ഫോണുകളുടെ സാധ്യതയും
പിക്സൽ 8എ നൽകിയ മികച്ച ഡിസൈൻ അനുഭവം പിന്നീട് വന്ന പിക്സൽ 9എ നിലനിർത്തിയിട്ടില്ല. ഗൂഗിൾ തങ്ങളുടെ മിഡ്-റേഞ്ച് സ്മാർട്ട്ഫോണുകൾ പുനർവിചിന്തനം നടത്തേണ്ടതുണ്ട്.

കൂടാതെ, ബുക്ക്-സ്റ്റൈൽ ഫോൾഡബിളുകൾക്കപ്പുറം ഗൂഗിൾ പുതിയ ഫോം ഫാക്ടറുകളിലേക്ക് തിരിയേണ്ടതുണ്ട്. മോട്ടറോള റേസർ ശൈലിയിലുള്ള ഒരു ഫ്ലിപ്പ് ഫോൺ പുറത്തിറക്കാൻ ഗൂഗിൾ തയ്യാറാകണമെന്നാണ് ഉപയോക്താക്കളുടെ ആഗ്രഹം.

സോഫ്റ്റ്‌വെയർ ബഗുകളും ടെൻസർ ചിപ്സെറ്റും
പിക്സൽ ഫോണുകളിലെ സോഫ്റ്റ്‌വെയർ അസ്ഥിരതയും ബഗുകളും വലിയൊരു പ്രശ്നമാണ്. പെട്ടെന്ന് ചിത്രങ്ങൾ എടുത്താൽ അത് സേവ് ആകാതെ പോകുന്ന പ്രശ്നങ്ങൾ വരെ ഉപയോക്താക്കൾ റിപ്പോർട്ട് ചെയ്യുന്നുണ്ട്.

ഹാർഡ്‌വെയർ പോരായ്മകൾ സോഫ്റ്റ്‌വെയർ വഴി പരിഹരിക്കാൻ ഗൂഗിൾ ശ്രമിക്കുന്നുണ്ടെങ്കിലും, ടെൻസർ ചിപ്സെറ്റുകളുടെ കാര്യത്തിലും കാര്യമായ പുരോഗതി ഉണ്ടാകേണ്ടതുണ്ട്. ടെൻസർ ജി5 ചില മെച്ചപ്പെടുത്തലുകൾ നൽകിയിട്ടുണ്ടെങ്കിലും പെർഫോമൻസിന്റെ കാര്യത്തിൽ ഇപ്പോഴും മറ്റ് ഫ്ലാഗ്ഷിപ്പ് ഫോണുകൾക്ക് പിന്നിലാണ്.

ഗൂഗിൾ പിക്സൽ നിരയെ കൂടുതൽ ജനപ്രിയമാക്കാൻ ഈ വിഷയങ്ങളിൽ അടിയന്തര ശ്രദ്ധ ആവശ്യമാണ്.