അന്താരാഷ്ട്ര വിരമിക്കലിന് പിന്നാലെ വിദേശ ലീഗില്‍ കരാറൊപ്പിട്ട് അജിങ്ക്യ രഹാനെ

അന്താരാഷ്ട്ര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ച് ദിവസങ്ങൾ പിന്നിടുമ്പോൾ, വിദേശ ടി-20 ലീഗിൽ കളിക്കാൻ കരാറൊപ്പിട്ട് മുൻ ഇന്ത്യൻ നായകൻ അജിങ്ക്യ രഹാനെ. യൂറോപ്യൻ ടി-20 പ്രീമിയർ ലീഗിന്‍റെ കന്നി സീസണിൽ ആംസ്റ്റർഡാം ഫ്ലെയിംസ് ഫ്രാഞ്ചൈസിക്ക് വേണ്ടിയാണ് താരം പാഡണിയുക.

നെതർലൻഡ്സ് ആസ്ഥാനമായി പ്രവർത്തിക്കുന്ന ഈ ടീമിന്റെ സഹ-ഉടമകൾ ഓസ്ട്രേലിയൻ ക്രിക്കറ്റ് ഇതിഹാസം സ്റ്റീവ് വോയും പ്രമുഖ ബോളിവുഡ് നടൻ അഭിഷേക് ബച്ചനുമാണ്. കഴിഞ്ഞ ആഴ്ചയാണ് 38-കാരനായ രഹാനെ അന്താരാഷ്ട്ര ക്രിക്കറ്റിന്‍റെ എല്ലാ ഫോർമാറ്റുകളിൽ നിന്നും പടിയിറങ്ങുന്നതായി ഔദ്യോഗികമായി അറിയിച്ചത്.

ഇന്ത്യയ്ക്കായി 190-ലധികം അന്താരാഷ്ട്ര മത്സരങ്ങളിൽ ജേഴ്സിയണിഞ്ഞിട്ടുള്ള താരത്തിന്‍റെ വരവ് യൂറോപ്യൻ മേഖലയിൽ ക്രിക്കറ്റിന്‍റെ പ്രചാരം വർധിപ്പിക്കുമെന്നാണ് മാനേജ്‌മെന്റിന്റെ വിലയിരുത്തൽ. “ക്രിക്കറ്റ് എനിക്ക് ഒരുപാട് കാര്യങ്ങൾ തന്നിട്ടുണ്ട്.

അതുകൊണ്ടുതന്നെ കളിക്ക് തിരികെ എന്തെങ്കിലും നൽകേണ്ടത് ഒരു കളിക്കാരന്‍റെ ഉത്തരവാദിത്തമാണ്. യൂറോപ്പിൽ ക്രിക്കറ്റ് വളർന്നുവരുന്ന ഘട്ടമാണിത്.

കളിക്കളത്തിലും പുറത്തും സ്വാധീനം ചെലുത്താൻ ആഗ്രഹിക്കുന്ന ആംസ്റ്റർഡാം ഫ്ലെയിംസിന്‍റെ ഭാഗമാകാൻ കഴിഞ്ഞതിൽ സന്തോഷമുണ്ട്”-രഹാനെ വ്യക്തമാക്കി. ഒരു പ്രൊഫഷണൽ താരത്തിൽ ടീം പ്രതീക്ഷിക്കുന്ന സകല ഗുണങ്ങളും തികഞ്ഞ കളിക്കാരനാണ് രഹാനെയെന്ന് ടീം സഹ-ഉടമ സ്റ്റീവ് വോ അഭിപ്രായപ്പെട്ടു.

സമ്മർദ്ദ ഘട്ടങ്ങളിൽ പതറാതെ ശാന്തതയോടെ ടീമിനെ വിജയതീരത്തേക്ക് നയിക്കാനുള്ള അദ്ദേഹത്തിന്‍റെ സിദ്ധി അവിസ്മരണീയമാണ്. രഹാനെയുടെ വിശാലമായ പരിചയസമ്പത്തും മികച്ച നേതൃപാടവവും ഫ്രാഞ്ചൈസിക്ക് വലിയ രീതിയിൽ കരുത്തേകുമെന്നും അദ്ദേഹം കൂട്ടിച്ചേർത്തു.

രഹാനെയെപ്പോലൊരു ലോകോത്തര പ്രതിഭയുടെ സാന്നിധ്യം ടൂർണമെന്‍റിന്‍റെ മാറ്റ് കൂട്ടുമെന്ന് സഹ ഉടമ അഭിഷേക് ബച്ചൻ പ്രതികരിച്ചു. ഇത് യൂറോപ്പിലെ പുതിയ തലമുറ യുവതാരങ്ങൾക്ക് വലിയ പ്രചോദനമായി മാറുമെന്നും അദ്ദേഹം പറഞ്ഞു.

2020-21 കാലഘട്ടത്തിലെ ബോർഡർ-ഗവാസ്കർ ട്രോഫിയിൽ പ്രധാന താരങ്ങളുടെ അസാന്നിധ്യത്തിലും പരിക്കിന്‍റെ വെല്ലുവിളികൾക്കിടയിലും ഇന്ത്യയെ 2-1 എന്ന സ്കോറിൽ ചരിത്ര വിജയത്തിലേക്ക് നയിച്ച നായകനാണ് രഹാനെ. ഇതേ നേതൃപാടവവും അനുഭവസമ്പത്തും യൂറോപ്യൻ മണ്ണിലും ആവർത്തിക്കുമെന്ന പ്രതീക്ഷയിലാണ് ആരാധകലോകം.