സംസ്ഥാനത്ത് മാട്ടിറച്ചിയുടെ ലഭ്യതയിൽ ഉണ്ടായ വലിയ കുറവ് വിപണിയെ സ്തംഭിപ്പിക്കുന്നു. അയൽ സംസ്ഥാനങ്ങളിൽ നിന്നുള്ള കന്നുകാലികളുടെ വരവ് നിലച്ചതാണ് നിലവിലെ പ്രതിസന്ധിക്ക് പ്രധാന കാരണം.
സ്ഥിതി അതീവ ഗുരുതരമായ സാഹചര്യത്തിൽ ഇടുക്കി ജില്ലയിലെ ഇറച്ചിക്കടകൾ 12 മുതൽ അനിശ്ചിതകാലത്തേക്ക് പ്രവർത്തനം നിർത്തിവെക്കാൻ തീരുമാനിച്ചു. കഴിഞ്ഞ രണ്ടു മാസമായി സംസ്ഥാനത്ത് മാട്ടിറച്ചിയുടെ ലഭ്യതയിൽ കാര്യമായ ഇടിവ് സംഭവിച്ചിട്ടുണ്ട്.
തമിഴ്നാട്, ആന്ധ്രാപ്രദേശ്, കർണാടകം എന്നീ സംസ്ഥാനങ്ങളിൽ നിന്നാണ് കേരളത്തിലേക്ക് പ്രധാനമായും അറവുമാടുകളെ എത്തിക്കുന്നത്. പ്രതിമാസം ഒന്നര ലക്ഷത്തോളം കന്നുകാലികൾ എത്തിയിരുന്ന സ്ഥാനത്ത്, നിലവിൽ ഇത് ഇരുപതിനായിരത്തിൽ താഴെയായി കുറഞ്ഞു.
അയൽ സംസ്ഥാനങ്ങളിൽ ഗോസംരക്ഷക സംഘടനകളെന്ന പേരിൽ പ്രവർത്തിക്കുന്നവർ വാഹനങ്ങൾ തടയുന്നതും കന്നുകാലികളെ പിടിച്ചെടുക്കുന്നതുമാണ് വിതരണക്കാരെയും ഇടനിലക്കാരെയും പ്രതിസന്ധിയിലാക്കുന്നത്. കൂടാതെ, കഴിഞ്ഞ മെയ് മാസം മുതൽ ആന്ധ്രാപ്രദേശിൽ കന്നുകാലികൾക്കുള്ള മെഡിക്കൽ സർട്ടിഫിക്കറ്റ് നൽകുന്നത് നിർത്തിവെച്ചതും തിരിച്ചടിയായി.
സർട്ടിഫിക്കറ്റില്ലെന്ന കാരണം പറഞ്ഞ് കന്നുകാലികളെ പിടിച്ചെടുക്കുന്നതോടെ കച്ചവടക്കാർക്ക് ലക്ഷക്കണക്കിന് രൂപയുടെ നഷ്ടമാണ് സംഭവിക്കുന്നത്. നിലവിൽ കേരളത്തിൽ വളർത്തുന്ന കന്നുകാലികളെ മാത്രമാണ് ഇറച്ചിക്കായി ഉപയോഗിക്കുന്നത്.
ഈ പ്രതിസന്ധി പരിഹരിക്കാൻ നടപടി ആവശ്യപ്പെട്ട് മീറ്റ് ഇൻഡസ്ട്രീസ് വെൽഫെയർ അസ്സോസിയേഷൻ നാല് സംസ്ഥാന സർക്കാരുകൾക്ക് നിവേദനം നൽകിയെങ്കിലും ഫലമുണ്ടായില്ല. വിഷയത്തിൽ അടിയന്തര ഇടപെടൽ ആവശ്യപ്പെട്ട് മുഖ്യമന്ത്രിയെ നേരിൽ കാണാൻ ഭാരവാഹികൾ തീരുമാനിച്ചിട്ടുണ്ട്.
ലഭ്യത കുറഞ്ഞതോടെ വിപണിയിൽ വിലയും കുതിച്ചുയർന്നു. നേരത്തെ കട്ടപ്പനയിൽ കിലോയ്ക്ക് 380 രൂപയ്ക്ക് ലഭിച്ചിരുന്ന ബീഫിന് ഇപ്പോൾ 440 രൂപയാണ് ഈടാക്കുന്നത്.
പ്രതിസന്ധി തുടരുന്ന സാഹചര്യത്തിൽ ഉപഭോക്താക്കളും വലിയ ആശങ്കയിലാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
