കെയ്റോ: മയക്കുമരുന്ന് ഉൽപ്പാദനവും കടത്തും ഉൾപ്പെടെയുള്ള കുറ്റകൃത്യങ്ങളിൽ പങ്കുണ്ടെന്ന് കണ്ടെത്തിയതിനെത്തുടർന്ന് പ്രമുഖ ടെലിവിഷൻ അവതാരക സാറ ഖലീഫ (39) ഉൾപ്പെടെ 12 പേർക്ക് കെയ്റോ ക്രിമിനൽ കോടതി വധശിക്ഷ വിധിച്ചു. സംഘടിതമായി കുറ്റകൃത്യങ്ങളിൽ ഏർപ്പെടുക, വിദേശത്തുനിന്ന് മയക്കുമരുന്ന് നിർമ്മാണത്തിനുള്ള അസംസ്കൃത വസ്തുക്കൾ അനധികൃതമായി ഇറക്കുമതി ചെയ്യുക, ഇവ വിതരണം ചെയ്യുക തുടങ്ങിയ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്.
കൂടാതെ, ലൈസൻസില്ലാത്ത ആയുധങ്ങളും വെടിയുണ്ടകളും കൈവശം വെച്ചതിനും ഇവർ കുറ്റക്കാരാണെന്ന് കോടതി കണ്ടെത്തി. കുറ്റകൃത്യങ്ങളെയും സുരക്ഷാ വിഷയങ്ങളെയും ആസ്പദമാക്കി നിർമ്മിക്കുന്ന ‘മിഷൻ ഇംപോസിബിൾ’ എന്ന പ്രശസ്തമായ ടെലിവിഷൻ പരിപാടിയുടെ അവതാരകയാണ് സാറ ഖലീഫ.
ആകെ 28 പ്രതികൾ ഉള്ള കേസിൽ, വ്യാജ മയക്കുമരുന്ന് നിർമ്മാണ ശൃംഖലയ്ക്ക് സാമ്പത്തിക സഹായം നൽകിയതിലും വിദേശത്തുള്ള സംഘത്തലവൻമാരുമായി ഏകോപനം നടത്തിയതിലും സാറ ഖലീഫയ്ക്ക് മുഖ്യപങ്കുണ്ടെന്നാണ് പ്രോസിക്യൂഷൻ ആരോപിച്ചത്. എന്നാൽ, തനിക്കെതിരായ ഈ ആരോപണങ്ങൾ സാറ ഖലീഫ പൂർണ്ണമായും നിഷേധിച്ചു.
അന്വേഷണത്തിന്റെ ഭാഗമായി 750 കിലോഗ്രാമിലധികം മയക്കുമരുന്നുകളും, അവ നിർമ്മിക്കാൻ ഉപയോഗിക്കുന്ന വസ്തുക്കളും ലബോറട്ടറികൾ പ്രവർത്തിച്ചിരുന്ന രണ്ട് ഫ്ലാറ്റുകളും അധികൃതർ പിടിച്ചെടുത്തിരുന്നു. സാക്ഷികളുടെ മൊഴികളും നിർണ്ണായകമായ ഡിജിറ്റൽ തെളിവുകളും വിശകലനം ചെയ്ത ശേഷമാണ് കോടതി വിധി പ്രസ്താവിച്ചത്.
ഈജിപ്തിലെ നിയമവ്യവസ്ഥ പ്രകാരം, വധശിക്ഷ നടപ്പാക്കുന്നതിന് മുൻപായി ഗ്രാന്റ് മുഫ്തിയുടെ നിർദ്ദേശം തേടേണ്ടതുണ്ട്. ഈ നടപടിക്രമങ്ങൾ പൂർത്തിയായ സാഹചര്യത്തിലാണ് കോടതി അന്തിമ വിധി പുറപ്പെടുവിച്ചത്.
എന്നിരുന്നാലും, പ്രതികൾക്ക് വിധി ചോദ്യം ചെയ്ത് മേൽക്കോടതിയിൽ അപ്പീൽ നൽകാൻ അവസരമുള്ളതിനാൽ ശിക്ഷാവിധി ഉടൻ നടപ്പിലാക്കില്ല.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
